1 Feno baFalisi bakabungana kwaali nabaKwali bakava kuJelusalema, 2 bakabona bamwe babalayijwa babe kuti bakabelya zwokulya namaboko mabi, yezwi zwileba kuti abajakabashamba maboko.

3 Nokuti baFalisi nabaJuda bose abatolya besashamba maboko belondota ingalilo yamatategulu abo; 4 akale kana bava kumusika, abatolya besanu bazwichenesa, minji milawo ibanotobeleja inanga sokushambisa mikombe, ihali nendyilo jobutale.

5 Pakalepo baFalisi nabaKwali bakombhuza beti, "Ini balayijwa benu besinotobelaja indayijo yatakapiwa namatategulu, nokuti ibo banolya besashamba maboko?"

6 Wakashandula eti kwabali, "Izaya wakapolofita pezhulu penu imwi bachengeji sezwakulokwalwa kuwhi:

"Banhu yaba banondikuja nemilomo yabo,

koga myoyo yabo iko kule nami.

7 Banondinamata zwamanyepwa,

belayija zwilayijo zwemilawu yabanhu!"

8 "Munosiya mulawo waMwali, mulondota milawu yabanhu."

9 Wakati kwabali, "Munenzila jokulamba mulawo waMwali, mutila kuti mulondote inzila yemigalilo yenu!" 10 Nokuti Mozesi wakati, "Lemekeja tate babo namai babo akale, yoyo unolebeleka bubi pezhulu patate namai babe, chokomende ulokwelela kufa," 11 "Koga munolayija kuti, kana unhu eti kunatate babe kana amai babe, chipi nechipi zwacho chamunowana kuva kunami chaba iKobhani (ndiko kuti chaba umpilo kunaMwali), 12 nokudalo amuchinounvumija kuti etile tate babe naamai babe chinhu, 13 nokudalo munota iwhi lyaMwali lisibe nesimba pezhulu pendayijo yemigalilo yenu. Akale zwinji kasa zwakadai zwamunota."

14 Wakashoba akale banhu kwaali akati kwabali, "Ndiwhilileni mwose muwhisise: 15 apana chinhu chipo pazhe ponhu chinoti chingongwina mwaali chinonswibhisa; koga yezwo zwinobhuda mwaali ndizwo zwinoswibhisa unhu." 16 (Kana kuli unenzebe jokuwha, ngaawhe)

17 Wakati angwina mungumba, evila kubanhu, balayijwa babe bakombhuza nezwonkwejaniso yoyu. 18 Iye wakati kwabali, "Namwi amutowhisisa? Amubweni kuti zwose zwinongwina munhu zwiva nokuzhe azwingoswibhise, 19 nokuti azwitongwina mumwoyo uwe, koga zwinongwina muntumbu uwe, kova zwinobhudila kuzhe" (Nokuleba alo wakavumila kuti zwose zwokulya zwilyiwe)

20 Akale wakati, "Zwinobhuda mumwoyo wonhu ndizwo zwinoswibhisa unhu. 21 Nokuti mukati momoyo wonhu ndimo munobhuda luyeyo lubi, busangu, kukwiba, kubulaya, nokupombola, 22 buchiba, kuba nomwoyo umbi, kuchengela, buhungu, kunyetela, kutuka, kuzwikuja, nobulema. 23 Zwose yezwi zwibi zwinova mumwoyo ndizwo zwinoswibhisa unhu."

24 Jesu wakamilika pakalepo, akenda kunyika yeTile neSidoni. Wakangwina mungumba, aajakabeda kuti banhu bonzibe, asi banhu bakaziba. 25 Paluba nonhukaji waluba nomwanansichana wakaba eli nompepo umbi, paakawha nezwizwe, wakamuka nokunda kwakale, akaswika ezwiwigila pamakumbo awe. 26 Unhukaji yoyu waluba unGiliki, eli chizwalwa chokubugalo bunowhi Sayilofonisheni. Wakonkumbila kuti ebhise umpepo umbi mumwanansichana uwe. 27 Wakati kwaali, "Bana ngabetange kuguta, nokuti azwijilolulama kutola chokulya chabana, kova muchiposela imbwa."

28 Unhukaji wakashandula, akati, "Eya She, koga imbwanana jinolya pasi pechitala zwimedu zwinolashwa nabana."

29 Wakashandula akati kwaali, "Nokulebeleka kuko udalo, inda umpepo umbi wabhuda mumwanansichana uwo."

30 Wakenda kungumba yiye, akawana mwanansichana uwe elilele pabulo, umpepo umbi wakaba wabhuda mwaali.

31 Wakabuya akabhuda mubugalo bweguta lyeTaya akapinda nomuSidoni ekaswika kugungwa lyeGalili, epinda pakati penyika yeDikapolisi. 32 Bakabuza kwaali unhu waluba elinenzebe jisinowha akale elichimumu; bakombweta kuti ebige luboko lulwe pezhulu pape. 33 Wakontola akobhisa kubanhu, akonsengela kulosisika, wakabiga tunyala tutwe munzebe, akafhila mate, akombhata lulimi lulwe. 34 Wakalinga zhezhulu kudenga, akamimila, akati kwaali, "Efata," zwileba kuti, "Zhulika!"

35 Inzebe jije jakava jazhulika, lulimi luka lelupa akava atubula kulebeleka. 36 Wakababuja kuti besibuje bamwe banhu koga, paakabajibisa, iye ndipo pabakanyaya kubuja banhu. 37 Zwakabashamisa kasa bakati, "Zwose zwaanota zwibuya; unota machinzebe ewhe nezwimumu zwilebeleke."