1 Wakati ebhuda mutempeli umwe wabalayijwa babe wakati kwaali, "Ndayiji linga bubhodo bwamabwe nobubhodo bweji jingumba!"

2 Jesu wakati kwaali, "Uzwibweni zwibakwa yezwi zwikulwana? Akutosiyiwa kana ibwe limwempela pezhulu pelimwe lisinowigilwa pasi."

3 Wakati eligele pedunhu linowhi Olivi lyakalingisana neTempeli Pita naJemusi naJoni, naEndulu bakombhuza beli boga bakati. 4 "Tibujeni kuti yezwi zwinhu zwinotikana lini biya, nechiboniso chinooba chipi kana yezwi zwinhu zwabulotikana."

5 Jesu wakatanga kuti kwabali, "Chenjelani kuti musichengwe nonhu. 6 Banji banozha nezina lyangu beti, Ndimi iye! belasha banji." 7 Kana muwha nezwehondo namalebwalebwa ehondo musive mwoyo, yezwi zwilokwelela kutikana koga kupela akujanu kwaba ipo. 8 Nokuti luji lunolwisana nolumwe luji, bushe bunoolwisana nobumwe bushe; kunooba ipo kudengenuka kwenyika kubugalo bulosiyanasiyana kunooba nenzhala; yezwi zwinanga sokutanga kwokulwaja kwemimba.

9 Chenjelani imwi; nokuti banomusenga kumakota; mulobwa mumasinagogo, munoomiswa mbeli pabatongi namashe pezhulu pangu, chibe chisumikilo kwabali. 10 Koga iNdebo iMbuya inokwelela kutanga yapupulwa kunduji jose. 11 Kana bemubuza imwi kukubeteswa, musizwinyaje kuti munoolebani, ilebani chete chamunoba mwapiwa nonshaji yoyo, nokuti atobamwi munolebeleka koga uMpepo uNchena. 12 Mwanakwaina unoopila mwanakwaina uwe kuti ebulayiwe, nadade mwana wabo, nabana banooshandukila bazwali babo nokubabulayisa. 13 Munoobengwa naibo bose nokuda kwezina lyangu; koga unonangatila kuswikila kumapejelejo unoochijwa.

14 Kana mubona chinhu chinotyisa chilimile pabugalo pachisilokwelela kuba ipo (Unobala ngawhisise kuti zwinolebani) yabo bokuJudiya ngabetizhile kumatunhu; 15 yoyo upo pezhulu pedenga lwengumba esibhuluke enda mungumba kunotola chinhu; 16 naiye umomuminda esibwilile mushule kunotola chimbalo chiche, 17 Mayee kuna yabo banemimba, nabanomwisa pamazhuba yayo! 18 Namatani kuti zwisitikane nonshaji wemhepo 19 Nokuti mumazhuba yayo kunooba ipo kuyabula kusanhu kwaba ipo kuvila pakubumbwa kwenyika yakabumbwa naMwali, kujine kube ngweno nokusichinooba ipo. 20 Akale ngana She esashomapaja mazhuba yayo akuna walojijwa; koga nokuda kwabanhu bakashalwa, wakashomapaja mazhuba yawo.

21 Nezwo kana unhu eti kwamuli, "Lingani hoyu Kristo, kana Lingani hondiya! musidimbwe." 22 BaKristo bamaniepwa nabapolofeti bamaniepwa banooba ipo beta zwiboneso nezwishamiso kuti belashe bakashalwa kana zwitika. 23 Koga chenjelani; ndagala ndamubuja kale zwose.

24 Mumazhuba yawo shule kwokuyabula, izhuba linooswibha nomweji autoopa buchena, 25 nenyenyeji jinoombwela jiva kudenga, namasimba okudenga anoodengunujwa. 26 Pakalepo banoobona Mwananhulumyana woNhu ezha eli mumakole eli namasimba makulwana nolukujo. 27 Pakalepo unootuma ingilozi jibunganise bakashalwa babe kuvila kumatibi mana enyika kunoswika kumajibilo edenga.

28 Wanani chilayijo pankwejaniso wonkuyu, kana lutabi luba lunyolo lungokwinila munoziba kuti izhizha lyaba pelyo. 29 Zwili alo, kana mubona yezwi zwinhu zwitikana, zibani kuti waaba pelyo, peshubo. 30 Chokomende ndinoti kwamuli, yechi chizekululu achitoopinda kusanhu kwatikana zwose yezwi, 31 Idenga nenyika zwinoopela koga mawhi angu aatoopinda.

32 Koga zwezhuba kana unshaji yoyo, akuna unhu unoziba kana ingilozi jokudenga kana Mwananhulumyana koga Tate chete, 33 Galani, mwakalinda; nokuti amutounziba pauchaswika unshaji. 34 Zwinanga sonhu wakenda kunoshanya, akasiya ingumba yiye, akapa balanda babe masimba, umwe nomwe akapiwa unshingo uwe, akabuja unolinda pankoba kuti elinde. 35 Nezwo ilindani nokuti amutoziba kuti tezi wengumba unozha lini, kungaba madeko, kana pakati pobusiku, kana pakukokolika igukulume kana kumijelo 36 kuti esiswike musinoziba emuwane mulilele. 37 Zwandinoleba kwamuli ndinozwileba kunabamwe.