1 Akale kwapinda mazhuba mashoma, akabuya muKapenaume banhu bakawha kuti umomungumba. 2 Banhu banji bakabungana panhupamwempela zwokuti kwakashayikana bugalo, kana nopankoba pose; iye wakapupula iwhi kwabali. 3 Bakezha kwaali, banhulume bana, bekanyamula igosha. 4 Pabakakonwa kuswika paali pezhulu pedupwa lyabanhu bakafukunyula idenga paaluba eli; pabakafukunyula idenga bakangwinisa, bushasha pakabelilele igosha. 5 Jesu paakabona kudimbwa kwabo, wakati kugosha "mwananhulumyana luchinyo lulo lwalekejelwa."

6 Feno bamwe bakwali baluba bakagala pakalepo beyeya mumyoyo yabo, 7 "Ani ndiyani yoyu unhulume unotuka Mwali? Ndiyani angalekejela luchinyo kuzhe kwaMwali ega!"

8 Koga pakalepo Jesu wakaziba mumpepo uwe kuti kuna banoyeya alo pakati pabo, wakati kwabali, "Ini muyeya yezwi mumyoyo yenu? 9 Ngezwipi zwilelu kuleba kugosha kuti zwibi zwizwo zwalekejelwa kana kuti milika utole unseme uwo ukwende? 10 Koga kuti muzibe kuti mwananhulumyana woNhu unesimba penyika lyokulekejela luchinyo penyika. 11 Ndinoti kwauli tola unseme uwo, unde kungumba kuko."

12 Wakamilika, nokukambija akatola unseme uwe akenda pazhe mbeli kwabo bose; bakashama bakakuja Mwali beti, "atijanhu tabona zwakadai!"

13 Wakabhuda kabili akenda kugungwa; banhu bose bakenda kwaali akabalayija. 14 Wakati epinda, wakabona Levi mwananhulumyana waAlufiyasi eligele panolipiswa akati kwaali, "Nditobele." Wakamilika akontobela.

15 Ngweno zwakatikana kuti, batelesi banji nabachinyi bakabelimukulya naJesu nabatobeli babe, nokuti baluba belibanji bakontobela. 16 Bakwali nabaFalisi pabakombona elya nabatelesi nabachinyi, bakati kubalayijwa babe, "Ani ini elya nabatelesi nabachinyi?"

17 Jesu paakawha yezwi, wakati kwabali, "Yabo banabuchilo abatoda undapi koga yabo banolwala ndibo banounshaka; Andijakezha koshoba balolulama, koga bachinyi."

18 Batobeli baJohani naba Falisi baluzwiminya kulya, bakenda bakati kuna iye, "Ini batobeli baJoni nabatobeli babaFalisi kulya koga batobeli babo abatozwiminya kulya na? "

19 Jesu wakati kwabali, "Zwinota na kuti bezi bonhulume ukumuchada ekwije kulya iye ukumuchada elinabo?" Bangobeli naye wechinhulumyana ukumuchada pakati pabo abangakwije kulya. 20 Koga anozha mazhuba yoyu unhulumyana paachobhiswa pakati pabo, ndipo pabachozwiminya kulya.

21 "Apana unhu unofumila uncheka umpya pechimbalo chantolo, angodalo uncheka umpya unoshakaja wantolo kova ujeluka kasa. 22 Apana unhu unodila iwaini impya munkabo wantolo, angodalo iwaini inokwamula unkabo kova ikutuka, asi iwaini impya inodilwa muhobhodo yebhapata ibhya."

23 Ngweno zwakatikana kuti pabakakwenda mukati mominda wezwilyo nezhuba lyeSabata batobeli baluba bekwenda bevuna misholo yezwilyo. 24 BaFalisi bakati kuna iye, "Lingani, ini beta yezwi zwisakalulama nezhuba lyeSabata!"

25 Iye wakati kwabali, "Amujakabala zwakatiwa naDavidi, wakabeshaka lubhancho elinezhala iye nabo baluba naye, 26 kuti wakenda chini mungumba yaMwali mumazhuba aAbhiyata, wakabeli untebuji unkulwana, akalya chinkwa chisakabevumijwa kulyiwa kuzhe kwabatebuji akale wakapa bamwe baaluba eli nabo."

27 Akale wakati kwabali, "ISabata yakatilwa unhu; unhu aajakatilwa iSabata; 28 nezwo Mwananhulumyana wonhu ndiShe weSabata."