1 Ehole etitaka Yesu ta ikoli, emumu e bato emokimanaka. 2 Na bea moto omɔti o mabha aduaka adi yo, akwaka magbundɔ ta boso bo nde ko abalaka: «Kumu, okapala, sɛnodjani!» 3 Yesu aninodjaka ebɔ, apeaka moto o mabha ko abalaka: «Napali, sɛnoa!» Oko ta ehole emina asɛnoaka na mabha ma nde. 4 Yesu abalaka na nde: «Oka bopele: pɛ botɔndea moto. Endolo kɛɛ asinedje adi nganga o Ndjakomba, pa ikabo elenge moda mokoma Mose, tine boo edae tati ta miso ma bato basusu boo oheli*.»

5 Ehole ekweaka Yesu ta ibonga i Kapalanauma, kapitɛne omɔti o basoda aduaka adi yo bosɛngɛ ekamoi. 6 Aongɔnɔkɔ Yesu: «Kumu, mosali o mbi asambi ta ndako, atabɔngɔkɔ nongo bodala ko apekaka mɛnɛ.» 7 Yesu abalaka na nde: «Naduake, amoheledja.» 8 Endolo kapitɛne omina o basoda abalaka na nde: «Kumu, eboaniti boo okwe ta ndako e mbi. Endolo bala oto kɔpi emɔti mosali o mbi ahelake. 9 Tengasa mbi mɛnɛ nadi na se e kpatsi adi bakondji i banɔini ko nadi na basoda ibadi na se i bokondji bo mbi. Nakabala na omɔti "Kɛɛ!" Akɛke; nakabala na okina: "Dua!" Aduake; ko nakabala na mosali o mbi: "Kɔɔ mosala mu!" Akɔke.» 10 Ehole eokaka Yesu mibalo mia, akamoaka ko abalaka na bato ibamokimanaka: «Soti nabalaka na nu: napakini aenɛ moto o edimeli e moda mu ta Isalɛlɛ! 11 Soti, nabalaka na nu boo bato banɛnɛ badongabi ta dɔngɔ ikaime modakabusa, na ikakɛɛ atita modakabusa ko badiabi ndjea e boyaka ta Bokumu bo diko engbanga na Abalayama, na Isaka ko na Djakobo. 12 Endolo bato ibabɔngedjama bokwea ta Bokumu bo diko, badumbamabi sokolu ta modidi, oho bayeabi ko bakpɛkɛnɛbi mino.»

13 Yesu abalaka na kapitɛne o basoda o Loma: «Yana ta ndako e wɛ! Ekɔme adi wɛ boboana na bodima bo wɛ!» Ko mosali o kapitɛne o basoda o Loma ahelaka oko ta ehole yena.

14 Ehole ekɛkɛ Yesu ta ndako e Piɛlɛ, ataneaka bokiyo bo Piɛlɛ asambi, tengasa apekaka na pɛpɛlɛ. 15 Yesu amobakeaka ebɔ ko pɛpɛlɛ esiaka. Na bea angɔkɔ ko aimeaka bomokɔmedja.

16 Yana aimeaka mɔmɔkɔ, baduaka na bato banɛnɛ adi Yesu ibatungeamaka na miembo mibe. Oko na mobalo momɔti, abenganaka miembo mibe mimina ko aheledjaka bato basusu ba bipeko. 17 Na bea ekokedjamaka mobalo mobalamaka na mbaeli o Ndjakomba Isaya:

«Atombi bwɛmbu bo biso

ko aloheledji na bipeko bi biso.»

18 Ehole enɛkɛ Yesu emumu e bato bomohika, apaka ndjea adi batingami ba nde bakatise dɔngɔ ikina i ibeke. 19 Molehi o mobeko omɔti aduaka adi Yesu ko abalaka: «Kumu, mbi nokimanake ta polo isusu djakɛke wɛ.» 20 Yesu abalaka na nde: «Bibanga idi na mapose ko mbulu idi na mopo, endolo Mwana o Moto aditi na polo e bohwɛ ko e bosambea nongo molo.»

21 Okina ta tei e batingami ba Yesu abalaka na nde: «Kumu, pani ndjea napete kɛɛ apusea sange e mbi.» 22 Endolo Yesu amosɔmbedjaka: «Kimanani ko kina bago na bago basapuseane.»

23 Ehole etiteaka Yesu ta bwato ko batingami ba nde bamokimanaka. 24 Gbundumo, lungu epipo ebangaka bokumba ta ibeke ko madiba maimeaka mbuti na bodindedja bwato. Endolo Yesu adaka ahwɛli. 25 Batingami babatamaka mbuti na Yesu ko bamosisodjaka na bogama: «Kumu, loheledja! Lodoi agwa!» 26 Yesu abasɔmbedjaka: «Odini na bɔɔ tina nda? Bato ba edimeli ekɛkɛ!» Na bea aemaka ko agameaka lungu, mbonge ko losusu lopɔpɔnɔkɔ. 27 Bakamoaka ko babalaka: «Moto yo adi mɛnɛ nda, na lungu, na mbonge losusu bomosuma*?»

28 Ehole eimeaka Yesu ta dɔngɔ ikina i ibeke, ta ekenge e mokpɔtɔ mo Gadala*, bami babae baimaka ta ndanda e makila ko baduaka bosakana na nde. Bami bamina batungeamaka na miembo mibe; badaka bato ba bobila ko bato badaka na bɔɔ e bonɔ ta ndjea emina. 29 Bagamaka: «Tina ndani odoi akwea ta midjɔ mi biso, Mwana o Ndjakomba? Odoi iya tine boloyekea boso bo ehole ebɔngedjama?»

30 Enakobea oho bwela bo ngulu* idaka boyaka. 31 Miembo mibe miongɔnɔkɔ Yesu: «Lobengana bohali adi bwela bo ngulu.» 32 Yesu abalaka na miembo mibe: «Imanani!» Miembo mibe mimanaka ko mikweaka ta bwela bo ngulu. Mbala emɔti, bwela bosusu bo ngulu botitaka bodonga ta ikoli mbunoko bodindaka ta duwa. 33 Babanei ba ngulu batiaka; bakɛkɛ ta ibonga bopa gala e meako misusu iminɔmɔkɔ ko moda ndani mohelaka na bato bia i batungeamaka na miembo mibe. 34 Na bea bato basusu ba ibonga baimaka ta bosongana na Yesu. Ehole eimeakabo mbuti na Yesu bamongɔnɔkɔ aimane ta mokpɔtɔ mo bobo.