1 Mumazhuba yayo, kwakaba noluvute lwakabungana koga besina zwokulya, Jesu wakashoba balayijwa babe akati kwabali, 2 "Ndinobawhila ishe banhu, nokuti ndagala mazhuba matatu ndilinabo koga besina zwokulya, 3 ndingoti bende kumisha yabo nezhala bamwe banozilika munzila nokuti bamwe banova kule."

4 Balayijwa babe bakonshandula beti, "Unhu angachiwana kupi chinkwa chingabaguncha banhu mugwa yeli?"

5 Iye wakabhuza akale akati, "Munazwinkwa zwingana?" Bakati "zwishanu zwina zwibili,"

6 Wakabuja banhu kuti begale pasi; wakatola zwinkwa zwishanu zwina zwibili, akaboka, akazwimedula akapa balayijwa kuti bepe banhu; bakabakobela banhu. 7 Akale bakabeli nehobe inshoma; wakajikombolela, akababuja kuti bepe banhu. 8 Bakalya bakaguta; bakanunga tufwapi twakabesala bakazhaja zwitundu zwishanu zwina zwibili. 9 Bakalya bakabeswika kuzwiulu zwina. 10 Wakababuja kuti bende; pakalepo iye wakangwina mubwato nabalayijwa babe, bakenda munyika yeDalamanuta.

11 Kwakaswika baFalisi kwakale bakakakabajana naye bonkweja beti ebatondeje chitondejelo chokudenga. 12 Wakatula ibhika akati, "Yechi chizekululu chinoshakilani chitondejelo na? Ndomubuja ilebeswa ndoti, yechi chizekululu achitoopiwa chitondejelo."

13 Wakabasiya akangwina mubwato, akenda kunelimwe iseli.

14 Feno bakabakanganwa kunyamula zwinkwa; bakabeli nechinkwa chimwempela chete mubwato. 15 Wakabalaya eti, "Chenjelelani umfufumuso wabaFalisi, akale nomfufumuso waHelodi."

16 Bakalebelejana beti, "Waleba yezwi nokuti atina zwokulya."

17 Nokuziba indangalilo jabo, Jesu wakati kwabali, "Ini mulebelekesana nokusonyamula kwenu zwinkwa? Amutobona nokuwhisisa? Myoyo yenu ichi mikukutu na? 18 Munamesho koga amutobona, munenzebe koga amutowha? Amutokumbulukwa pe? 19 Pandakamedula zwinkwa kubanhu zwiulu zwishanu, mwakazhaja zwitundu zwingana nezwifwapi?"

Bakati kwaali, "Igumi nezwibili."

20 " Akale pandakamedula zwinkwa kuzwiulu zwina mwakanunga zwifwapi mukazhaja zwitundu zwingana?"

Bakati kwaali, "Zwishanu zwinazwibili."

21 Akati kwabali, "Ini biya musinowhisisa?"

22 Bakaswika kuBhetisaida. Bamwe banhu bakabuza unhulume wakabeli ibhofu kwaali, bakonkwekweteja kuti ongume. 23 Wakabhata unhulume ibhofu noluboko, akenda naye kuzhe kwonzi; wakomfhila kumesho namate akombiga maboko pezhulu, akombhuza eti, "Ubweni chinhu na?"

24 Wakalinga zhezhulu akati "Ndibweni banhu, koga bananga semiti ikumukwendenda."

25 Akale wakabuya akabiga maboko pamesho awe; wakalingisisa akabona zwibuyanana. 26 Wakonsungula kuti ende kungumba yiye akati, "Usibuje unhu munsha."

27 Jesu wakenda nabalayijwa babe mumizi yeSizaliya Filipu, belimunzila wakababhuza balayijwa babe eti, "Banhu banoti ndimi ani?"

28 Ibo bakashandula beti, "Joni umbhabhatizi bamwe bamuti Elija akale bamwe bamuti umwe wabapolofeti."

29 Wakababhuza ibo akati kwabali, "Ani imwi moti ndimi ani?"

Pita wakashandula akati kwaali, "Imwi ndimwi Kristo."

30 Wakabalaya kuti besibuje kana unhu umwempela nozuzwe.

31 Wakatanga kubalayija kuti Mwananhulumyana woNhu, unoojiijwa zwikulwana kasa, unoolashwa nabakulwana bose, nabatungamili babatebuji, nabakwali, unoobulayiwa koga unoomuka mushule mwamazhuba matatu. 32 Yezwi wakazwileba pachena. Pita wakonshobela kumbali akatanga kunkalalila. 33 Paakachebuka wakalinga balayijwa babe akakalalila Pita eti, "Guluzhanje bhuda mushule lyangu. Iwi aujikumuyeya zwaMwali, ukumuyeya zwabanhu."

34 Wakashoba luvute nabalayijwa babe kuti bezhe kwaali akati kwabali, "Kana unhu eda kunditobela, ngaazwilambe etole unchinjikwa uwe enditobele." 35 "Yoyo unobabalila bupenyu bubwe bunoondashikila, koga yoyo unolashikilwa nobupenyu bubwe pezhulu pangu kana pezhulu peNdebo iMbuya yangu, yoyo unoobuchija. 36 Zwinoumbhancha neni kuti unhu ewana zwose zwopenyika koga kova elashikilwa nobupenyu bubwe? 37 Unhu ini zwaangapile sendipilo yobupenyu bubwe? 38 Aani naani unonditila ishoni, kana mawhi angu munechi chizekululu chobupombwe nobuchinyi, Mwananhulumyana woNhu unoontila ishoni paachezha mubushe bwaTate babe nengilozi inchena."