1 «Na bea Bokumu bo diko bodabi elenge baseka bali domi bia batombaka milinda ko boimana tine bokɛ ta bosakana na momi o moki. 2 Batano ta tei e bobo badaka pɛ bosaboanedja ko batano bakina badaka ba bowɛi. 3 Bia ibadaka pɛ bosaboanedja batombaka milinda mi bobo endolo bailɛdjɛ botomba moomunɛ. 4 Endolo bia ibadaka na bowɛi batombaka milinda mi bobo ko na milangi mi minɛ tine milinda mi bobo. 5 Elenge momi o moki ayeyoakayo, baseka bamina basusu miso ma bobo maimeaka mandi na hiyɔ ko bahwɛkɛ. 6 Ta ndanda e bulu, kilingo eokamaka: "Endjani momi o moki! Imani tine bosakana na nde!" 7 Na bea baseka bali basusu basisoaka ko babɔngedjeka milinda mi bobo. 8 Baseka batano ibadaka pɛ bosaboanedja bahɔdjɔkɔ bia ba bowɛi: "Lopani moomunɛ o bino, tengasa milinda mi biso midoi adimei!" 9 Baseka bali ba bowɛi basɔmbedjaka: "Ngasa, motakoka tine biso ko na nu. Enɔi na bopele okeni ta djando bosomba tine bino." 10 Yana adaka bo bakɛ bosomba munɛ, endolo oko ta ehole emina, momi aimeka. Baseka bali batano ba bowɛi bakweaka na momi o moki ta ndako e tɛkɛ ebɔngedjabo tine moki ko badipaka ekukɛ na pongola. 11 Ngɔngɔ i moehole, baseka bali ibadaka pɛ bosaboanedja bahulaka ko babalaka: "Kumu, kumu, lodipoa!" 12 Endolo momi o moki abasɔmbedjaka: "Edi soti, nabalaka na nu: natodjebakani." 13 Yesu abakeaka, pɛ bohwɛni, tengasa otadjebakani isu, kaoko ehole.»

14 «Bokondji bo diko bodabi pongono elenge momi omɔti yona, opalaka bokɛ ta mwɛngɔ: abeaka basali ba nde ko abapaka misala mi bobanea bodieli bo nde. 15 Apaka adi omɔti taleta mikama mitano, adi okina mikama mibae, adi obasato mokama: bokokana na ngulu e moto na moto. Ngɔngɔ akɛkɛ. 16 Mosali yona odiaka taleta mikama mitano akɛkɛ mbala emɔti bokɔ mombongu na bodieli bomina ko abakeaka mbuka e mikama mitano mi taleta mikina. 17 Mosali yona odiaka taleta mikama mibae akɔkɔ oko moda momɔti ko abakeaka mikama mibae mi taleta mikina. 18 Endolo yona odiaka taleta mokama akɛkɛ bolongea mombɔndɔ ta kpɔtɔ ko abombaka taleta e kumu o nde.

19 «Ngɔngɔ i masu mayai, kumu o basali ahulaka ko bamopɛ gala e bodieli bo nde. 20 Mosali yona odiaka taleta mikama mitano abatamaka ko aimedjaka mikama mitano mi taleta imibolodjakayo ko abalaka: "Kumu, opakani taleta mikama mitano, endja nabakei naikina mikama mitano mi mbuka: djodji." 21 Kumu o nde abalaka: "Bopele, odi mosali mopele ko o bodjo. Elenge adi wɛ mosali o bodjo ta leka lokɛkɛ, nopake lokina lonɔi na bonɛnɛ. Dua asepe na mbi." 22 Mosali yona odiaka taleta mikama mibae abatamaka ko abalaka: "Kumu, opakani taleta mikama mibae. Endja nabakei, naikina mikama mibae mi mbuka: djodji." 23 Kumu o nde abalaka na nde: "Bopele! Mosali mopele ko o bodjo. Elenge adaki wɛ bodjo ta leka lokɛkɛ, nopakedea mosala mo bobanea leka lonɛnɛ. Dua asepe na mbi." 24 Ta suka, mosali yona odiaka taleta mokama abatamaka ko abalaka: "Kumu, noodjebaka elenge moto o bobila: okabuke ta polo edaa wɛ pɛ boona, okandoe ta polo edaa wɛ pɛ bomɛsɛ kona. 25 Nadaka na bɔɔ ko nakɛkɛ bombomba taleta e wɛ ta kpɔtɔ. Endja yo iye, tomba taleta e wɛ!" 26 Kumu o nde abalaka na nde: "Mosali mobe, emɛli! Odjebaka boo nakabuke ta polo edaa mbi pɛ bona, nakandoe ta polo edaa mbi pɛ bomɛsɛ kona; 27 na bea tina ndani okɛiti boisa palanga e mbi adi bato bakabombe palanga ko ta ihule i mbi, nakɔki tomba palanga imina na mbuka. 28 Mokatoani taleta emina ko epani adi yona odi na koto. 29 Tengasa moto odi na eka bamobakeabi na bonɔ ko aimeakabi na leka lonɛnɛ; endolo adi yona odi pɛ eka, bamokatoabi nongo yena edi na nde. 30 Ta tina e mosali mobe yo, modumbani sokolu, ta modidi, oho ta polo e biyo ko bokpɛkɛnɛ mino."»

31 «Ehole eduabi Mwana o Moto ta ekumu e nde engbanga na babwɛndji ba basusu, adabi ta ngbɛndɛ e nde e ekumu. 32 Bato ba bikomi bi ngondo baputoanabi ta boso bo nde ko abakabanabi na bikenge bibae moda mokakabane mobanei bhata na kambeli. 33 Aemeabi bhata ta ebɔ e nde e bami ko kambeli ta ebɔ e nde e bali. 34 Na bea mokondji abalabi na bato ibadabi ta ebɔ e nde e bami: "Duani, ino bato badjongoama na Sange e mbi, asɔni bodieli bo bino bua bodi Bokumu bobɔngedjama na Ndjakomba tina e bino, donga ta mbangi e ngondo. 35 Tengasa nokaka ndja ko opakanini boyaka; nokaka posa e madiba ko opakanini madiba; nadaka mokɛndɛli ko oasɔkɔnini adi no; 36 nadaka mbundu ko olwadjakanini bisendja; nadaka nepeko ko osaowakanini; nadaka ta ndjango ko oduakani ta boendjani." 37 Na bea bato ba bodjo ibakɔkɔ bopala bo Ndjakomba basɔmbedjaka: "Kumu, ehole ndani loenɛkɛ na ndja ko lopaka miya kaoko na posa e bomwaka madiba ko lopaka madiba? 38 Ehole ndani loenɛkɛ mokɛndɛli ko loasɔkɔ adi so kaoko odaka mbundu ko lolwadjaka bisendja? 39 Ehole ndani loenɛkɛ bopeka kaoko ta ndjango ko loduaka ta bokɔmedja?" 40 Ko mokondji abasɔmbedjaka: "Edi soti nabalaka na nu: mbala isusu djikɔkɔno na omɔti yona onɔi na bokɛkɛ ta tei e denga i mbi, ibia badi bato ngasa, djebani bopele boo okɔkɔni bea tina e mbi."

41 «Ngɔngɔ Kumu abalaka na bia ibadaka ta ebɔ e nde e bali: "Kɛni bohali na mbi, ino bato i balakedjama! Kɛni ta ipombe i mosa mo seko mokadae pɛ bodimea, imua mobɔngedjama tina e djabulu ko na babwɛndji ba nde! 42 Tengasa nadaka ndja ko oipanini boyaka; nadaka na posa e bomwaka madiba ko oipanini madiba; 43 nadaka mokɛndɛli ko oiasɔnini; nadaka mbundu ko oilwadjanini bisendja; nadaka na epeko ko ta ndjango, endolo oiduani ta bokɔmedjani." 44 Na bea basɔmbedjaka: "Kumu, ehole ndani loenɛkɛ ndja, kaoko na posa e bomwaka madiba kaoko mokɛndɛli kaoko mbundu kaoko na epeko kaoko ta ndjango, bea loiokɔmedjaka?" 45 Kumu asɔmbedjaka: "Edi soti, nabalaka nu: mbala isusu idaka no pɛ bokɔ adi bia banɔi na bokɛkɛ, djebani bopele boo otakakani bokɔ bea adi mbi" 46 Ko bakɛbi aenɛ saya e seko, enakobea bato ba bodjo bakɛbi ta mohelo mo seko*.»