13 Mesiku olyo tuu ndyo, yaali yomaalanduli yaYesus oya li taa ende ya uka komukunda wevina Emmaus, keli eekilometa omulongo nayimwe okuza kuYelusalema, 14 taa kundafana ayihe mbi ya ningwa. 15 Mhanga taa kundafana, Yesus ye mwene okwe ya holokela, ndee ta ende pamwe nayo. 16 Oye mu mona nghaa, okutya inaye mu vibuluka. 17 Yesus okwe ya pula a ti, "Amu kundafana shi molweendo lweni?" Oya fikama ya mwena noipala ya nyika oluhovi. 18 Wumwe womuyo wevina Kleopas okwe mu pula, "Ooye auke womuYelusalema ino uva nhyi sha ningwa omasiku nga?

19 Yesus okwe ya pula a ti, "Opwa ningwa shi? Oya yamukula ya ti,

"Oinima mbi ya ningilwa yaYesus Omunasaleta. Omulumenhu ngu okwa li omuhunganeki, e na eenghono moilonga nomeehapu, koshipala shaKalunga nokaanhu ayehe. 20 Ndee aawiliki yaayambi naapangeli yetu oye mu yandja a pewe ehandukilo lyeso, ndee ta ye mu alele komushiyakano. 21 Ndee se otwa li twe ineekela kutya omulumenhu ngu oye taka mangulula Aaislaeli. Nena nokuli esiku etitatu, konima nhyi ayihe mbi ya ningwa. 22 Aakiinhu yamwe yomokati ketu oye tu kumwifa, nhyi ya yile kombila ongula onene 23 ndele omuviba waYesus inaye wu hanga ko. Nhyi ya aluka, oya hokolola kutya oya mona emoniko lyaayengeli, mba ye ya lombwela kutya Yesus okuna omwenyo. 24 Oku za mho, yamwe yomokati ketu oya ya ko kombila, ndele oya hanga ko naanaa nganhyi ya lombwelwa kaakiinhu, ndele Yesus ye mwene ina ye mu mona." 25 Yesus okwa ti kuyo, "Kamu shi tuu omalai, nhyi omitima veni va nyengwa okwiitaela ayihe mbi ya popiwa kaahunganeki! 26 Ndishi Kilistus okwa li nghaa e na okuhepekwa pamukalo mbu opo a ye meyavimo lyaye?" 27 Opo nee Yesus okwe ya fatululila nhyi sha shangwa momishangwa avihe, okutameka momambo yaMoses siyo okomambo ayehe yaahunganeki. 28 Nhyi ye ya popepi nomukunda mbo mu ya li taa yi, Yesus okwa ninga a fa ta pitilile po. 29 Ndele oyemu lilila ya ti, "Kala puse, oshonhyi okwa toka, omilema ove ya." Yesus okwa ya, ndee ta kala puyo. 30 Hano nhyi a kala omutumba poshililo pamwe nayo, okwa kufa omboloto, ndee ta pandula Kalunga, ndee teya pe. 31 Omeho yawo oya tonata, noye mu vibulula. Mepakumo lyeiho, okwa kana po. 32 Oya pulafana ya ti, "Kasha li shafa omundilo meemitima vetu nhyi a popya nase, ndee te tu fatululile nomishangwa?"

33 Oya fikama viyaviya, ndele taa shuna kuYelusalema, nghu ya hanga ko aalongwa omulongo naumwe ya ongala nooyakwawo yamwe 34 ndee taa ti, "Kapu na omalimbililo, Omwene okwa umuka! Okwa monika kuSimoni!" 35 Aalongwa mba yaali oye ya fatululile nhyi sha ningwa mondjila nanghee ya vibulula Omwene, konima nhyi a pambula omboloto.