1 Yesu abotamaka ta Bɛtɛlɛmɛ ta mokpɔtɔ mo Yuda, ta ehole edaka Elode mokondji. Ta ehole emina, banganga ba mawɛi badongaka ta pamba ekime modakabusa baduaka ta Yelusalɛmɛ 2 ko bahɔdjɔkɔ: «Mwana odi mokondji o Bayuda abotami yo djɔ? Loeni mondjɔtɔ o nde boima ta pamba ekime modakabusa ko lodoi amokumedja.» 3 Ehole eokaka mokondji Elode gala emina, molema mo nde motungeamaka mɛnɛ engbanga emɔti na bato ba Yelusalɛmɛ. 4 Aputoanedjaka bakondji ba banganga ba Ndjakomba ko na balehi ba mobeko, abahɔdjɔkɔ: Aboani Kilito bobotama djɔ? 5 Bamosɔmbedjaka: «Ta Bɛtɛlɛmɛ e mokpɔtɔ mo Yuda. Tengasa endja mibalo mikomaka mbaeli o Ndjakomba:

6 "Wɛ, Bɛtɛlɛmɛ, ta tei e mokpɔtɔ mo Yudea,

pɛ bosenɛ ngasa ta tei e mokpɔtɔ mo Yudea,

tengasa edake na wɛ mokondji aimake,

yona adaledjake bato ba mbi, Isalɛlɛ*." »

7 Na bea, Elode abeaka banganga ba mawɛi na mbombi ko ahombaka bodjeba adi bo ehole ndani eimaka mondjɔtɔ. 8 Na bea abalomaka ta Bɛtɛlɛmɛ, abalaka: «Kɛni ahomba soti e meako ta tina e mwana; ko ehole amotaneakeno, djebedjanini, bɛngi mbi pongono, nakɛ amokumedja.»

9 Ngɔngɔ iboka mibalo mi mokondji, bakɛkɛ. Baenɛkɛ naikina mondjɔtɔ yona oimaka ta dɔngɔ ikime modakabusa: bodala boso bo bobo ko aimeaka bo ta polo yena edaka mwana, moemaka. 10 Ehole enɛkɛbo mondjɔtɔ omina, balumaka na mongandi. 11 Bakwɛaka ta ndako ko baenɛkɛ mwana na nange e nde, Malia. Bakwaka magbundɔ tine bokumedja mwana; ngɔngɔ badipoaka bingbongolo bi bobo ko bamobondjeaka makabo: wolo, paka malasi, ko na malasi imakɔbo na mole mo mile. 12 Ngɔngɔ imina, Ndjakomba abatɔndeaka na ndjea e ndjɔti badae pɛ bosɔmbɔ adi Elode; na bea bayanaka ta ngando e bobo na ndjea ekina.

13 Ehole eyanaka banganga ba mawɛi, obwɛndji o Kumu ainɛmɛkɛ na Esepu na ndjɔti ko abalaka na nde: «Angɔ, tomba Mwana engbanga na nange e nde ko tiani ta Edjipito; dikamani oho mbunoko ehole eodjebedjake mbi ohuleni. Tengasa Elode ahombaka bowa mwana.» 14 Esepu aangɔkɔ, atombaka mwana engbanga na nange e nde, ta ndanda e bulu ko atiaka ta Edjipito. 15 Bayeyoaka oho mbunoko bogwa bo Elode. Midjɔ mimina miimeaka tine bokokedja meako mibalaka Kumu na ndjea e mbaeli o Ndjakomba: «Nabei mwana o mbi boima ta Edjipito*.»

16 Ehole esipoaka Elode boo banganga ba mawɛi bamokosei, aimeaka na kɛlɛ enɛnɛ mɛnɛ. Apaka ndjea ebowakaka, ta Bɛtɛlɛmɛ ko ta ngando i mbuti, bobanga bana ba bianga bibae botita; bokimana midjɔ mimotɔndeaka banganga ba mawɛi, ta tina e ehole eimaka mondjɔtɔ. 17 Na bea meako misusu mikokedjamaka elenge abalaka mbaeli o Ndjakomba Yilimeya:

18 «Moholi mokamaka ta Lama,

biyo ko na bosayeana.

Edi Laele ayeaka bana ba nde,

aloni bamopingedje malɛi, tengasa bana ba nde bagwi*.»

19 Ngɔngɔ i bogwa bo Elode, obwɛndji o Kumu asenɛmedjaka na ndjɔti adi Esepu, ta Edjipito. 20 Abalaka na nde: «Angɔ, tomba Mwana engbanga na nange e nde ko yana ta ngondo e Isalɛlɛ, tengasa bato bahombaki bowa Mwana, basi bogwa.» 21 Na bea Esepu aangɔkɔ, atombaka Mwana engbanga na nange e nde ko basɔmbɔkɔ ta ngondo e Isalɛlɛ. 22 Endolo aokayo boo Alikelawusi atitanaka ta polo e sange e nde Elode elenge kumu ta mokpɔtɔ mo Yuda, abangaka boyana. Ndjakomba akebedjaka naikina Esepu na ndjɔti ko akɛkɛ ta mokpɔtɔ mo Galilea. 23 Akɛkɛ bodikama ta ngando e Nasaleta. Ekɔmɔ bea tine bokokedjama bo mobalo mo ba mbaeli ba Ndjakomba: «Abeamake mo Nasaleta.»