1 Ngɔngɔ Yesu abeaka batingami domi na babae ko abapaka kpatsi e bobengana miembo mibe ko boheledja bipeko bisusu ko na biɛmɛ bisusu. 2 Endja kombe i bapɔsɔlu domi na babae: o mbangi Simo, yona obakeabo kombe e Piɛlɛ; ko na mwange e nde Andele, Djake ko na mwange e nde Yoane, basusu babae bana bami ba Djebede; 3 Pilipo ko Batelemi, Toma ko Matayo moputedji o puti, Djake mwana momi o Alipe ko Tade; 4 Simo moto okaswe ngando ko Yudasi Isikaliota yona okabaka Yesu.

5 Edaka bami domi na babae i balomaka Yesu elomu na simbisi idji: «Pɛ bokɛni ta dɔngɔ i bato ba bikomi bi bakɛndɛli ko pɛ bokweani ta ibonga i Basamalia. 6 Endolo kɛni adi bato ba Isalɛlɛ badi elenge bhata i babunga ndjea. 7 Ehole akɛkɛno ndjea ndjea, dumbeakani gala ye boo: "Bokumu bo diko bobatami!" 8 Heledjani bato ba bipeko, sisodjani bato bago, sɛnodjani bato ba mabha ko benganani miembo mibe. Odihini ngasa ko pani pongono ngasa. 9 Pɛ botombani nongo ta mosenge mo bino wolo, palata kaoko palanga e ebende. 10 Pɛ botombani sɛki tine mɔndɔ, pɛ kasaka ibae, pɛ sapato ko pɛ pango. Tengasa, mosali atungi na iputi i nde*.

11 «Ehole aimeakeno ta ibonga imɔti kaoko ta ngando emɔti, hombani moto oboani na boasɔni ko daani ta ndako e nde mbunoko ehole adongakeno. 12 Ekadabo okweini ta ndako emɔti, balani: "Bogo bodae na nu!" 13 Na bea ekada boo bato ba ndako emina basɔini, kinani boo bogo bo bino bo bodae na bu. Endolo bamitoasɔni, kinani boo bogo bo bino bosɔmbe adi no. 14 Ekadabo baloni boasɔni ta ndako i bobo kaoko ta ibonga kaoko baloni bokeani, dongani ena ko bhubholani dhutu i mako ma bino*. 15 Soti nabalaka na nu: ta busa bo esambi, etumbo e mabonga ma Sɔdɔmɔ ko Gomola edabi ekɛkɛ bonɔ yena adiabibo.

16 «Okani! Nolomakani elenge bhata ta ndanda e swa. Na bea daani na engɛlɛ elenge ndjɔ ko bosatitedja elenge embenga. 17 Daani na engɛlɛ, tengasa bato bopundakabini ta ibolea inɛnɛ i basuku ba bayuda ko bokɛsɛkɛkɛbini mbalake ta basinagoga i bobo. 18 Bosambedjakabini ta boso bo bagupɛnɛlɛ ko bakondji. Na ndjea emina, opabini tati ta tina e mbi ta boso bo bobo ko ta boso bo bato ba bikomi bi bakɛndɛli. 19 Endolo ehole eopundakabinibo, pɛ bosatungeani na mibalo mabalakeno kaoko mwɛngi mo bobala: miopamakabini oko ta ehole yena. 20 Tengasa edaetebino bato babalabi, endolo Mwembo mo Sange e bino mo balakabi na ndjea e minɔkɔ mi bino. 21 Mwange e moto akababi mwange e nde ta bogwa, sange e moto akababi mwana o nde, bana baleloakabi na baboti ba bobo ko babakabakabi ta bogwa. 22 Bato basusu bolonakabini ta tina e kombe e mbi. Endolo moto yona osagbindeakabi mbunoko suka, ahelabi. 23 Ekadabo bonɔngedjini ta ibonga imɔti, tiyani ta ibonga ikina. Soti nabali na nu: osidjetebini mabonga masusu ma Isalɛlɛ boso boo Mwana o Moto adue.»

24 «Motingami tanɔe molehi o nde; nongo mobuli tanɔe moswa nde. 25 Enakobea motingami aboani boda elenge molehi o nde ko mobuli elenge moswa nde. Elenge amobeaka bo mokondji o Bɛlɛdjɛbulɛ, modakabibo moda mosingakabi bo bato i badi ta ndako e nde!»

26 «Na tina emina, pɛ bobabangani, tengasa misusu i mi bombama midjebamabi ko misusu mi mbombi mienɛmɛbi ta bhuda. 27 Meako motɔndeakani mbi edɛdi ta modidi, mibalani ta moyi mopipo; ko imabalaka bo na nu na popoli ta matoi ma bino, migamakabi ta diko i ndako. 28 Pɛ bobangani bia bowaka mokuku, endolo baboaniti bowa dongi; bangani yona odi na mwɛngi mo bowa mokuku na dongi ko bodumba ta ipelu. 29 Modjɔ nda, tebatɛke bana ba iseketele babae na palanga ipɛ tina? Enakobea, pɛ omɔti eboaniti bokwa ta kpɔtɔ emiti daa boo Sange e bino amitipa ndjea. 30 Ta tina e bino, nongo motuya mo swe i bino modi molangamake. 31 Na bea, pɛ bobangani: ino onɔini bana ba iseketele basusu na tina!»

32 «Moto mosusu yona obalakabi ta boso bo bato boo adi motingami o mbi, mbi pongono nabalakabi tina e nde ta boso bo Sange e mbi yona odi o diko. 33 Endolo ekada boo moto ainganeini ta miso ma bato boo aditi motingami o mbi, mbi pongono namoinganeabi ta boso bo Sange e mbi yona odi o diko.»

34 «Olɛdjini boo nadoi tine boisa bogo ta ngondo? Ngasa, nadoiti tine boisa bogo, endolo bila. 35 Tengasa, nadoi tine bogbɔtodja mwana momi na sange e nde, mwana mwali na nange e nde ko bokio mwali na nange e momi o nde. 36 Baloni ba moto badabi oko bato ba ndako e nde. 37 Moto yona okapale sange e nde kaoko nange e nde bonɔ mbi, aboaniti na mbi. Moto yona okapale mwana o nde momi kaoko mwana o nde mwali bonɔ mbi aboaniti na mbi. 38 Moto yona adake pɛ botomba ekulusu e nde bɛngi akimaneni, aboaniti na mbi. 39 Yona apalaka bobanea mohelo mo nde, amobungedjake. Endolo yona abungedjake mohelo mo nde tina e mbi, amodiabi.»

40 «Moto mosusu oasɔini, asɔi mbi pongono; ko moto yona oasɔini, asɔi pongono yona olomani. 41 Moto yona oasɔi mbaeli o Ndjakomba tine adi mbaeli, adiabi iputi ipama tina e mbaeli. Yona oasɔi moto o bodjo tine boo adi moto o bodjo adi Ndjakomba, adiake iputi ipama tina e moto o bodjo. 42 Soti nabalaka na nu: yona apaka nongo kɔbɔ e madiba ma botiti adi bana bakɛkɛkɛ bi, tine boo badi batingami ba mbi, moto omina adiabi iputi i nde.»