1 Ngɔngimina, Mwembo mo Ndjakomba modaledjaka Yesu ta e etengelenge bɛngi amekame na djabulu. 2 Ngɔngɔ ibokia boyaka masu tuku inɛi ko mulu tuku inɛi, Yesu aokaka ndja. 3 Djabulu, mokosi, abatamaka mbuti na nde ko abalaka: «Soti okada Mwana o Ndjakomba, bala na mabanga mi mahombane miya.» 4 Yesu asɔmbedjaka: «Ekomama: "Moto atahela oto na miya, endolo na mobalo mosusu mokime ta monɔkɔ mo Ndjakomba*."»

5 Na bea, djabulu amodaledjaka mbunoko Yelusalɛmɛ, ibonga isɛnɔke, amobakeaka ta sɔngɔ e Tepelo. 6 Abalaka na nde: «Soti okada Mwana o Ndjakomba, sadumba na se; tengasa ekomama:

"Ndjakomba apabi ndjea adi babwɛndji tina e wɛ,

ko bokabi na mɔmɔ ma bobo,

tine boo eko e wɛ, esakataa ibanga."»

7 Yesu amosɔmbedjaka: «Ekomama pongono: "Oboaniti bomeka Kumu, Ndjakomba o wɛ*."»

8 Djabulu amotombaka naikina ta sɔngɔ e ikoli, amoinedjaka makumu masusu ma ngondo ko na ekumu e yu. 9 Ko abalaka na nde: «Nopake losusu, ekadabo okwi magbundɔ tine bokumeani.» 10 Na bea Yesu abalaka na nde: «Donga ena, djabulu! Tengasa ekomama: "Odi bokwa magbundɔ oko adi Kumu Ndjakomba o wɛ ko ongɔnɔ oko yo pɛ."» 11 Djabulu amokinaka. Ko babwɛndji baduaka mbuti na nde, tine bomokɔmedja.

12 Ehole eokaka Yesu boo baisi Yoane Mobatisi ta bɔlɔkɔ*, asɔmbɔkɔ ta Galilea. 13 Endolo akinaka Nasaleta, akɛkɛ boda ta Kapalanauma, ibonga idaka mbuti na ibeke inɛnɛ i Galilea, ta mokpɔtɔ mo Djabilɔ ko na Nepetali*. 14 Ekɔmɔkɔ bea tine bokokedja mibalo mi mbaeli o Ndjakomba Isaya:

15 «Mokpɔtɔ mo Djabilɔ, mokpɔtɔ mo Nepetali,

ngando i mbuti na ibeke inɛnɛ, ngando i pamba e Yolodane:

ngando i Galilea i bakɛndɛli!

16 Bato ibahelamaka ta modidi,

Baeni bohu bonɛnɛ!

Tina e bia ibahelamaka ta modidi,

Soti baeni bohu!

Tina e bia bahelamaka ta ngondo e bago,

He, bohu bonɛnɛ boenɛmi! *»

17 Donga ta ehole emina, Yesu abangaka bodumbea ko abalaka: «Hombedjani milema mi bino, tengasa Bokumu bo diko boimei mbuti!»

18 Yana adalaka Yesu ta yɔngɔ e mokula mo ibeke i Galilea, aenɛkɛ bange i bato babae ibia badaka baoweli ba swi: Simo obakeabo Piɛlɛ ko Andele mwange e nde. Ibo badaka badumba modjanga ta ibeke. 19 Yesu abalaka na bu: «Kimananini ko noimedjeni bahombi ba bato.» 20 Oko ta ehole emina, bakinaka midjanga mi bobo ko bamokimanaka. 21 Ehole edalakayo moohali na bu, aenɛkɛ bakina menga bami babae, Djake ko Yoane, bana ba Djebede. Badaka ta bwato bo bobo na Djebede, sange e bobo, bobɔngedja midjanga mi bobo. Yesu ababeaka 22 oko ta ehole emina, bakinaka bwato bo bobo, sange e bobo ko bakimanaka Yesu.

23 Yesu adaka bodala ta mokpɔtɔ mo Galilea mosusu; boleha ta ba sinagoga i bobo, botɔndɔ Bwɛndi Bopele bo Bokumu bo diko ko boheledja bato na biego ko na bitumbɛ basusu. 24 Na bea gala e nde enanganaka ta ngondo e Sulia esusu ko bamolwɛkɛ bato ba bipeko bi tungu isusu ko bego i tungu isusu: bato ba miembo mibe, bato bamasiesie ko na bato ibabukeanaka mako. Na bea Yesu adaka bobaheledja. 25 Emumu e bato emokimanaka; bodonga ta mokpɔtɔ mo Galilea, donga ibonga i Dekapole, i Yelusalɛmɛ, na mokpɔtɔ mo Yuda ko mo pamba e Yolodane.