1 Ehole esidjaka Yesu bopa simbisi adi batingami ba nde domi na babae, adongaka ena ko akɛkɛ boleha ko bonanganedja gala e Bwɛndi Bopele ta mabonga ma mokpɔtɔ mua.

2 Yoane Mobatisi, adaka ta bɔlɔkɔ, aokaka bobala gala e misala mi Kilito. Na bea alomaka ekenge e batingami ba nde 3 bohɔdjɔ Yesu: «Boni odi Masiya yona aduake kaoko loambe okina?» 4 Yesu abasɔmbedjaka: «Kɛni botɔndea Yoane meako imisokano ko mienino: 5 bato bagwa miso baimei boenɛ, bato baondɔ mako baimei bodala, bato ba mabha basɛnɔi, bato babohoka baimei booka, bato bago bapusoi ko Bwɛndi Bopele botɔndɔmi adi batakeli. 6 Sepi adi moto yona odake pɛ bokina bodima bo nde tina e mbi!»

7 Ehole eyanaka batingami ba Yoane, Yesu abalaka na emumu e bato ta tina e Yoane: «Moto okɛkino aendja ta etengelenge nda? Mososongo mokumanaki na epoipoi? 8 Emitida mososongo momina, okɛkino mɛnɛ aendja nda? Moto omɔti olwaki bisendja bi motuya? Endolo bato bia bakalwae bisendja bi motuya bodaka ta ndako i bakondji. 9 Okɛkɛkini mɛnɛ aendja ndaa? Mbaeli o Ndjakomba? Soti, nabalaka na nu, lokɛkɛ boendja moto onɔi mɛnɛ mbaeli o Ndjakomba. 10 Tengasa Yoane adi yona obalaka ikomi ta tina e nde: "Nalomabi moto o mbi o elomu boso bo wɛ, tine bobɔngedjea ndjea." 11 Soti nabalaka na nu: ta tei e bato bia babotama na bali, pɛ nongo moto omɔti odi monɛnɛ bonɔ Yoane Mobatisi. Enakobea, iyona onɔi mokɛkɛ ta tei e Bokumu bo diko, adi monɛnɛ bonɔ Yoane Mobatisi. 12 Donga ta ehole yena elehaka Yoane Mobatisi mbunoko edɛdi, bokwea ta Bokumu bo diko boimea boanedjama na ngulu ko bato ba koo bakahombe bobokatoa na ngulu. 13 Tengasa ba mbaeli ba Ndjakomba basusu ko mobeko mo Mose badaka bobala tina e Bokumu bomina mbunoko ta ehole e Yoane. 14 Ekadabo odimi soti mobalo mbi, Yoane, adi mbaeli o Ndjakomba Elia yona oboanaka bodua. 15 Kina boo yona odi na matoi ma booka aoke!

16 «Nadi bokokanedja bato ba busa bu na nda? Bakokani mɛnɛ na bana bakɛkɛ i badi ta polo e bhuda, badaka bogama bamɔti na bakina: 17 "Lohueyaka piololo, endolo obwitini! Loembeani ndjembo i ndjokwa, endolo oyeitini!" 18 Tengasa, ta ehole eduaka Yoane, aiyaka ko aimwaka, obalakani: "Adi na mwembo mobe!" 19 Endolo Mwana o Moto adoi, ayaaka ko amwaaka, obalini: "Endjani moto iyo alumi na ekpaka e boyaka ko bomwaka mana, mopalani o baputedji baputi, na bato ba gala ibe!" Endolo misala mi djebeli mikainedje boo djebeli e Ndjakomba edi soti.»

20 Na bea Yesu aimeka boosa mɛnɛ mabonga imia makɔkɔ yo midjɔ mi ngindola, tine boo bato ngando imina baipalaka bosɔmbɔtɔnɔ milema. Ko abalaka: 21 «Ndjokwa e wɛ Koladji! Ndjokwa e wɛ Betesaida! Tengasa ekada boo bingengo bi ngindola ibikɔmɔkɔ ta tei e bino, bikɔmɔkɔ ta ibonga i Tula na ta Sidona; ka bato ba ibonga imina, bapalaka bosɔmbɔtɔnɔ milema ehele, na bolwa minyuku, na bosasuowa mihulu ta melo*. 22 Na tina emina, nabalaka na nu, ta busa bo esambi, etumbo e mabonga ma bino ediabi epipo bonɔ etumbo e mabonga ma Tula ko Sidona. 23 Ko wɛ, Kapalanauma, olɛdji boo osangɔdjɔbi mbunoko ta busa? Ngasa! Otitedjamabi mbunoko ta ngando i bago. Tengasa eseda boo bingengo bi ngindola ibikɔmɔkɔ adi no, bikɔmɔkɔ ta mabonga ma Sɔdɔmɔ ko Gomola; mabonga mamina makɔkɔdaa mbunoko busa bu. 24 Na tina emina, nabalaka na nu, ta busa bo esambi etumbo e mabonga ma bino, edabi epipo bonɔ etumbo e Sɔdɔmɔ na Gomola.»

25 Oko ta ehole emina, Yesu abalaka: «Oo! Sesa, Kumu o busa na kpɔtɔ, nokumedji! Tine boo obombi midjɔ mii adi bato badjebeli ko adi bato ba mawɛi, endolo ominedji adi bana bakɛkɛ*. 26 Ee, Tata, osepaka boo ekɔme oko bea.

27 «Sange e mbi apani leka losusu ta mɔmɔ ma mbi. Pɛ moto odjebi Mwana dongedja oko Sesa; pɛ moto odjebi Sasa emitidaa oko Mwana ko bato bia bapalaka yo bobainedja Sesa.

28 «Duani adi mbi, ino basusu baembɛi na mandi ko nopakeni iheme. 29 Tombani mosongo mo mbi ko kinani olehameni na mbi, tengasa nadi moto o bodhongo ko na bosatitedja, odiabini iheme ta milema mi bino. 30 Mosongo mo mbi moditi na saya ko mandi mapalaka mbi bolwadjani madi mahahanu.»