1 Ta ndelo emina, bato baputoana ena koto na koto, na mondumba mo badaaka basadalakaka ta mako ma bobo. Yesu abanga bobala boso mɛɛnɛ ta dii batingami ba nde bo: «Kebani, na bole bo mapa ibubu bokabee ibo levile bo Bapalisai, ibubu bodii ndango e mongi. 2 Midjɔ misusu mibolama mimanabi ta bohu, ko midjɔ misusu mi mbombi mihuodjamabi. 3 Na tina e mina misusu mibalabi ino ta modidi mibalamabi ta busa boyake, ko misusu mibalabi ino na popoli ta itoi ta ekenge e ndako ediipamake midumbeamabi ta mbalasani etonga bo diko di ndako.»

4 «Naotɔndeini, baningani: pɛpɛ bobangani ibia babwani boowa mokuku ko, ngɔngɔ djimina, babwaniti bokɔɔ mokina modjɔ. 5 Napalakadea nainedjeni iyoyo obwani ino bobanga: bangani Iyo, ngɔngɔ dji bogwa, moto odii na kpati e bodumba ta ipelu*. Sooti, nabalakadea na nu, edii Iyo moto obwani ino bobanga! 6 Te batɛke midengudengu batano na motswiya mokɛkɛ? Endelo, Ndjakomba ta bose nongo omɔti ta tei e bobo. 7 Nongo swe dji bino dji molo djisusu djidii djilangamake. Pɛpɛ bobangani: modjɔ mo ino onɔini midengudengu banɛnɛ na motswiya!»

8 «Nabali na nu: moto iyona osahuodjabi ta boso bo bato ta tina e mbi, Mwana o moto pongono asahuodjabi tina e nde ta boso bo babwɛndi ba Ndjakomba. 9 Endelo moto oinganeabini* ta boso bo bato, mbi na moinganeabi pongono ta boso bo babwɛndi ba Ndjakomba. 10 Ko moto iyoyo obalabi mɛko mibe na Mwana o moto, akutubanedjamabi; endelo, iyoyo osingabi Mwembo Mosɛnɔke, atakutubanedjamabi.

11 «Ehole eopundabini bo ta ndako dji miɔngɔnɔ ko ta boso bo babanei ko bo bakondji, pɛpɛ bosatungeani na mondumba mosambabi ino ko mondumba mobalabi ino, 12 Modjɔ mo Mwembo Mosɛnɔke aonedjadeani ta ehole emina mɛko mibwani ino bobala.»

13 Moto omɔti ta emumu e bato abala na Yesu bo: «Molehi, tɔndea mwange e mbi akabane leka lokina sange o biso.» 14 Yesu amosɔmbedja bo: «Omina ohɔini bɛngi nadae djudji o bino tina e bokabana leka lo bino nda?» 15 Ko abala na bu: «Keba! Pɛpɛ bodaani na bokoso bo bodieli, modjɔ mo bomɔ bo moto bodiiti tina e bodieli bodii na nde, nongo akadaa na bodieli bonɛnɛ.»

16 Ko abatɔndea ekuanedji emɔti bo: «Kpɔtɔ dji moto omɔti modieli djibotaka mbuma djinɛnɛ. 17 Aikoaka ko asawadja bo: "Nakɔe bo? Modjɔ mo nadiiti mɛnɛ na esika e boputoanedja mbuma dji mbi djisusu." 18 ko asabalea bo: "Indja nakɔdea bo: na bukadea ndako djikabombe mbi mbuma, ko napike ndako djikina inɛnɛnɛ, ko nabukadea mbuma dji mbi dji ble ko na bodieli bo mbi. 19 Edɛdiyeye nasabaleadea bo: Odii na leka lonɛnɛ lodedjami tina e bianga binɛnɛ; sahemedja, yaka, mwaka ko sepa." 20 Endelo Ndjakomba abala na nde bo: "Endanga e moto! Na bulu ibubu ogwadea. Ko leka ilulu lodedji wɛ, lodikadea na nda?" 21 Indja ndenge ekakɔɔme ta dii moto iyoyo okadedje leka tinae e nde mɛnɛ, ko adiiti modieli ta miso ma Ndjakomba*.»

22 Ko Yesu abala na batingami ba nde bo: «Indjani tina e mina naotɔndeini bo: pɛpɛ bosatungeani oko tina e bomɔ bo bino ta modjɔ mo boya, nongo ta tina e mokuku mo bino na bisendja bi bolwa. 23 Modjɔ mo bomɔ bonɔi leka lo boya ko mokuku monɔi bisendja. 24 Indjani gɔgɔ: te baone leka ta gbie ko te bandoane leka, badiiti na ebombelo e mbuma ko na ediika, endelo Ndjakomba akabayedje! Iboa ino onɔini mbulu na tɛtɔ! 25 Nongo okasatungeani ta tei e bino moto obwani bobakea nongo moo ehole mokɛkɛ ta bomɔ bo nde nda? 26 Ko omiti hɔnɔni bokɔɔ midjɔ imimi mikɛkɛ, tina ndani odiini bosatungea na midjɔ mikina? 27 Indjani mondumba mokatɔe pulɛlɛ dji bisika: te djikɔe mikɔ ko te batonge bisendja. Naotɔndeini bo nongo Sɔlɔmɔ iyo mɛɛnɛ, ta tei e bokumu bo nde, aidiaka bisendja bipele bobwana na pulɛlɛ djimina*. 28 Iboa ko Ndjakomba akaloadja ndjani dji gbie idjidji djidii busɛbubu ko puma badjidumbi ta mosa, ko akɔɔdea boni tina e bino, bato ba bodhima bokɛkɛ! 29 Ko ino pɛpɛ bohombani eka eyadea ino ko na eka emwakadea ino pɛpɛ bosatungeani. 30 Edii bato ba bikomi bisusu bi ngondo ibibi bahombakadea na mindumba misusu leka lomina. Endelo ino, Sesa adjebakadea bo odiini na posa e lu. 31 Hombani boso Bokumu bo Ndjakomba ko leka lokina aopadeani.»

32 «Pɛpɛ bobangani, moo bwela o bingbɛndɛ! modjɔ mo Sange e bino asepi bopani Bokumu. 33 Tɛkɛni leka lo bino ko pani palanga ta dii bakwali. Kɔɔni tina e bino misenge mi palanga imimi mibwani bodaa pɛpɛ bobeha bombani bodieli bo bino ta busa, ko iho botabungabi. Iho moibi adiiti ko sɛɛ batalobedjabi. 34 Modjɔ mo ta polo edii bodieli bo wɛ molema mo wɛ modaadea oko iyana.»

35 «Daani na keba, ko lwani mosenge ta bongo bwanedjani milinda mi bino. 36 Ino pongono daani olongo basali ibibi baambaka moswa bu iyoyo okɛkɛdea ahule ta tɛkɛ e moki, akaimea ko akaboma modipe mo ndako gbundumo badii bomodipoa. 37 Mongandi ta dii basali ibibi ndelo eimeadea moswa bu, ko akatanea ba moamba! Naotɔndeini, edii sooti bo: alwabi bisendja bi mosala mo nde, abadedjabi ta mesa ko adoabi abakɔmedja. 38 Akadoa ta ndanda e bulu kaoko ta kɔkɔ o boso ko akabatanea ta yambo, badaabi na mongandi!

39 «Djebani bopele bo: moswa ndako aso adjeba ehole ndani ebwani moibi bodowa, akwea ta ndako abwaniti bomokina akwee ta ndako e nde. 40 Ino pongono, sɛlingoani, modjɔ mo Mwana o moto aduabi ta ndelo iyeye edaabi ino pɛpɛ bolɛdjɛ.»

41 Iboa Petelo amowadja bo: «Kumu, obali ekuanedji emina oto tina e biso kaoko tina e bato basusu?» 42 Kumu amosɔmbedja bo: «Mosali o iyɔngi ko o bowɛi edii nda? Indja edii iyoyo obo moswa nde amopi mosala mo bobaneaka ndako ko bokabana leka loboyaka na bina nde ta ehole emina. 43 Mongandi ta dii mosali iyoyo otaneabi moswa nde, ta mosala momina ndelo e hulabi iyo. 44 Sooti, nabali na nu bo: moswa nde amoisabi kapita o leka lo nde losusu. 45 Endelo mosali omina akalɛdjɛ akasabalea bo: "Moswa mbi ata huladea pɛpɛlɛ", ko akaimea boboma basali bakina ba baami ko ba bali, boyaka, bomwa ko bolangoa, 46 iboa moswa nde ahulabi ta busa bodaabi mosali o nde pɛpɛ bodaa na elɛndɛ ko ta ndelo edaabi iyo pɛpɛ bodjeba; abenganabi mosali omina ko amopabi etumbu enɛnɛ bobwana na bato ba taka e isuma. 47 Mosali iyoyo odjebi mɛko mikapale moswa nde, endelo amiti mikokedja, bamobomabi mbalake djinɛnɛ. 48 Endelo, mosali iyoyo odai pɛpɛ bodjeba mɛko mikapale moswa nde ko akakɔɔ bobe, bamobomabi na bokɛkɛ. Moto iyoyo odii na bobuke, bamowadjabi oko na bobuke; moto iyoyo opi ibo mɛko minɛnɛ bamosɛngɛbi mɛko minɛnɛ bonɔ.»

49 «Mbi nadoa aisa mosa ta ngondo* ko napalakadea mosa momina mobwane mɛɛnɛ! 50 Natungi botomba batisimo ko nadii na molema diko mbunoko mɛko misusu mikokedjame! 51 Olɛdjɛkɛdeani bo nadoi aisa bogo ta kpɔtɔ? Ngasa, nabali nanu, endelo nadoi abɔtodja. 52 Modjɔ mo banga busa ibubu, denga idii na bato batano ta ndako emɔti dibɔtɔɔbi, ekina pamba babae, ekina basato. 53 Sange e moto abɔtɔɔbi na mwana o nde ko mwana abɔtɔɔbi na sango, nange e moto abɔtɔɔbi na mwana o nde o mwali ko mwana mwali abɔtɔɔbi na nango, bokiyo bo mwali, abɔtɔɔbi na mwali o mwana o nde o moomi, ko mwali o mwana o nde abɔtɔɔbi na bokiyo bo nde bo mwali*.»

54 Yesu abala na emumu e bato na ikina bo: «Ndelo ekaɛnɛ ino itute dimɔti diangɔi ta pamba ekasaame modaakabusa, okabaleni ta ndelo emina bo: "Mbuwa ahombakadea akwɛɛ", ko ekakɔɔme oko boa. 55 Ko ndelo ekaɛnɛ ino mopɛpɛ moodongi satina, okabaleni bo: "Busa ibubu moi modadea mopipo", ko ekakɔɔme oko boa. 56 Bato ba ndango e mongi! Odjebini botingodja bimbete bi kpɔtɔ ko na bi busa, iboa, tina ndani odaini pɛpɛ bodjeba botingodja bimbete bi masu imimi?»

57 «Tina ndani ino bɛnɛ obwanitini bosipoa midjɔ imimi mitungi nanu bokɔɔ na bosooti? 58 Ndelo edii wɛ bokɛɛ na moloni o wɛ engbanga emɔti ta sambi, meka bobɔngedja modjɔ mo bino oko na ndjea. Omiti kɔɔ iboa aoimedjadea ta boso bo djudji, ko djudji aopadea ta mabɔ ma mbulu bahindo ko baoisadea ta bɔlɔkɔ. 59 Nabali na wɛ bo: omitisiedja nyongo e wɛ, otaimanabi ta bɔlɔkɔ.»