1 Pakakwapela iSabata, Mariya Magadalena na Mariya amai baJemusi naSalome bakatenga mafuta anonhuwilila kuti bende benonguba. 2 Kumijelo nezhuba lyotanga lyeviki, bakenda kugumbu, pakubhuda kwezhuba. 3 Bakalebelekesana beti, "Ndiyani uchanoti kungulujila ibwe pankoba wegumbu biya?" 4 Pabakalingisisa, bakabona ibwe lyakungulijwa kojoba lyakabeli igulwana kasa. 5 Bakangwina mugumbu bakabona unzhuzha eligele kululyi, akambala zwimbalo zwichena; bakachenama.

6 Wakati kwabali, "Musuve mwoyo, mumushaka Jesu wokuNazaleta, wakakahamilwa panchijikwa. Wamuka aipo yopano; lingani yopa ndipo pabakabombiga. 7 Koga indani munobuja balayijwa babe naPita kuti wenda pambeli penu kuGalili; munonouwana kwakale sokubujwa kwenu"

8 Bakabhuda bekatizha kugumbu, nokuti bakaba nokuteketa nokutya kasa, abajakabuja unhu nokuti bakaba betya.

9 Jesu wakati amuka zwingwanangwana nezhuba lyotanga lyeviki, wakatanga kuboneka kuna Mariya Magadalena iye waakabhisa mipepo mibi mishanu ina mibili. 10 Iye wakenda akanobabuja yabo baluba belinaye, bakaba bechinolila. 11 Pabakawha kuti umpenyu, nokuti waboneka kwaali abajakadimbwa.

12 Mushule mwezwi wakazwitondejela nechimwe chimo kubabili babo bakabekwenda mumizi. 13 Bakenda bakanobuja bamwe, koga abajakabadimbwa.

14 Shule mwezwi wakazwitondejela kuna baligumi nomwempela, beligele pabakabelya; akabapa undandu pezhulu pokusodimbwa kwabo nobukukutu bwemyoyo yabo, nokuti abajakadimbwa kuna yabo bakombona amuka. 15 Wakati kwabali, "Indani kunyika jose mubhaunule iNdebo iMbuya kuzwibumbwa zwose. 16 Yoyo unovumila ebhabhatizwe unoochijwa, koga yoyo usinovumila unoolashwa. 17 Yezwi zwitondejelo zwinootobela banovumila. Muzina lyangu banoobhisa madimoni bepupule nendimi impya, 18 banoonunga jinyoka namaboko, kojoba bakanwa zwinhu zwinobulaya azwitoobalwajisa, banobiga maboko pezhulu pabanolwala bechikochila."

19 She Jesu wakati alebeleka nabo, wakatolwa akenda kudenga akanogala kuluboko lolulyi lwaMwali. 20 Ibo bakenda bekanobhaunula iNdebo iMbuya kwose kwose, She eshinga nabo esimisa iwhi nezwiboniso zwakatobela. Ameni