1 Ta ehole ebatamaka bo na Yelusalɛmɛ, baimeaka mbuti na ngando e Betepasa, ta ikoli i olipa, Yesu alomaka boso batingami babae. 2 Abalaka na bu: «Kɛni ta ngando yena edi boso bo bino.Wataneakeni ena mwana o tito okabeebo ane, atingi ko na nange e nde. Tingoani ko duani na bu adi mbi. 3 Ekadabo babali na nu modjɔ momɔti, sɔmbedjani: "Kumu adi na posa na yu." Na mbala emɔti baekinake bokɛ.»

4 Meako mimina mikɔmɔkɔ tine bokokedja mibalo mi mbaeli o Ndjakomba:

5 «Balani na moseka o Siona:

Endja, mokondji o wɛ adoi adi wɛ,

alumi na bomwii diko i tito,

tito okabeebo ane*.»

6 Batingami bakɛkɛ ko bakɔkɔ oko moda mobalaka Yesu na bu. 7 Bamolwɛkɛ mwana o tito okabeebo ane ko na nange e yu, bandaka bisendja diko i yu ko Yesu abakamaka diko i yu. 8 Ta tei e emumu e bato, bamɔti baandaka bisendja bi bobo na ndjea, bakina babukaka bitape bi mele ko babiandaka ta ndjea.* 9 Bato ibadalaka boso bo Yesu ko na bia ibamokimanaka, badaka bogama:

«Ekumu adi Mwana o Dapiti!

Kina boo Ndjakomba adjongwoe

Yona odoi na kombe e Kumu!

Ekumu adi Ndjakomba yona odi diko i losusu!»

10 Ehole ekweaka Yesu ta Yelusalɛmɛ, bato basusu bakamoaka ko baimeaka bohɔdjɔ: «Moto iyo adi nda?» 11 Emumu e bato basɔmbedjaka: «Edi mbaeli Yesu, moto o Nasaleta e Galilea!»

12 Yesu akweaka ta tepelo ko abenganaka bato basusu ibatɛkɛkɛ kaoko ibasombaka leka ta polo emina; adumbakaka mesa i bato bia badaka bosɔmbɔtɔnɔ palanga i mombongu ko bidie bi batɛki ba bimbenga. 13 Na bea abalaka na bu: «Ekomama: "Ndako e mbi ebeamabi ndako e miongɔnɔ." Endolo ino oimedjini ndako e baibi*!» 14 Bato bagwa miso ko bato ba mitɛngu babatamaka mbuti na Yesu ta bopango bo tepelo ko abaheledjaka. 15 Bakondji ba banganga ba Ndjakomba ko balehi ba mobeko baokaka kɛlɛ, ta ehole enɛkɛbo misala mibokamoa imikɔkɔ yo ko na bana ibagamaka ta tepelo: «Ekumu adi Mwana o Dapiti!» 16 Na bea babalaka na Yesu: «Wokaka midjɔ mabalakabo?» Yesu abasɔmbedjaka: «Okobea, oipakalangani ikomi di ikomama ta mokanda: "Donga ta minɔkɔ mi bana, edae ibanungeakabo mabɛ, okɔi bea bɛngi okumedjame!"» 17 Na bea abakinaka ko aimanaka ta ibonga tine bokɛ ta Betania oho ahwɛkɛ yo.

18 Aya busa, ehole esɔmbɔkɔbo ta ibonga, Yesu aokaka ndja. 19 Aenɛkɛ mole mo pigi ta yɔngɔ e ndjea ko abatamaka mbuti na yu, endolo ataneaka oto kasa. Na bea abalaka na mole: «Obotetebi naikina mbuma!» Na mbala emɔti, mole mokakanaka. 20 Aenɛkɛ batingami bea, balumaka nabokamoa mɛnɛ. Bahɔdjɔkɔ Yesu: «Moda ndani mole mu mokakani na mbala emɔti?» 21 Yesu abasɔmbedjaka: «Nabalaka na nu, edi soti: okadani na bodima ko omiti daa na kitɛ ta milema mi bino, oboanani bokɔ meako misakɔ mbi ta mole mu mo pigi. Endolo oboanini bobala nongo na ikoli dii: "Donga ya ko sadumba ta duwa", ko ekɔmɔbi oko bea. 22 Okadimani, oboanini bodia losusu lohɔdjɔkɔbino ta miongɔnɔ.»

23 Yesu akweaka ta bopango bo tepelo ko abangaka boleha. Bakondji ba banganga ba Ndjakomba ko basuku ba bayuda babatamaka ko bahɔdjɔkɔ Yesu: «Na bokondji bo nda bakɔkɔ na wɛ meako mi? Opi enɔi emina nda?»

24 Yesu abasɔmbedjaka: «Mbi pongono napalaka nohɔdjɔkɔni ihɔdjɔ imɔti. Ekadabo osɔmbedjinini kɔpi, mbi pongono notɔndeakeni na bokondji ndani bakɔkɔ na mbi meako mi. 25 Olomaka Yoane aine nda? Edi Ndjakomba kaoko bato?» Endolo baimeaka bosabaleana ko babalaka: «Ekadabo losɔmbedji: "Edi Ndjakomba moto omoloma," alohɔdjɔke: "Tina ndani oidimeani Yoane?" 26 Endolo lokabala: "Edi bato bamoloma," loboani bobanga bato, tengasa bato basusu balɛnɛkɛ boo Yoane adaka mbaeli o Ndjakomba.» 27 Na bea, basɔmbedjaka Yesu: «Lotadjebaka.» Ko Yesu asɔmbedjaka pongono: «Mbi pongono nitotɔndeakeni na bokumu bo ndani bakɔkɔ na mbi meako mi.»

28 Yesu abalaka: «Olɛdjinibo na modjɔ mu? Tata omɔti adaka na bana babae bami. Abeaka o boso ko abalaka na nde: "Mwana o mbi, kɛ busa bu bosala ta gbie e vino." 29 Mwana omina asɔmbedjaka: "Ngasa, natabɔngɔ bokɛ." Endolo ngɔngɔ asɔmbɔtɔnɔkɔ malɛi, akɛkɛ ta gbie e vino. 30 Tata abalaka oko mondumba momɔti adi mwana okina. Mwana omina o babae amosɔmbedjaka: "Okobea, tata, nakɛke." Endolo aikɛ. 31 Ta ndanda e bobo babae okɔ bolulea bo sange e moto nda?» Bamosɔmbedjaka: «Mwana o boso.» Yesu abalaka na bu: «Okobea, nabalaka na nu edi soti: Baputedji baputi ko bali ba ndukeli bakweake ta Bokumu bo diko. 32 Tengasa Yoane Mobatisi aduaka adino boinedjani ndjea e bodjo endolo ino oimodimeani; enakobea baputedji ba puti na bali ba ndukeli bamodimaka. Nongo aenɛno meako mimina misusu, endolo oisɔmbɔtɔnɔni milema mi bino ko oimodimeani.»

33 «Okani isɛ ikina: Edaka na moswa ndako omɔti aonaka gbie e vino, aehikaka na ihiko, akɔkɔ ekamoelo e mbuma i vino e ibanga ta gbie e nde, apikaka egbili oho, aekineaka basali baeputele ko akɛkɛ ta mwɛngɔ. 34 Ehole e bobuka mbuma eimeaka, alomaka basali ba nde adi basali ibaputelaka gbie e vino e nde, bɛngi adie i nde ibondo. 35 Endolo basali ba gbie e vino bapeaka basali ba nde, babomaka omɔti, baowaka okina ko baowaka o basato na mabanga. 36 Na bea moswa gbie alomaka basali bakina, bonɔ motuya mo basali ba mbala e boso. Endolo basali ibaputelaka gbie e vino e nde babanɔngedjaka oko mondumba momɔti. 37 Suka suka abalomeaka mwana o nde omɔti na ilɛi boo: "Baboani boda na isuma tine mwana o nde!" 38 Endolo ehole enɛkɛ basali ibaputelaka gbie e vino mwana, basabaleanaka: "Endjani mosangoi! Lokɛni, lomowoe ko loimeake baswa gbie!" 39 Na bea bamopeaka, bamodumbaka sokolu e gbie e vino ko bamowaka. 40 Okani bopele: ehole ehulabi moswa gbie e vino, ekɔbi yo na baputeli bia ba gbie nde?»

41 Bamosɔmbedjaka: «Aowabi napɛ ndjokwa basali babe bamina ko apabi gbie e vino adi basali bakina, ibamopabi ibondo i mbuma ta ehole eboani.»

42 Na bea Yesu abalaka na bu: «Oipakalangani eka ekomama?

"Ibanga idumbaka batongi ba ndako

Imei ikwee ipeli ndako.

Kumu akɔɔ bea,

Edi modjɔ mo bokamoa tina e biso*!"»

43 Na tina emina,Yesu abalaka: «Ndjakomba adongedjake Bokumu bo nde adino ko abopabi adi ekomi yena ebotakabi mbuma. [ 44 Moto yona okwakabi diko i ibanga dii, abukeanakabi; ko moto yona ibanga ikwabi diko i nde, amineanabi*.]»

45 Ngɔngɔ iboka masɛ mamina, bakondji ba banganga ba Ndjakomba ko na bapalusai basipoaka boo Yesu abalaka na bu. 46 Na bea bahombaka ndjea e bopea Yesu, endolo babangaka bato; tengasa bato banɛnɛ badaka badimaka boo Yesu adi mbaeli o Ndjakomba.