1 Ehole esidjaka Yesu bopa simbisi imina isusu, abalaka na batingami ba nde: 2 «Djebani boo tɛkɛ e pasika ediki masu mabae bɛngi e bange: Mwana o Moto akabamake ta mɔmɔ ma bato babe bɛngi abakame ta ekulusu.»

3 Na bea, bakondji ba banganga ba Ndjakomba ko basuku ba denga baputoanaka ta ndako e Kaipa, mokondji monɛnɛ o banganga ba Ndjakomba. 4 Batombaka meko bo basusu tine bopea Yesu bɛngi bamowoe ta mbombi. 5 Babalaka: «Lodae pɛ bomopea ta ehole ye tɛkɛ, esakada boo bato balemoe.»

6 Yana adaka Yesu ta Betania, ta ndako e Simo moto o mabha, 7 mwali omɔti abatamaka mbuti Yesu, apeli molangi mo abatele molumake na malasi ma motuya monɛnɛ. Ehole edaka Yesu ta mesa, mwali omina asopeaka Yesu malasi ta molo. 8 Ehole enɛkɛ batingami bea, baokaka kɛlɛ ko babalaka: «Tine bobedja malasi boo nda? 9 Eboanaki botɛkɛ malasi ma mina na motuya monɛnɛ ko bopa palanga adi batakeli!»

10 Ehole enɛkɛ Yesu bea, abalaka na bu: «Tina atungeaka na nu mwali yo nda? Akɔmeini modjɔ mopele. 11 Tengasa odakabini na batakeli bihole bisusu; Endolo mbi, odaetebini na mbi bihole bisusu. 12 Yana asopi yo malasi ta mokuku mo mbi, akɔi bea tine bobɔngedja bosambeama bo mokuku mo mbi ta ikila. 13 Okobea nabali na nu, edi soti: polo isusu ilehakabibo Bwɛndi Bopele bu ta ngondo isusu, batɔndɔkɔbi gala esakɔ mwali yo tine bomolɛdjɛ.»

14 Na bea omɔti ta tei e batingami domi na babae, obeakabo Yudasi Isikaliota, akɛkɛ botanea bakondji ba banganga ba Ndjakomba 15 ko abalaka na bu: «Epalakano bopani nde bɛngi notɛkeeni Yesu?» Bamopaka palanga i bibende tuku isato. 16 Donga ta ehole yena, Yudasi aimeaka bohomba enɔli epele tine bokaba Yesu.

17 Ta isu i boso bo tɛkɛ e mapa mapɛ lepile, batingami baduaka bohɔdjɔ Yesu: «Molehi, apalaka wɛ lobɔngedje mia ma pasika djɔ?» 18 Yesu abasɔmbedjaka: «Kɛni ta ibonga adi moto omɔti ko balani na nde: "Molehi abali: Ehole e mbi eimei, nayake mia ma pasika engbanga na batingami ba mbi adi wɛ."» 19 Batingami bakɔkɔ oko moda mopalaka Yesu ko babɔngedjaka mia ma pasika.

20 Ehole eimeaka mɔmɔkɔ, Yesu adaka ta mesa engbanga na bapɔsɔlu ba nde domi na babae. 21 Ehole edakabo bayaka, Yesu abalaka: «Edi soti okobea, nabalaka na nu: omɔti o bino akabakeni.» 22 Batingami baimeaka na ndjokwa enɛnɛ ko babangaka bohɔdjɔ Yesu, omɔti ngɔngɔ i okina: «Kumu edi mbi?» 23 Yesu asɔmbedjaka: «Moto adubeake engbanga na mbi lipa ta saani, edi yo moto akabakeni. 24 Mwana o Moto akɛke oko elenge ekomama ta tina e nde, endolo ndjokwa na mokabi o Mwana o Moto! Ekɔkida bopele boo moto omina adae pɛ bobotama!» 25 Yudasi, yona opalaka bomotɛkɛ, abalaka: «Molehi, editi mbi, edi bea?» Yesu amosɔmbedjaka: «Obali wɛ.»

26 Yana ayakabo, Yesu atombaka mwɛmbɛ ko ngɔngɔ i bosakoa Ndjakomba, abuki ko api na batingami. Abalaka na bu: «Iye edi mokuku mo mbi, tombani ko yakani.» 27 Atombaka pongono kɔbɔ e vino, ngɔngɔ i bosakoa Ndjakomba, abapaka ko abalaka: «Mwakani no basusu; 28 tengasa iye edi makia ma mbi, makia ma edimaneli, imasopeake tina e bato banɛnɛ, tine boyɛmɛ bo pekato i bobo. 29 Nabalaka na nu: donga edɛdi, namwɛtebi naikina vino iye mbunoko busa bo mwakabi mbi engbanga na nu vino iye eyanie, ta Bokumu bo Sange e mbi.» 30 Ngɔngɔ baembaka ndjembo i tɛkɛ*, bea bakɛkɛ ta makoli ma Olipa.

31 Na bea Yesu abalaka na bapɔsɔlu ba nde: «Oko ta bulu bu, watiakenini no basusu, tengasa ekomama ta makomi: "Nabomake mobanei ko bwela bo bhata inanganake pamba isusu." 32 Endolo ngɔngɔ ibopusoa bo mbi, nakɛke aambani ta Galilea.» 33 Piɛlɛ abalaka na nde: «Molehi nongo bato basusu bakotia, mbi natotiake.» 34 Yesu amosɔmbedjaka: «Edi soti nabalaka na wɛ: oko ta bulu bu, boso bo kɔkɔ akɔkɔle, wainganeakeni mbala isato.» 35 Piɛlɛ abalaka na nde: «Nongo ekada bogwa, nagwake engbanga na wɛ!» Endolo natoinganeake. Bapɔsɔlu basusu babalaka oko moda momɔti.

36 Na bea Yesu aimeaka na bapɔsɔlu ba nde ta polo ebeaka bo Getesemane ko abalaka na bu: «Daani iya, yana akɛi mbi mootɔtɔkɔ tine bongɔnɔ.» 37 Atombaka Piɛlɛ ko bana bami babae ba Djebede. Aimeaka booka ndjokwa ko asatungeaka mɛnɛ ta molema. 38 Abalaka na bu: «Molema mo mbi molumi na ndjokwa elenge nadoi agwa, dikani iya ko ongɔnɔni engbanga na mbi!» 39 Akɛkɛ moohali na bu, atitedjaka boso mbunoko ta kpɔtɔ ko aongɔnɔkɔ boo: «Sange e mbi, ekabɔngɔ, dongedja bohali na mbi kɔbɔ ye e saya! Enakobea, edae tebopala bo mbi, endolo bopala bo wɛ!» 40 Asɔmbɔkɔ naikina ta polo edaka bapɔsɔlu basato ko abataneaka bahwɛli. Abalaka na piɛlɛ: «Ohɔnɔkitini boda mosu engbanga na mbi nongo ehole emɔti? 41 Daani mosu ko ongɔnɔni asakwani ta bomekama. Mwembo modi na ngulu, endolo mokuku modi na bwɛmbu.»

42 Mbala e babae, asasuaka naikina mootɔtɔkɔ ko aongɔnɔkɔ boo: «Sange e mbi, oboaniti okɔe boo nadae pɛ mwaka kɔbɔ ye! Endolo kina bolulea bo wɛ bokɔme!» 43 Asombɔkɔ naikina adi bapɔsɔlu ko abataneaka bahwɛli; tengasa miso maimeaka mandi na hiyɔ. 44 Yesu abakinaka naikina, asasuaka mootɔtɔkɔ ko aongɔnɔkɔ mbala e basato oko na mibalo mibalaka yo boso. 45 Ngɔngɔ asɔmbɔkɔ adi bapɔsɔlu ko abalaka na bu: «Ohwɛlini oko, odini oko ta bohema? Edɛdi ehole eimei ko Mwana o Moto adoi akabama ta mɔmɔ ma bato babe. 46 Angɔni, lokɛni! Tengasa moto akabakeni aimei mbuti!»

47 Yana adaka Yesu bobala Yudasi, omɔti o batinagami domi na babae aimeaka. Bato banɛnɛ bapeli mipata ko na mihukuku badaka bomokimana. Bakondji ba banganga ba Ndjakomba ko basuku ba ngando ba bayuda babalomaka. 48 Yudasi yona opalaka botɛkɛ Yesu, abainedjaka embete ye: «Moto wabhimbake mbi, edi yo. Mopeani.» 49 Mbala emɔti, Yudasi asabateaka mbuti na Yesu ko abalaka na nde: «Ndese, Molehi!» Ko amobhimbaka. 50 Yesu amosɔmbedjaka: «Mwange e mbi, modjɔ modoi wɛ akɔ, mokɔɔ.» Na bea bato bamina babatamaka mbuti na Yesu, bakwaka diko i nde ko bamopeaka. 51 Omɔti ta bia badaka na Yesu aninodjaka ebɔ e nde, aihwaka mopata ta igbogbo ko abomaka mosali o mokondji o banganga ba Ndjakomba ko itoi i mosali omina ileneaka*. 52 Endolo Yesu abalaka na nde: «Sɔmbedja mopata mo wɛ ta igbogbo i yu, tengasa bato basusu bakowoe na mopata bagwakabi na mopata. 53 Walɛdjɛkɛ boo naboanakiti bobea Sange e mbi adue bokamoani ko mbala emɔti alomeeni koto domi na babae i babwɛndji bonɔ? 54 Na bea, Makomi maboani bokokedjama moda nda?»

55 Oko ta ehole emina, Yesu abalaka na bato ibaduaka bomopea: «Mbi, etɔmbi mbi bɛngɛ odueni bopeanini na mipata ko na mihukuku? Masu masusu nadaki na nu ta tepelo tine boleha ko oipeakanini. 56 Endolo midjɔ misusu mii midi tine bokokedja mibalo mibalaka ba mbaeli ba Ndjakomba ta makomi.» Na bea batingami basusu bamokinaka ko batiaka.

57 Bato ibapeaka Yesu bakɛkɛ na nde adi Kaipa, mokondji o banganga ba Ndjakomba, oho baputoanaka balehi ba mobeko ko na basuku ba ngando. 58 Piɛlɛ adaka amokimane moobohali mbunoko ta ikanga i ndako e mokondji o banganga ba Ndjakomba. Akweaka ta ikanga i bopango ko adaka engbanga na basindjili tine boendja moda masukeake modjɔ momina.

59 Bakondji ba banganga ba Ndjakomba ko bato basusu ba ibolea inɛnɛ i basuku ba bayuda, bahombaka enɔeli nongo bobe bomɔti tina e Yesu, bɛngi bamolenee etumbo e bogwa. 60 Endolo baiediaka, nongokobea bato banɛnɛ baduaka bopa pundi inɛnɛ ibe tina e nde*. Na bea bato babae baduaka 61 ko babalaka: «Moto iyo abalaki: "Nadi bobuka tepelo ye e Ndjakomba ko boetonga na masu masato.*"» 62 Mokondji o banganga ba Ndjakomba aongɔkɔ ko abalaka na Yesu: «Otasɔmbedjaka nongo kɔpi ta midjɔ mabalaka bato ibi bobe tina e wɛ?» 63 Endolo Yesu adaka oko bogo. Na bea mokondji o banganga ba Ndjakomba abalaka na nde: «Ta kombe e Ndjakomba o bomɔ, nohɔdjɔkɔ olotɔndee: odi Kilito, Mwana o Ndjakomba?» 64 Yesu amosɔmbedjaka: «Wɛ moto obali. Endolo nabalaka na nu: donga edɛdi wenɛke Mwana o Moto bokadaa ta ebɔ e bami e Ndjakomba o sueya; odini boenɛ pongono bodua ta matute ta busa*.» 65 Na bea mokondji o banganga ba Ndjakomba alakaka bisendja bi nde ko abalaka: «Asingi Ndjakomba! Loditi naikina na posa e batemo! Okini no bɛnɛ bosinga bosasingayo Ndjakomba! 66 Alɛdjɛkɛno naikina nde?» Basɔmbedjaka: «Aboani na etumbo e bogwa.» 67 Na bea bamotsueaka masɔi ta boso ko bamɔti bamoindaka mabɔtu, bakina bamobomaka bipapata. 68 Bamotaaka: «Kilito, elɛ bonganga! Osoboma nda!»

69 Ta ehole emina piɛlɛ adaka sokolu ta ikanga i bopango. Mosali mwali omɔti abatamaka mbuti na nde ko abalaka: «Wɛ pongono, odaki engbanga na Yesu, moto yona o Galilea.» 70 Endolo Piɛlɛ ainganaka ta boso bo bato basusu ko abalaka: «Natadjebaka meako mapalaka wɛ bobala na mbi.» 71 Yana adaka Piɛlɛ bokɛ ta pamba e ekukɛ e i kanga i bopango. Mosali okina amoenɛkɛ ko abalaka na bato ibadaka ena: «Moto iyo adaki na Yesu moto o Nasaleta.» 72 Piɛlɛ ainganaka naikina na bobhɛlɛ bhɛli: «Nabalaka soti, natadjebaka moto omina!»

73 Ngɔngɔ i moehole, bato ibadaka ena babatamaka mbuti na Piɛlɛ ko babalaka: «Edi soti, odi omɔti o bobo: moda mabalaka wɛ, moinedjaka pamba edongi wɛ.» 74 Na bea Piɛlɛ asabhɛleaka bhɛli: «Kina boo Ndjakomba apɛni etumbo ekada boo nakosaka! Nasabhɛlei, natadjebaka moto yo!» Oko ta ehole emina, kɔkɔ akɔkɔlɔkɔ., 75 Na bea Piɛlɛ alɛdjɛkɛ mibalo mimobaleaka Yesu: «Boso boo kɔkɔ akɔkɔle, winganeakeni mbala isato.» Aimanaka ko ayeaka mɛnɛ.