1 Oko ta ehole emina, Yesu anɔkɔ ta gbie e mbuma i bule ta busa bo Sabata. Batingami ba nde baokaka ndja; babangaka bobuka mingbɔndu mi mbuma i bule ko bayakaka. 2 Ehole enɛkɛ bapalusai bea, babalaka na Yesu: «Endja, batingami ba wɛ bakɔkɔ modjɔ mosiama na mobeko mo biso bokɔ ta busa bo Sabata*!» 3 Yesu abasɔmbedjaka: «Olangitini modjɔ mokɔkɔ Dapiti na bato ba nde ehole eokakabo ndja? 4 Akweaka ta ndako e Ndjakomba yo na bato ba nde ko bayaaka mapa mabɔngedjama tina e bopa Ndjakomba. Enakobea bokimana mobeko, oko banganga ba Ndjakomba badaka na enɔi e bomayaka endolo te bato bakina. 5 Na bea, oipaka langani ta mobeko mo Mose boo, ta isu i sabata, banganga ba Ndjakomba bia bakasale ta tepelo te babedjake mobeko mo sabata? Endolo bakɔiti bobe. 6 Na bea, nabalaka na nu, edi ya na moto omɔti odi monɛnɛ bonɔ tepelo! 7 Ekadabo osipoini tingo e mibalo mi: "Nakasepe bonɔ na molema mo ndjokwa endolo te mbeka i tito*", oboanitini bosambedjani moto odɛi pɛ bokɔ bobe. 8 Tengasa Mwana o Moto adi mokondji o sabata.»

9 Ngɔngɔ Yesu adongaka ta polo emina, akɛkɛ ta sinagoga i bobo. 10 Edaka ena na momi omɔti o ebɔ eondɔke. Bapalusai bahɔdjɔkɔ Yesu: «Mobeko mo biso mopaka enɔi eboheledja bato ta busa bo Sabata?» Edaka tina ebohomba ndjea e bomopunda. 11 Yesu abasɔmbedjaka: «Ekada na moto omɔti ta tei e bino, adi oko na bhata omɔti ko bhata omina akwi ta mombɔndɔ mombɛngɛ ta busa bo sabata, aboaniti bokɛ tine bomoimedja? 12 Enakobea moto anɔi bhata na motuya! Na bea, epami enɔi bokɔ bopele ta isu i sabata.» 13 Na bea, abalaka na moto omina: «Ninodja ebɔ e wɛ.» Aeninodjaka ko eimeaka bopele elenge ekina. 14 Bapalusai baimaka ko batombaka meko tina ebohomba ndjea e bowa Yesu.

15 Ehole eokaka Yesu bea, adongaka ta polo emina ko emumu e bato bamokimaka. Aheledjaka bato babipeko basusu, 16 endolo abasiaka na bopipo boo badae pɛ bobala isolo idi ta tina e nde. 17 Akɔkɔ bea tine bokokedja mibalo mi mbaeli o Ndjakomba Isaya:

18 «Endjani mosali o mbi, yona ohɔ mbi, mopalani o mbi,

yona okapale mbi ko nakasepe na nde.

Naisabi Mwembo mo mbi adi yo

ko aisakabi bodjo ta mabota.

19 Asingetebi moto ko agametebi,

ko moto aoketebi moholi mo nde ta ndjea inɛnɛnɛ.

20 Abuketebi mososongo i moimbama ehele

ko adimetebi esendja e molinda yena eimei boimedja mididi.

Akɔkɔbi bea mbunoko bodjo bolonge.

21 Na bea bikomi bi bakɛndɛli bisusu biisabi ndingo ta kombe e nde.»

22 Na bea baduaka na moto omɔti odaka na miso mago ko emimi tine adaka na mwembo mobe. Yesu aheledjaka momi omina, na bea moto odaka pɛ bobala aimeaka bobala ko boenɛ bohu mɛnɛ. 23 Bato basusu bakamoaka ko babalaka: «Iyo te mwana o Dapiti?» 24 Ehole eokaka bapalusai bea, babalaka: «Moto yo abenganaka miembo mibe na bokondji bo Bɛlɛdjɛbulɛ mokondji o bobo amopaka suweya!» 25 Endolo Yesu adjebaka yo malɛno ma bobo; abalaka na bu: «Bokumu bosusu bokasanedje suka e bu, bosakabanaka. Ko makumu masusu kaoko ndako isusu djia ikadae bato pɛ bookana, iboaniti boyeyoa. 26 Ekada Satana abengani Satana, asanedjaka yo mɛnɛ; bokondji bo nde bodi boyeyoa? 27 Ekadabo mbi nakabengane miembo mibe na bokondji bo Bɛlɛdjɛbulɛ; okapɛ bana ba bino bokondji bo bobengana miembo mibe nda? Na tina emina, bo bɛnɛ badabi badjudji ba bino! 28 Ta bosoti mɛnɛ, ekada boo na ndjea e kpatsi e Ndjakomba nabenganaka miembo mibe, etingodji boo Bokumu bo Ndjakomba boimei adi no.»

29 «Moto aboaniti bokwea ta ndako e moto o ngulu ko bokatoa leka lo nde, amakini nanga boso moto o mina mbɔti; ngɔngɔ aboani bokatoa leka losusu lo nde lo ndako. 30 Moto odi pɛ boda engbanga na mbi adi moloni o mbi ko yona odi pɛ boputoana na mbi, akananganedje. 31 Na tina emina, nabalaka na nu: pekato isusu ko masingi masusu makasingebo Ndjakomba mayɛmɛbi, endolo okasinga Mwembo Mosɛnɔke, oyɛmetebi. 32 Moto obalakabi bobe tina e Mwana o Moto, ayɛmɛbi; endolo moto obalakabi bobe tina e Mwembo Mosɛnɔke, ayɛmetebi nongo ta ngondo ye, nongo ta ngondo yena eduake.»

33 «Bɛngi odae na mbuma ipele, etungi odae na mole mopele; okada na mole mobe, wadiake mbuma i be. Tengasa bakadjebe mole na mbuma i mu. 34 Pako e ndjɔ! Odini bato babe! Oboanini bobala meako mipele? Tengasa monɔkɔ bobalaka meako mikadonge ta molema. 35 Moto mopele bodiaka meako mipele ta molema mo nde mopele; moto mobe bodiaka meako mibe ta molema mo nde mobe. 36 Nabalaka na nu: ta isu i esambi, bato badiabi iputi ikɔpi isusu ipɛ tina ibalakabo. 37 Tengasa edi na mibalo mi wɛ mɛnɛ miolongedjabi ko edi na mibalo mi wɛ mɛnɛ miosambedjabi.»

38 Na bea ekenge e balehi ba mobeko ko na bapalusai babalaka na Yesu: «Molehi, lapalaka boenɛ okɔe embete e ngindola ta pamba e wɛ.» 39 Yesu abasɔmbedjaka: «Bato ba ehole ye badi bato babe ta miso ma Ndjakomba! Bahɔdjɔkɔ embete e ngindola? Endolo baenɛtebi embete ekina e ngindola oko yena e mbaeli o Ndjakomba Yona. 40 Enakobea, moda momɔti Yona ayeyoaka masu masato ma moi ko masu masato ma bulu ta sɔpɔ i moswi monɛnɛ, oko moda momɔti Mwana o Moto ayeyoabi masu masato ma moi ko masu masato ma bulu ta molema mo kpɔtɔ. 41 Bato ba ibonga i Niniwe basongɔdjɔbi ta busa bo esambi ko bapundabi bato ba ehole ye. Tengasa ibo baisɔmbɔtɔnɔ milema mi bobo elenge alehaka Yona. Enakobea edi iya na moto omɔti onɔi Yona! 42 Ta isu i esambi, kumu mwali o satina asangɔdjɔbi ta boso bo bato ba ehole ye ko abapundabi, tengasa adongaka bohali ta mabonga ma ngondo tine bodua ta booka djebeli e Salomo. Enakobea edi ya na moto omɔti onɔi Salomo!»

43 «Ehole eimi mwembo mobe adi moto, mokɛi ko mokada ta etengelenge tabohomba polo e boda. Ekadabo amitidia polo e boda, 44 na bea mosabalei: "Nadoi asɔmbɔ ta ndako e mbi, yena eimaka mbi." Mohuli, motanei ndako bwase, eombɔmɔke ko ebɔngedjamake bopele. 45 Na bea asɔmbɔke botomba naikina miembo sambo iminɔi na bobe; masɔmbɔke ta ndako ko madikamake oho. Moda mo moto omina moimeake naikina bobe bonɔ moda modaka yo boso. Ko edabi moda momɔti tine bato ba ehole ye.»

46 Yana abalaka Yesu na emumu e bato, bange i nde ko na nange e nde baduaka. Baemaka sokolu ko bohombaka bosoola na nde. 47 Moto omɔti abalaka na Yesu: «Nange e wɛ ko bange i wɛ baemi sokolu ko badi na posa e bosoola na wɛ.» 48 Yesu amosɔmbedjaka: «Nange e mbi ko bange i mbi ba nda?» 49 Yesu ainedjaka ebɔ adi batingami ba nde ko abalaka: «Endjani, nange e mbi ko bange i mbi ibo bi. 50 Tengasa yona akɔkɔ bolulea bo Sange e mbi yona odi o diko adi mwange e mbi, ngɛnɛ e mbi kaoko nange e mbi.»