1 «Pɛ bosambedjani, tine basakosambedja. 2 Tengasa baosambedjabini moda mokasambedjeno bakina. Oko na mwɛngi mokaengɛe na nu bato, boengɛbini oko na mu. 3 Tina ndani waendjaka ebumbu edi ta diso i mwange e wɛ, na bea otaenɛkɛ ibaya idi ta diso i wɛ? 4 Moda ndani oboani bobala na mwange e wɛ: "Mwange e mbi, kina nodongedje ebumbu yena edi ta diso i wɛ", na bea odi na ibaya ta i wɛ diso? 5 Bato bapokotoi, dongedja boso ibaya idi ta diso i wɛ ko waenɛke bohu tine bodongedja ebumbu edi ta diso i mwange e wɛ.»

6 «Pɛ bopani miya masɛnɔke adi mbwa, esakasɔmbɔ tine botswani. Pɛ bodumbani leka lo motuya adi ngulu, tine esakɔmbɔ bodalakaka.»

7 «Sɛngɛni ko bopakeni; hombani ko wadiakeni; bomani ko bodipoakeni. 8 Tengasa moto okahɔdje, bodiaka; okahombe, boenɛkɛ ko okabome ta gbulu, bomodipoaka. 9 Moto ndani ta tei e bino oboani bopa mwana o nde ibanga, ekada boo mwana o nde amosɛngi mwɛmbɛ? 10 Moto ndani oboani bopa mwana o nde ndjɔ ekada boo amosɛngi moswi? 11 Ekadabo ino bato babe, odjebini bopani adi bana ba bino leka lopele, na bea moda ndani Sange e bino yona odi o diko, apɛtebi leka lopele adi bia bamosɛngɛkɛ?»

12 «Misusu mikapaleno boo bato bakina bokɔmeni, ino pongono kɔni bea adi bo, tengasa edi bileho bi mobeko ko na bi ba mbaeli ba Ndjakomba*.»

13 «Kweani ta ekukɛ e embamba, tengasa ndjea yena ebhuda ekalome bato ta ibunga; bato banɛnɛ edi bia bakanɔe na ndjea emina. 14 Endolo ndjea yena e embamba ko e kpɔkɔsɔ ekalome bato ta mohelo; oko bato bakɛkɛ bakaenɛ.»

15 «Daani na engɛlɛ na ba mbaeli ba boloa. Bakadue adi no elenge bhata, endolo ta tei e bobo badi elenge swa ba bobila. 16 Obadjebabini na misala mi bobo. Tebabuke mbuma i vino ta mole mo ndjubɛ, nongo mbuma i pigi ta mole mo ndjubɛ. 17 Mole mopele bobotaka mbuma ipele ko mole mobe bobotaka mbuma ibe. 18 Mole mopele motabota mbuma ibe nongo mole mobe motabota pongono mbuma ipele. 19 Mole mosusu mokadae pɛ bobota mbuma ipele mokwɛlɛmɛbi ko modumbamabi ta mosa. 20 Na bea, odjebabini ba mbaeli ba bolowa na misala mi bobo.»

21 «Editi na bato basusu bakabale na mbi: "Kumu, Kumu", ba ndani bakweabi ta bo Bokumu bo diko. Endolo edi oko yona akɔkɔ bolulea bo Sange e mbi yona odi o diko. 22 Ta busa bo esambi, bato banɛnɛ babalakabi na mbi: "Kumu, Kumu, edi na kombe e wɛ lotɛlɛkɛ; edi na kombe e wɛ lobenganaka miembo mibe; edi na kombe e wɛ lokɔkɔ ngindola inɛnɛ. Otadjebaka"? 23 Na bea nabalakabi na bu: "Natodjebakani; kɛni bohali na mbi, ino bakɔmeli ba mabe!"»

24 «Na bea, moto mosusu oki mibalo misabala mbi ko amisi ta mosala aboani na moto obowɛi yona otonga ndako e nde ta diko i ibanga. 25 Mbuwa ekwaka, pela eduaka, lungu epipo ekumbaka ta ndako, endolo eikwaka, tengasa moboko mo yu mopikamaka ta diko i ibanga. 26 Endolo moto mosusu yona oki mibalo misahula mbi abala ko amiti misa ta mosala adabi elenge endanga yona etongaka ndako ta diko i mbume. 27 Ehole ekwaka mbuwa, pela eduaka, lungu epipo ebomaka ndako ko ekwaka: ko ndako emina ebukeana esusu.»

28 Ehole esidjaka Yesu bobala mibalo mi nde, bato basusu bakamoaka na moda mo boleha bo nde. 29 Tengasa ailehaka elenge balehi ba mobeko, endolo abalehaka na kpatsi.