1 Ta ehole emina, Kaisala Ogisite*, apaka mobeko bo bakɛe akɔɔ motangi bɛngi badjebe bato basusu badaaka ta tei e bokondji bo Loma. 2 Edaaka mbala e boso e bokɔɔ motangi ta ehole edaaka Kiliniusi gupɛlɛnɛlɛ ta ekenge e mokili mo Sili. 3 Bato basusu bakɛɛkɛ akomedja kombe, moto na moto ta ngando e nde. 4 Yosepu pongono akina Nadjalɛtɛ ta ekenge e mokili mo Galileya, akɛɛkɛ ta Bɛtɛlɛmɛ ta ekenge e mokili mo Yudhea, modjɔ mo adaaka moto omɔti o ibota di Dhapiti.

5 Akɛɛkɛ akomedja kombe e nde engbanga emɔti na Malia, mwali o nde, iyo odaaka na deemi. 6 Ehole edaaka bo ta Bɛtɛlɛmɛ, ndelo e nde ebobota eso eimei. 7 Abotaka mwana moomi o nde o boso, amohua na bisendja ko amosambea ta esika ekayakedje bo tito bihole bisusu, modjɔ mo baidia esika ebowɛɛ ta ndako e bakɛndɛli.

8 Ta polo emina emɔti, babanei ba tito badaaka babanea tito ba bobo na bulu. 9 Obwɛndi o Kumu asainedja na bu, ekumu e Kumu eengɛsɛkɛ diko di bobo, ko baimeaka na bɔɔ bonɛnɛ. 10 Endelo obwɛndi abatɔndeaka bo: «Pɛpɛ bobangani, modjɔmo, nadoi aodjebedjani Bwɛndi Bopele bomɔti, ibubu bosepedjabi bato basusu: 11 ta bulu bo busa ibubu, baoboteini Moheledji ta ngando enɛnɛ e Dhapiti, iyo adii Kilito, Kumu. 12 Ko indjani embete iyeye emodjebadea na nu: otaneadeani mwana mokɛkɛ oboti bo, ahuwami na bisendja ko asambi ta esika ekayakedje bo tito.»

13 Na mbala emɔti babwɛndi banɛnɛ ba busa badoa baputoana na obwɛndi iyona ko bakumedjaka Ndjakomba, ko baso babalaka bo: 14 «Ekumu ta dii Ndjakomba iyo odii ta bisika binɔi o diko, ko bogo iya ta kpɔtɔ ta dii bato ibibi bakapale iyo!»

15 Ehole esɔmbɔ babwɛndi ta busa, babanei ba tito basabalea bo: «Lokɛeni ibobo ta Bɛtɛlɛmɛ, bɛngi lodjebe modjɔ ndani mosaimana iho, imumu molodjebedjaka Kumu.» 16 Bakɛɛ ta Bɛtɛlɛmɛ ebango ko baso batanea Malia, Yosepu ko mwana mokɛkɛ, oboti bo asambi ta esika ekayakedje bo tito. 17 Ehole emoɛnɛ ibo, batɔndeaka bato midjɔ misusu mibatɔndeaka obwɛndi ta tina e mwana omina. 18 Bato basusu ibibi baokaka mɛko mimina ta minɔko mi babanei ba tito baso bakamoa. 19 Malia abaneaka modjɔ momina ta molema ko amoikoaka. 20 Ta tina e babanei ba tito, bayana bakɛɛkɛ asakoe, ko akumedje Ndjakomba ndjea ndjea tina e mɛko misusu miokaka ibo ko miɛnɛkɛ ibo, bobwana na midjɔ mibatɔndeaka obwɛndi.

21 Ngɔngɔ dji masu bomwambe, eimeaka ehole e bolena mwana epole, ko bamobakea kombe e Yesu, oko mondumba momatɔndea obwɛndi Malia boso bo bolwa deemi*.

22 Iyaya akokaka masu mamina, bobwana na mobeko mo Mose*, ebɔngɔkɔ na bu bosasɛnodja, bakɛɛkɛ na mwana a Yelusalɛmɛ tina ebomoinedja ta dii Kumu, 23 modjɔ mo bobwana na ndenge ekomaka bo ta mobeko mo Kumu bo: «Mwana mosusu moomi o boso iyoyo oboti bo ebwani na nde bopame ta dii Kumu*.» 24 Bobwana na mobeko imua mo Kumu babolodja elomu e bopa pongono tina e mbeka bidoa babae kaoko bakandoli ba bimbenga* babae.

25 Moto omɔti adaaka ta Yelusalɛmɛ kombe e nde Simeona. Moto omina adaaka na bosooti ko na isuma, aambaka busa ndani boduadea Ndjakomba asikoa Isalɛlɛ. Mwembo Mosɛnɔke modaaka na nde. 26 Mwembo Mosɛnɔke mo modjebedja bo eta bɔngɔ bo agwɛ mbunoko aɛnɛ Kilito o Kumu na miso. 27 Mwembo mo moloma ta tepelo, ko ta ehole emina baboti ba Yesu bakɛɛ na nde tina ebokokedja midjɔ mikomama ta mobeko ta tina emina, 28 Simeona amotomba ta mabɔ ma nde ko asakoa Ndjakomba, ko aso abala bo:

29 «Edɛdiyeye, Kumu, okokedji midjɔ midikanakani na wɛ,

kina mosali o wɛ agwɛ na bogo.

30 Modjɔ mo miso ma mbi mɛnɛ maɛni Moheledji,

31 iyoyo oloma wɛ tina e boheledja bikomi bisusu.

32 Iyo adii moi tina e bopa bohu ta dii bikomi bisusu, apadea ekumu ta dii ekomi* e wɛ Isalɛlɛ.»

33 Sange e Yesu ko na nange e nde badaaka bakamwa na midjɔ midaaka Simeona abala tina e nde. 34 Simeona abadjongoa ko abala na Malia nange e Yesu bo: «Mwana iyoyo ahɔɔmɔ tina e bodumba ko boangɔdjɔ bato banɛnɛ ba Isalɛlɛ; iyo adaabi embete e bopa motubano; 35 ta tina emina, malɛno mabolamake ma bato madjebamabi. Iboa wɛ mɛnɛ Malia, molema mo wɛ modabi mobenake.»

36 Motɛli mwali adaaka ena, kombe e nde Ana, mwana mwali o Panuwelo, motitani o Aselo. Aimeaka mobange. Ahelama bianga sambo na muma nde omoasɔkɔ donga a bwɛngɛ bo nde, 37 ngɔngɔ djimina adika mwali o bogwa ko akokedjaka bianga tuku bomwambe na banɛi. Aidongaka ta tepelo asalealaka Ndjakomba bulu na moi: bokia miya ko aangɔnɔkɔ. 38 Aimeaka ta ehole emina aso akumedjaka Ndjakomba. Ko abalaka midjɔ mitingi na mwana ta dii bato basusu ba ambaka bo Ndjakomba aheledje Yelusalɛmɛ.

39 Ngɔngɔ dji bokokedja midjɔ misusu mi mobeko mo Kumu Malia na Yosepu bayana ta Galileya ta Nadjalɛtɛ ngando e bobo. 40 Mwana akandoaka, adaaka na ngulu. Alumaka na konga, ngɔlu e Ndjakomba edaaka ta dii iyo.

41 Baboti ba nde bakɛɛkɛ aengi yanga ta Yelusalɛmɛ ta tina e tɛkɛ e Pasika*. 42 Ehole ekokedja Yesu bianga doomi na bibae*, bakɛɛkɛ na nde oo momɛsɛno mo bobo. 43 Ehole esiaka masu ma tɛkɛ, bayanaka, Yesu adika ta Yelusalɛmɛ ko baboti ba nde baidjeba. 44 Balɛdjɛkɛ bo Yesu adaaka engbanga emɔti ta ndjea na bina nde ta mɔongɔ, bakɔɔ busa bo mɔti na ndjea. Boso bamohombi ta dii mela ma bobo ko ta dii badjebani bakina. 45 Endelo baimodiaka. Basɔmbɔkɔ ta Yelusalɛmɛ amohomba. 46 Ta busa bo basato, bamodiaka ta tepelo, adii na mobondo ta ndanda e balehi ba mibeko abahokamedja ko abawadja mawadja. 47 Bato basusu badaaka bamohokamedja bakamwaka na bowɛi bo nde ko na misɔmbedja mi nde. 48 Ehole emoɛnɛkɛ baboti ba nde bakamoa bobuke ko nange ende abala na nde: «Mwana o mba, olokɔi ibowa tina nda? Indja, mbi na sangwao lobangi bobuke ko loohombaki.» 49 Abasɔmbedji bo: «Tina ehombakini na nu nda? Otadjebakadeani bo etungi na mbi bosala misala ta ndako e Sesa?» 50 Endelo ibo baisipoaka tina e mɛko mibatɔndeaka iyo. 51 Yesu ayana na bu engbanga emɔti ta Nadjalɛtɛ. Abasumaka. Ko nango abaneaka mɛko mimina ta molema mo nde. 52 Yesu akandoaka na konga, na mokuku mopele ko na ngɔlu boso bo Ndjakomba ko na bato.