1 Wakatangisa kubhaunula kwabali nemikwejaniso. "Unhulume wakabyala unda wonzhambi, akashosha lukuta, akacha idizwa lyokuswinila imhuji, akabaka ingumba yondindi, akacheneka balimi, akenda kuna imwe inyika." 2 Pawakaswika unshaji, wakatuma unshingi kubalimi, kuti enotola zizwalo zwonda wonzhambi. 3 Koga bakombhata bakondoba, bakombwiliza eli alo. 4 Wakabuya akatuma umwe unshingi kwabali, naiye bakondwajisa bakombwiliza neshoni. 5 Wakabuya akatuma umwe, yoyu bakombulaya; nabamwe banji babakaloba, bamwe bakababulaya. 6 Wakaba nomwananhulumyana umwempela, unodikana kwaali; wakontuma kumapejelejo eti, "Bachondemekeja mwananhulumyana wangu," 7 Koga yabo balimi bakalebelejana beti, "Yoyu ndiye undyi wefuma; izhani tiumbulaye ifuma ichaba yedu." 8 Bakombhata, bakombulaya, bakombhisila pazhe kwominda wonzhambi.

9 Unootani mweni wonda wonzhambi na? Unoobuya epalaje balimi yabo, epe bamwe balimi unda wonzhambi. 10 Ani amujanu mwabala na, lukwalo yolu lunoti:

"Ibwe lyakalashwa nababaki,

ndilyo lyakoba ibwe lyakadikana;

11 yoku kuta kwaTezi,

zwinoshamisa mumesho edu?"

12 Pakalepo bakanyetela bakada kushaka inzila yokunsunga asi bakatya luvute lyabanhu; nokuti bakabezwiziba kuti wakaba eleba ibo nonkwejaniso yoyu, Bakonsiya, bakava benda.

13 Feno bakatuma bamwe babaFalisi nabaHelodi kwaali, kuti bombhate nezwaakaleba. 14 Bakezha bakati kwaali, "Ndayiji, tinoziba kuti munechokomende amutolinga zwonhu; amutolinga zwokuzhe kwonhu, koga munolayija inzila yaMwali. Zwimo mumulawu kana ne kulipa untelo kunaKesali?"

15 "Tilipe kana tileke kulipa?" Nokuziba buchengeji bwabo, wakati kwabali, "Munondikwejelani na? Buzani ikobeli kwandili ndilibone."

16 Bakabuza imwempela. Wakati kwabali, "Untojaniso yoyu nezwilokwalwa yopa ngezwani?"

Bakati kwaali, "NgezwaKesali."

17 Jesu wakati kwabali, "Ipani Kesali zwinhu zwaKesali, nokunaMwali zwinhu zwaMwali."

Bakachenamiswa naye.

18 BaSadusi bakezha kwaali, ibo banoti akuna kumuka kwabakafa, bakombhuza umbhuzo beti, 19 "Ndayiji, Mozesi wakatikwalila kuti, kana unkulu wonhu afa, akasiya unkaji esina mwana, ununa uwe etole unkaji uwe, emusile unkulu uwe mafhigwa." 20 Kwakabelipo bana bechinhulume bonhu umwempela, bashanu nababili; wokutanga wakatola unhukaji, paakafa aajakasiya bana; 21 wabili wakontola, akafa esasiya bana; nowatatu wakata alo; kuswikila wechishanu nowabili. 22 Bakontola bashanu nababili koga besinosiya bana, kumapejelejo unhukaji neebo wakafa. 23 Pakumuka kwabakafa, unooba unkaji wani pakati pabo na? Nokuti bose bashanu nababili waluba eli unkaji wabo.

24 Jesu wakati kwabali, "Amujalashika na, nokusoziba makwalo nesimba lyaMwali?" 25 Nokuti banomuka kuna bakafa, abatolobola kana kulobolwa, asi banoba sengilozi kudenga. 26 Kana kuli kumuswa kwabakafa, amujakabala na paLukwalo lwaMozesi, penyaya yedenje lyakabepya, kuti wakati, "Ndimi Mwali waAbhulahamu, Mwali waIsaka, naMwali waJakobe? 27 Aatoba Mwali wabakafa, asi wabapenyu; mulolashika kasa."

28 Umwe wabakwali wakawha kunyenyejana kwabo, eziba kuti wakaba ashandula zwibuyanana, wakombhuza eti, "Ngoupi mulawo unkulwana pana yose?"

29 Jesu wakashandula akati, "Mulawo unkulwana ndiyoyu, Jowhani baIzilayeli! She Mwali ndiye She ega chete." 30 akale ida She Mwali uwo nomwoyo uwo wose, nompepo uwo wose, nendangalilo jijo jose, nesimba lilyo lyose. 31 "Wechibili ndiyoyu, Ida umbakijani uwo sezwaunozwida iwi. Akuna umwe mulawo unkulwana kuna yeyi." 32 Feno unkwali womulawu wakati kwaali, "Ndimo Ndayiji, mwalebesa kuti ndiwo woga chete, akuna umwe kuzhe kukwe. 33 Kuunda iye nomwoyo wose, nokulangalila kwose, nesimba lyose, nokuda umbakijani uwo sezwaunozwida iwi, zwinopinda yose mipilo yokupiswa nemibhayilo."

34 Jesu wakati ebona kuti washandula zwibuyanana wakati kwaali, "Awiko kule nobushe bwaMwali." Akujakaba nonhu wakada kuti ombhuze umbhuzo.

35 Jesu wakati elayija muTempeli, wakati, "Bakwali banoleba chini kuti Kristo ndiye mwananhulumyana waDavidi?" 36 Davidi emene ekazhajwa noMpepo uNchena wakati,

"She wakati kuna She wangu:

Gala kululyi lwangu,

kuswikila ndabiga babengi babo pasi pamakumbo awo"

37 Davidi omene unonshoba eti She, "Angaba mwananhulumyana uwe chini na?" Banji bakashantilwa nokunwha.

38 Mundayijo yiye wakati, "Chenjelelani bakwali, banoda kukwenda nezwimbalo zwilefu, nokumuswa kumisika, 39 nokugala pezwigalo zwopezhulu mumasinagogo nobugalo bwambeli pamabhiko, 40 ibo betola jingumba jenchilikaji, beta minamato milefu yokuchengeja. Yaba bachobetekeswa zwinopindilija"

41 Feno wakaba eligele ekalingisana nechibigilo chemali, ebona banji bebiga imali muchibigilo. Bafumi banji bakabiga imali inji. 42 Kwakaswika inchilikaji isakafuma, yakabiga makobeli mabili anota iganta lyesenti. 43 Wakashoba balayijwa babe, akati kwabali, "Ndinolebesa nditi kwamuli, inchilikaji yeyi isakafuma, yabiga zwinji muchibigilo kuna yabo bose bapila, 44 nokuti bose bakapa zwiva mufumo yabo yose, asi iye mukushaiwa kukwe wakapa zwose zwaana nazwo, zwobupenyu bubwe bwose."