1 Wakanyamuka akenda kubugalo bweJudiya, akale nomunelimwe seli lyeJolodani, idupwa lyabanhu lyakabungana kwaali akale; songalilo uwe, iye wakabalayija. 2 BaFalisi bakezha bakombhuza bonkweja beti, " Zwimo mumulawo na kuti unhulume eshime unkaji uwe?" 3 Wakabashandula akale eti kwabali, "Mozesi wakamulaya ni?" 4 Bakati, "Mozesi wakaba evumila kuti unhulume ekwalile unhukaji uwe lukwalo lwokunshima kova onshima." 5 Koga Jesu wakabashandula ekati kwabali. Yezwi zwakatiwa nokukoma kwemyoyo yenu, kuti emukwalile yoyu mulawo. 6 Asi kuva pakutangisa kutiwa kwenyika, Mwali wakabumba unhulume nonhukaji. 7 "Zwakadalo unhulume unoosiya tate namai babe ebhataniswe nonkaji uwe, 8 yaba babili banooba inyama imwempela. Nokudalo abachili babili, koga inyama imwempela. 9 Nezwo, zwabhataniswa naMwali, zwisipambulanywe nonhu." 10 Belimungumba, balayijwa babe bakombhuza akale nenyaya yakaleyi. 11 Wakati kwabali, "Yoyo unoshima unkaji uwe, kova elobola umwe una undandu wokupombola kwaali; 12 akale kana ashima undume uwe, kova elobolwa nomwe, umupombola."

13 Pakalepo bakabebuza bana kwaali, kuti ebagume, koga balayijwa babe bakaba kalalila. 14 Asi paakazwibona yezwi Jesu, aajakanakilwa nazwo akati kwabali, "Lekani bana bezhe kwandili, musibalambije, nokuti bushe bwaMwali ngobwabo bananga saba. 15 Ndolebesa, kwamuli nditi, yoyo usinotambula bushe bwaMwali somwana untukutuku, aatofa alingwina." 16 Wakabafufujila, akababiga maboko awe akabakombolela.

17 Elimukukwenda munzila, unhulume wakezha elabuka akafhugama mbeli kukwe akati kwaali, "Ndayiji wakalulama, ini zwandingate, kuti ndiwane bupenyu businopela?" 18 Jesu wakati kwaali, "Unondishobelani kuti ndakalulama? Wakalulama umwempela chete, ndiMwali. 19 Milawu unoyiziba: Usibulaye; Usipombole; Usikwibe; Usisumikijie manyepwa; Usitolele unhu chinhu; Ikuja tate namai babo."

20 Iye wakati kwaali, "Ndayiji, zwose yezwi ndilozwilondota kuva ndili uncheche."

21 Jesu wakoondinga, akonda akati kwaali, "Chinhu chimwempela chiloshayika; inda unotengesa zwose zwauna nazwo, upe basheti, unowana ifuma yokudenga; utukozha unditobele." 22 Paakazwiwha yezwi wakahetela, wakenda elineshungu; nokuti wakaba ekafuma kasa.

23 Jesu wakalinga linga akati kubalayijwa babe, "Zwikukutu kunaibo balofuma kuti bengwine mubushe bwaMwali!"

24 Balayijwa babe bakachenamiswa namawhi awe. Koga Jesu wakati akale kwabali, "Bana, kulemu chini kungwina mubushe bwa Mwali!" 25 "Zwilelu kuti ikamela lingwine mukabanga keneleti kuna kuti umfumi engwine mubushe bwa Mwali."

26 Bakashamiswa kasa, bakati kwaali, "Ndiyani biya achachijwa?"

27 Jesu wakabalinga akati, "Kunhu azwitotubukana, koga kuna Mwali zwose zwinotubukana."

28 Pita wakatanga kulebeleka kwaali eti "Ilingani, isu tasiya zwose tikamutobela."

29 Jesu wakashandula akati, "Chokomende ndinoti kwamuli, apana unhu wakasiya ingumba, ununa kana nkazwaji, kana amai kana tate kana bana kana minda pezhulu pangu neNdebo Mbuya," 30 usinootambuliswa nononshaji izana lyejingumba kana bakazwaji bechinhulume kana bakazwaji bechinhukaji kana mamai kana bana kana miminda noluyabiso akale bupenyu businopela munshaji unozha. 31 "Koga banji botanga banooba bopejeleja, baiko kumapejelejo banooba botanga."

32 Bakabeli munzila benda kuJelusalema, Jesu eli pambeli; bakachenama akale bakabontobela bakaba nolutyo. Wakatola baligumi nababili akatanga kubabuja nezwitiko zwalootikana kwaali eti, 33 "Bonani, tikumunda kuJelusalema, Mwananhulumyana woNhu unopilwa kubatebuji bakulwana nokubakwali, ibo bachontongela lufu akale banompila kuna bokuzhe, 34 banonseka, akale bonfhile, bondobe, akale bombulaye, mushule mwamazhuba matatu unomuka."

35 Jemusi naJoni, bana baZebhedi bakaswika kwaali bakati, "Ndayiji tinoda mutitile zwose zwatichakumbila kwamuli."

36 Wakati kwabali, "Ini zwamumuda kuti ndimutile?"

37 Bakati kwaali, "Titeni kuti umwe wedu egale kululyi umwe egale kuchesho muBugalo bwenu bwolukujo."

38 Koga Jesu wakati kwabali, "Amutochiziba chamumukumbila. Imwi mootubula na kunwa unkombe wandinonwa kana lubhabhatizo lwandimubhabhatizwa nalwo?"

39 Bakati kwaali, "Tinotubula."

Jesu wakati kwabali, "Unkombe wandichanwila muchaunwila, akale munoobhabhatizwa nolubhabhatizo lwandichabhabhatizwa nalwo; 40 koga kugala kululyi kwangu kana kuchesho changu, azwitoba zwangu, koga nguzwa yabo bakazwilonganyilwa."

41 Pabakazwiwha bamwe babo baligumi, bakabanyemela kasa Jemusi naJoni. 42 Asi Jesu wakabashobela kwaali akalebeleka eti, "Mozwiziba kuti matezi abokuzhe anobalaya nobukukutu, nabakulwana babo banoshingisa isimba pezhulu pabo. 43 Azwitonoba alo kwamuli; unoda kuba unkulwana pakati kwenu ngaabe unshingi wenu, 44 akale noyo unoda kuba wotanga unokwelela kuba unzike wabo bose. 45 Nokuti Mwananhulumyana woNhu aajakezha koshingilwa, koga koshingila nokupila bupenyu bubwe kuti bube indipilo yabanji."

46 Bakaswika kuJeliko; paakubhuda kuJeliko elinabalayijwa babe nedupwa lyabanhu, ibhofu Bhatimiyasi, mwananhulumyana waTimiyusi, wakabeligele kumbali kwongwagwa ekumbila. 47 Paakawha kuti ndiJesu wokuNazaleta, wakatanga kushomeja eti, "Jesu Mwananhulumyana waDavidi, ndiwhileni ishe!"

48 Banji bakombuja kuti enyalale, koga iye ndipo pakakongoloka nesimba, "Mwananhulumyana waDavidi ndiwhileni ishe!"

49 Jesu wakama akati, "Unshobeni."

Bakalishoba ibhofu, bakati, "Shanta; nyamuka umukushoba."

50 Wakalashila kumbali ishashiko lilye, akanyamuka nesimba, enda kunaJesu.

51 Jesu wakati kwaali, "Unoda kuti ndikutileni na?"

Ibhofu lyakati, "She ndimuda kuti ndibone."

52 Jesu wakati kwaali, "Inda azo; kudimbwa kukwo kwakuchija."

Pakalepo wakabona, akontobela mungwagwa.