17 Mundu ywoywoti mana alu’mbine na Kilisitu, apanga kyumbe sayambi', makowe ga kwai’mbu' gabu’i, lingulya, gapangite gayambi'! 18 Lyoti lyengo lya Nnu’ngu' ywatuawaniye twenga na mwene kwa ndi’la ya Kilisitu, na kutupeya lyengo lya kwaawana bandu na ywembe mwene. 19 Ngo baya panga, Nnu’ngu' aabile kaiawana dunia na ywembe mwene kwa ndi’la ya Kilisitu, pangali balanga masambi gababile nago bandu. Ywembe aatulagi tuale liyi’gi’yo lya kwaawana bandu na ywembe mwene.

20 Bai, twenga tuyi’ma paali pa Kilisitu, na Nnu’ngu' mwene atutumya twenga kunkema mwenga. Tunnu’banga paali pa Kilisitu, muawane na Nnu’ngu'. 21 Kwa mwanjaa, Kilisitu aabileli na sambi, lakini Nnu’ngu' aampangite abe sambi kwa kitumbu situ, li’nga kwa ndi’la yake tupate panga aki nnu’ngi' ya Nnu’ngu'.