1 Ehole eya busa, ta modjukakeli, bakondji basusu ba banganga ba Ndjakomba ko na basuku ba ngando batombaka meko e boowa Yesu. 2 Bamonangaka mbɔti ko bakɛkɛ na nde adi gupɛnɛlɛ Pilato.

3 Yudasi mokabi, aokaka boo Yesu bamoleneaka etumbo e bogwa. Aokaka bokɛsɛdji bonɛnɛ ta molema ko akɛkɛ bosɔmbedja palanga djia i bibende tuku isato adi bakondji ba banganga ba Ndjakomba ko na basuku ba ngando. 4 Abalaka na bu: «Nakɔi pekato, nakabi moto odi pɛ bokɔ bobe ta bogwa!» Endolo bamosɔmbedjaka: «Mo biso nda! Endji wɛ mɛnɛ!» 5 Yudasi adumbaka palanga imina ta tepelo ngɔngɔ akɛkɛ, bosakoma. 6 Bakondji ba banganga ba Ndjakomba baandoaka palanga ko babalaka: «Mobeko mo biso motapaka enɔeli e boisa palanga dji ta nguku e tepelo, tengasa idi palanga i makia.» 7 Ngɔngɔ baputoanaka ikita ko badimanaka boo basombe na palanga imina, gbie adi moyoi o poke, tine boimedja gbie emina ikila i bakɛndɛli. 8 Na tina emina, gbie emina ebeamaka «gbie e makia» mbunoko busa bu. 9 Na bea ekokedjamaka mibalo mi mbaeli o Ndjakomba Yilimeya: «Batombaka palanga i bibende tuku isato, motuya moemeaka bana ba Isalɛlɛ, 10 ko basombaka na yu gbie e moyoi o poke, elenge moda mobaleakani Kumu.»

11 Yesu asambaka ta boso bo gupɛnɛlɛ. Amohɔdjɔkɔ: «Odi mokondji o bayuda?» Yesu asɔmbedjaka: «Wɛ obali.» 12 Ehole emopundaka bakondji ba banganga ba Ndjakomba ko basuku ba ngando, Yesu aisɔmbedjaka nongo eka. 13 Na bea, Pilato abalaka na nde: «Otokaka pundi isusu i balakabo tina e wɛ?» 14 Endolo Yesu aisɔmbedjaka nongo kɔpi, na bea modjɔ momina mokamodjaka gupɛnɛlɛ mɛnɛ.

15 Ta engi tɛkɛ e pasika, gupɛnɛlɛ adaka na elama e boimedja mobɔlɔkɔ omɔti, yona opalaka bato banɛnɛ bohɔ. 16 Enakobea, edaka ta ehole emina mobɔlɔkɔ omɔti odjebamaka na kombe e Balabase*. 17 Na bea Pilato ahɔdjɔkɔ emumu eputoanaka: «Wapalakano notungoeni nda: Balabase kaoko Yesu okabeebo Kilito?» 18 Tengasa Pilato adjebaka bopele boo bakabaka Yesu na ndjea e ikuwa. 19 Ehole edaka Pilato ta ndako e esambi, mwali o nde amolomeaka bwɛndi bu: «Pɛ bokwea ta modjɔ mo moto yona o bodjo, tengasa bulu bu, nayekeami mɛnɛ na ndjɔti ta tina e nde.»

20 Bakondji ba banganga ba Ndjakomba ko basuku ba ngando bapangoaka bato banɛnɛ bosɛngɛ botingoa bo Balabase ko bowa Yesu. 21 Gupɛnɛlɛ asɔmbɔkɔ naikina bobahɔdjɔ: «Ta ndanda e bato ibi babae wapalakano notingoeni nda?» Basɔmbedjaka na bogama: «Balabase!» 22 Pilato abahɔdjɔkɔ: «Nakɔe na Yesu okabee bo Kilito bo?» Bato basusu basɔmbedjaka: «Mobaka ta ekulusu!» 23 Pilato abahɔdjɔkɔ: «Bobe bokɔi yo nda?» Endolo bagamaka naikina na ngulu: «Mobaka ta ekulusu!» 24 Ehole enɛkɛ Pilato boo aidaka na eka ekina e bokɔ, endolo djenge ehɛkɛ oko bohɛ, atombaka madiba, asosaka mɔmɔ ta boso bo emumu e bato ko abalaka: «Makia ma moto iyo matabakamake ta molo mo mbi! Edi modjɔ mo bino bɛnɛ!» 25 Bato basusu basɔmbedjaka: «Kinabo makia ma nde madae ta diko i biso ko ta diko i bana ba biso!» 26 Na bea Pilato atingoaka Balabase; akɛsedjaka Yesu mbalake ko abapaka tine bamobake ta ekulusu.

27 Basoda ba Pilato batombaka Yesu ta ndako e mokondji ko basoda banɛnɛ baputoanaka mbuti na nde. 28 Baihwaka bisendja bi nde ko bamolwadjaka mokoto mokpɛtu. 29 Bayoaka egbala e ndjubɛ ko baebakeaka ta molo mo nde ko bamopedjaka mososongo ta ebɔ e nde e bami. Bakwaka magbundɔ ta boso bo nde ko bamosɛkɛkɛ na bobala: «Mokondji o bayuda bwandae!» 30 Bamotueyaka masɔi, batombaka mososongo ko baimeaka bomoboma ta molo. 31 Ngɔngɔ i bomosɛkɛ, bamoiwaka mokoto, bamolwadjaka naikina bisendja bi nde ko bakɛkɛ na nde tine bomobaka ta ekulusu.

32 Ta boima bo ibonga, basakanaka na momi omɔti o ngando Kulɛnɛ, obeakabo Simo; basoda bamotombedjaka na ngulu ekulusu e Yesu. 33 Baimeaka ta polo ebeakabo Gologota, etingodjaka «Polo e egɔgɔlɔ e molo.» 34 Oho bapaka Yesu mana ma vino mabongoanedjakabo na kasa i boyo; ngɔngɔ i bomameka, alonaka bomamwaka. 35 Na bea bamobakaka ta ekulusu. Ngɔngɔ, babomaka djonga tine bakabana bisendja bi nde. 36 Na bea badaka ena tine bomobanea. 37 Ta diko i molo mo nde, babakaka ikomi iinedjaka tina e etumbo e nde: «Moto iyo adi Yesu, mokondji o bayuda.» 38 Batɔmbi babae bia ibabakamaka ta ekulusu engbanga na Yesu, omɔti ta ebɔ e bami ko okina ta ebɔ e bali.

39 Bato ibadaka banɔe na ndjea bamosingaka eni bagbɔkee melo. 40 Babalaka: «Wɛ moto opalaki bobuka tepelo ko boetonga na masu masato, saheledja wɛ mɛnɛ! Okada Mwana o Ndjakomba tita ta ekulusu!» 41 Bakondji ba banganga ba Ndjakomba, balehi ba mobeko ko na basuku ngando, ibo basusu badaka bataa Yesu ko babalaka: 42 «Aheledjeka bato bakina, endolo aboaniti bosaheledja yo mɛnɛ! Akadaa mokondji o Isalɛlɛ, atite ta ekulusu edɛdi bɛngi lomodimee! 43 Aisaka malɛi ma nde adi Ndjakomba ko adaka bobala: "Mbi, nadi Mwana o Ndjakomba." Ekadakobea, Ndjakomba amopalaka, amekemoheledja edɛdi!» 44 Ko batɔmbi ibabakakabo ta ekulusu engbanga na nde ibo pongono bamosingaka oko moda mua.

45 Bobanga midi, modidi modaka ta ngondo esusu ko mbunoko bokimana ehole e basato ngɔngɔ i midi. 46 Bokimana mbuti na ehole e basato, Yesu agamaka na ngulu: «Eloi, Eloi, lema sakabatani?» Etingodji «Ndjakomba o mbi, Ndjakomba o mbi, tina ndani okinini?» 47 Ta tei e bato ibaemaka ena, bamokaka ko baimeaka bobala: «Abeaka Elia!» 48 Mbala emɔti, omɔti apotaka botomba imbusu, aidubeaka ta vino engayi ko aenangaka ta sɔngɔ e mososongo, ngɔngɔ aepaka Yesu bɛngi aemwake. 49 Endolo bakina babalaka: «Amba, loendjeni kaoko Elia aduake bomoheledja!»

50 Yesu agamaka naikina na ngulu ko ayanedjaka mwembo. 51 Oko ta ehole emina, esendja esɛpeakabo ta tepelo ealeaka bodonga odiko mbunoko na se. Kpɔtɔ ikumanaka, mabanga maaleanaka, 52 makila madipoamaka ko basɛnɔke banɛnɛ ibagwaka basɔmbɔkɔ ta bomɔ. 53 Baimaka ta makila ko ngɔngɔ i bopusoa bo Yesu, bakweaka ta Yelusalɛmɛ, ibonga isɛnɔke ko basenɛmedjaka na bato banɛnɛ. 54 Kapitɛne o basoda ba Loma engbanga na basoda ibadaka bobanea Yesu, yana baenɛkɛ bokumana bo kpɔtɔ ko midjɔ misusu iminɔmɔkɔ, baimeaka na bɔɔ bonɛnɛ ko babalaka: «Adaki mɛnɛ Mwana o Ndjakomba!» 55 Bali banɛnɛ daka oho ko baendjaka bohali: ibakimanaka Yesu donga ta Galilea tine bomokɔmedja. 56 Ta ndanda e bali bamina, edaka na Malia, moto o ngando e Magadala, Malia, nange e Djake ko Esepu, ko nange e bana bami ba Djebede.

57 Ehole eimeaka mɔmɔkɔ, moto omɔti modieli o ngando e Alimatayo, aimeaka. Abeamaka na kombe e Esepu ko adaka pongono motingami o Yesu. 58 Akɛkɛ botaneana na Pilato ko amohɔdjɔkɔ mokuku mo Yesu. Na bea Pilato apaka ndjea e bopa mokuku mo Yesu adi Esepu. 59 Esepu atombaka mokuku mo Yesu, amodingaka na mbendja esɛnɔke e motuya monɛnɛ 60 ko amosambeaka ta ikila i nde yo mɛnɛ itɔkɔbo ta ibanga. Ahilingodjaka ibanga igbɔgbɔ tine bodipa ekweeli e ikila. Ngɔngɔ akɛkɛ. 61 Malia Magadala ko Malia ekina badaka ena, bayɛli ikila.

62 Aya busa, edaka busa ibokimanaka busa bo bobɔngedjama bo sabata, bakondji ba banganga ba Ndjakomba ko na bapalusai bakɛkɛ adi Pilato. 63 Babalaka na nde: «Tata mokondji, losɔmbedji malɛi adi moto iyo oboloa, ehole edaka yo adi mɔ, abalaka: "Nasɔmbɔke ta bomɔ, ngɔngɔ i masu masato." 64 Na bea pa ndjea boo babanee bopele ikila imina mbunoko ta isu i basato. Esakada boo batingami ba nde, badue, boiba mokuku mo nde ko bobala naikina adi bato: "Apusoi ta tei e bago." Boloabu, bosakanɔ bo boso.» 65 Pilato abalaka na bu: «Basoda bo bia, batombani ko kɛɛni bobanea ikila moda mapalakano.» 66 Na bea bakɛkɛ boisa embete ta ibanga idaka ta ekweeli e ikila tine bobanea ikila bopele.