1 Ta ndelo emina iyena, bato bakina badoa atɔndea Yesu mondumba ndani mosopa iyo makiya Pilato bato ba Galileya ta ndelo edaaka bo bapa mbeka. 2 Abasɔmbedja bo: «Olɛdjɛkɛɛdeani bo bato ba Galileya ibia bagwa mondumba imua, bakɔɔ pekato djinɛnɛ bonɔ bato bakina ba Galileya? 3 Naotɔndeini bo ediiti boa; endelo omiti sɔmbɔtɔnɔni, midaa ogwadeani ino basusu oko mondumba momina momɔti. 4 Ko bato doomi na bomwambe ibia bagwa ndelo ebukea ndako ekpalaka e Siloe*, olɛdjɛkɛɛdeani bo bobe bo bobo bonɔi bo bato bakina ba Yelusalɛmɛ? 5 Te boa, ekahia naotɔndeakadeani bo: omiti sɔmbɔtɔnɔni midaa mi bino, ogwadeani ino basusu oko mondumba momina momɔti.»

6 Yesu abala ekuanedji emɔti: «Moto omɔti aanaka mole mo pigi ta gbie e nde e mele mi vino. Adoaka ahomba mbuma, ekahia aidia mbuma imina. 7 Iboa abala na mosali o gbie bo: "Indja: bianga bisato itombo, nadii bodoa iyaya ehole esusu ahomba mbuma dji pigi ta mole imumu, ko tenadie eka emɔti. Mokwɛlɛ! Tina ndani mobedjakadea kpɔtɔ oko ngasa?" 8 Endelo moaneli o gbie amosɔmbedja bo: "Moswa mba, petemokina nongo ta yanga iyeye; nalongadea kpɔtɔ mbuti mbuti ko ta tei emina naiseadea bipɔlu. 9 Ehole ekina mole momina mobwani bobota mbuma ta yanga engɔngɔ, momitabota mbuma, oso omokwɛlebi."»

10 Ta busa bomɔti bo sabata Yesu adaaka aleha ta ndako emɔti e miɔngɔnɔ mi Bayudha. 11 Mwali omɔti odaaka ena: adaaka na mwembo mobe bianga doomi na bomwambe, mwembo mobe mo moimedja na yɛɛmɛ aimbama mokɔngɔ ko aihonɔkɔ bosaninodja bopele. 12 Ehole eenɛ Yesu mwali omina, amobea ko abala na nde bo: «Mwali, otingoami na yɛɛmɛ e wɛ.» 13 Abakea mɔmɔ ma nde diko di nde ko, na mbala emɔti, mwali asaninodja ko abanga bokumedja Ndjakomba. 14 Endelo mobanei o Ndako e miɔngɔnɔ aoka kɛlɛ modjɔ mo Yesu aheledja moto ta busa bo sabata. Ko abala na emumu e bato bo: «Lodii na masu masamano ma mosala*; ta tina emina doani asaheledjeni ta masu mamina ma mosala endelo te ta busa bo sabata!» 15 Kumu amosɔmbedja bo: «Bato ba ndango e mongi! Busa bo sabata, moto na moto tadipoe ikutu bɛngi ngɔmbɔ o nde kaoko tito okabee ibo ane bakɛe amwaka madiba? 16 Ko mwali iyoyo, adii motitani o Abalayama, Satana amonanga bianga doomi na bomwambe, ebwanakiti bomolodja mbɔti imina ta busa bo sabata?» 17 Ndelo esɔmbedja Yesu iboa baloni ba nde basusu baluma na sɔni enɛnɛ, ekahia emumu e bato basepaka na midjɔ mipele imimi midaaka Yesu akɔɔ.

18 Yesu awadja naikina bo: «Bokumu bo Ndjakomba bobwani na ye? Nabwani boboɛngɛ na eka nda? 19 Indja eka ebwani na bu: mombuma imumu mokabee ibo mutalade*, moto omɔti amotomba ko amoana ta gbie e nde e ngando: motɔɔ, ko moimea mole ko mbulu ba diko bakɔɔkɔ moopo ma bobo ta tape dji mole momina.»

20 Yesu abala na ikina bo: «Na bwani boɛngɛ Bokumu bo Ndjakomba na ye? 21 Indja eka ebwani na bu: bole bo mapa ibubu bokabee ibo levile, bokatombe mwali omɔti ko aisi ta kilo dji paline tuku djibae na itano, mbunoko anila o mapa mosusu ahaloe.»

22 Yesu adalaka ta ngando dji nɛnɛnɛnɛ ko na dji kɛkɛkɛkɛ ko alehaka ndelo edaaka iyo akɛɛkɛ akɛe ta Yelusalɛmɛ. 23 Moto omɔti amowadja bo: «Kumu, edii bo bato bahelabi bakɛkɛ?» Amosɔmbedja bo: 24 «Sapingedjani bɛngi okweni ta modipe mo embamba; modjɔ mo naotɔndeakadeani bo, bato banɛnɛ bamekabi bokwea ena, ekahia batahɔnɔbi.

25 «Ndelo eangɔbi moswa ndako adipabi ndako ino odikabini sokolu ko obomabini modipe mo ndako ko obalabini bo: "Moswa su lodipoa ndako." Ko iyo aosɔmbedjabini bo: "Nitaodjebakadeani!" 26 Iboa, obalabini na nde bo: "Iso loyakaka ko lomwaka ta boso bo wɛ, odaaka oaleha ta ndjea dji biso." 27 Endelo abasɔmbedjabi na ikina bo: "Nataodjebakadeani ko natadjebakadea esika edongi ino! Dongani mbuti na mbi. Ino bato basusu ibibi bakakɔe midjɔ mibe." 28 Iho oyeabini bio ko na bokpɛkɛnɛ mino, ndelo eɛnɛbi ino Abalayama, Isaka, Yakobo ko na batɛli basusu ta Bokumu bo Ndjakomba ko ino odumbamabini sokolu! 29 Bato badongabi ta pamba ekaangɔe modaakabusa, ko ta pamba ekasame mo, ta sadiko ko na satina ko badiabi esika ta Bokumu bo Ndjakomba. 30 Iboa, bato bangɔngɔ baimeabi bato ba boso, bato ba boso ko, basɔmbɔbi bato ba ngɔngɔ.»

31 Ko ta ehole emina, ndambo e Bapalisai badoa ta dii Yesu ko babala na nde bo: «Donga iyaya, kɛɛ ta esika ebuki, modjɔ mo Elode apalakadea aowoe.» 32 Yesu abasɔmbedja bo: «Kɛɛ atɔndeeni ebanga *omina bo: "Nabenganakadea membo mibe ko na heledjakadea bato ba bego busa ibubu na puma, ko ta disu di basato namadjadea mosala mo mbi." 33 Endelo etungi na mbi bodaledja naikina mosala mo mbi busa ibubu, puma mbunoko puma sɛɛnɛ, modjɔ mo ebɔngiti na motɛli bogwa sokolu e Yelusalɛmɛ.

34 «Yelusalɛmɛ, Yelusalɛmɛ, wɛ okaowoe batɛli ko okaowoe bato bakaolomee ibo na mabɔkɔ! Mbala djeka dji palaka mbi boputoanedja bato ba wɛ mbuti na mbi mondumba mokaputoanedje kɔkɔ o mwali baana ba nde nase dji mapapu ma nde, ekahia ino oipalani! 35 Oko boa, ndako ewɛ ediika dea mopɔtu. Naotɔndɔkɔdea sooti bo: otaɛnɛbini na ikina mbunoko ehole ebalabino bo: "Adjongoame iyona okɛɛkɛdea adoe a kombe e Kumu!"»