1 Akale wakatangisa kulayija elikumbali kwegungwa. Ibunga lyabanhu lyakabunganila kwaali, nezwo wakangwina mubwato akagala mukati, banhu bose belimile penyika kumbali kwegungwa. 2 Wakabalayija zwinhu zwinji eshingisa mikwejaniso, wakalayija eti,

3 Whililani! umbyali wakenda kunobyala imbeyu. 4 Paakabemezha, imwe imbeyu yakambwelela munzila, inyuni jikezha jikailya. 5 Imwe imbeyu ikambwelela pamwala unevu ishoma, yakakambijisa kumela, nokuti ivu lyakabeli ishoma. 6 Izhuba palyakapisa, imbeyu yakapya ikakoma, nokuti aijakabeli nemiji. 7 Imwe imbeyu yakambwelela muvu linemimiwha, nokudalo yakakubuka mimhiwa ikazunda imbeyu ikakonwa kuzwala. 8 Imwe imbeyu yakambwelela muvu ibuyanana, ikamela ikaba unshonga umbuyanana, wakazwala kumwe makumi matatu, kumwe makumi mashanu anegumi, kumwe izana.

9 Wakati, "Yoyo unenzebe jowha ngewhe."

10 Aba ega bakabeli naye nabo baligumi nababili bakombhuza nonkwejaniso yoyu. 11 Wakati kwabali, "Imwi mulopiwa kuti muzibe isiswa lyechichenamiso chobushe bwaMwali," koga bamwe bose baiko kuzhe, zwose banozwiwhila mumikwejaniso, 12 kutila kuti kubona bangabona koga besino bonesesa,

kuwha bangawha koga besinowhisisa,

kuti besishanduke, besinolekejelwa

zwibi zwabo.

13 Wakati kwabali, "Amujawhisisa na unkwejaniso yoyu? Mungaiwhisisisa chini yose mikwejaniso?" 14 Umbyali unobyala iwhi. 15 Yaba ndibo bananga sembeyu yakambwelela munzila, mulyakabyalwa iwhi, kana beliwha, pakalepo Guluzhanje unoswika nokambija kova elibhisa iwhi lyabyalwa munaibo. 16 Imbeyu inombwelela pamwala ndibo yaba, banoti bangoliwha banolitambula pakalepo nolushanto; 17 asi pezhulu pokusoba nemiji, banoba nalyo kwonshaji unshomanana, koga kungoba namasheto pakalepo banowa. 18 Bamwe bananga semhuji jinobyalwa mumiwha, ndibo banowha iwhi, 19 asi nokulakamila zwenyika, nobuchengeji bwobufumi nokuchiba nezwimwe zwinjinji zwinozunda iwhi kova bekonwa kuzwala michelo. 20 "Koga yaba bakabyalwa muvu ibuyanana ndibo banowha iwhi kova belitambula akale kova bezwalwa michelo, bamwe makumi matatu, bamwe makumi mashanu anegumi nabamwe izana."

21 Wakati kwabali, "Chimuniko chinotutumiswa kova chifukwa nechitundu na kana kubigwa mudako lyobushasha? Koga achitobigwa pechitala na? 22 Apana chilosisika chisinobhisilwa pachena, akale apana chichagala lilisiswa koga chichabigwa pachena. 23 Yoyo unenzebe jinowha, ngewhe."

24 Wakati kwabali, "Muchenjele pana zwamunowha; lubazho lwamunoshingisa ndilwo luchashingiswa kwamuli; kwamuli zwichapamhijwa. 25 Nokuti kunooyo unazwinhu, unoopamhijilwa zwimwe; koga yoyo usina chaananacho, noozo zwana nazwo unozwitolelwa."

26 Wakati akale, "Bushe bwaMwali bunanga unhu wakamezha imbeyu munda, 27 kova elala, emuka busiku namasikati, imbeyu iyo kova imela ikubuka, iye esina luzibo kuti zwimutikana chini" 28 Inyika iyo nokwayo inozwala michelo, kunotanga unshonga, kutobela mwangala, nokuyiva kwezwilyo. 29 Pakalepo zwingoyiva, unotola chibaza evune nokuti unshaji wokuvuna waswika.

30 Wakati akale, "Bushe bwokudenga tingabukwejanisa neni, kana kuti tingashingisa upi unkwejaniso" 31 Bunanga semhuji yemasitadi, painobyalwa muvu, inhukutuku kumhuji jose jomunyika; 32 "Koga ingobyalwa, inokubuka kuba unti unkulwana kupinda miti yose, utukoba nenhabi ihulwana, kuti inyuni jedenga jigale muntuzi wawo."

33 Wakashingisa mikwejaniso minji mukulebeleka iwhi, zwikwendelana nokuwhisisa kwabo; 34 aajakalebeleka nabo esashingisa unkwejaniso asi baba boga nabalayijwa babe walusobapandululila zwose.

35 Madeko ezhuba lyakalelo, wakati kwabali, "Ngatitalukileni kunelimwe ibhazu." 36 Pabakasiya luvute lwabanhu, bakongwinisa mubwato kuli nobumwe bwato. 37 Kwakezha ibhepo igulwana makampo akapamula bwato, bwato bukazhala ivula. 38 Wakabeli mushule mobwato elilele ponchegelo; bakomusa, bakati kwaali, "Ndayiji amuneshungu na kuti talebopalajwa" 39 Wakamuka akalikalalila ibhepo, akati kugungwa, "Nyalala!" Ibhepo lyakama, kukaba nokuwhilijila kukulwana 40 Wakati kwabali, "Ini muli nolutyo ali? Neni musinodimbwa"

41 Bakatya zwikulugulu bakati kunomwe nomwe, "Ndiyani yoyu unowhililwa nebhepo negungwa"