1 Ehole esiedja Yesu bobala mɛko mimina misusu na bato, akwea ta Kapalanaume. 2 Kapita o basodha mokama omɔti adaaka na mosali o nde iyoyo opalaka iyo bobuke, adaaka apeka na yogo mbuti na bogwa. 3 Aoka iyo bato babala ta tina e Yesu, alomaka basuku bamɔti ba Bayudha ta dii iyo bamowadje bɛngi adoe aheledja mosali o nde. 4 Aimea bo ta dii Yesu, bamoɔngɔnɔkɔ na ngulu ko babalaka na nde bo: «Edii bopele okamoe moto iyoyo. 5 Modjɔ mo akapale ekomi e biso ko edii iyo moto olotongea ndako e miɔngɔnɔ e Bayudha.» 6 Iboa Yesu akɛɛ na bu engbanga emɔti ko ehole eimea bo mbuti na ndako, kapita o basodha mokama aloma binande bamotɔndee bo: «Kumu, pɛpɛ bosatungeako ngasa, mbi na bwaniti bɛngi bo okwe ta ndako e mbi; 7 ta tina e mina nabwanakitiki bodoa mbi mɛɛnɛ ta di wɛ. Endelo bala oto kɔpi emɔti pɛ, bɛngi mosali o mbi ahele. 8 Modjɔ mo mbi nadii na bakondji diko di mbi, endelo nadii na basodha nase dji bokondji bo mbi, ko nakabala na omɔti bo: "Kɛɛ!" Ko adii bokɛɛ; nakabala na okina bo: "Doa!" Adii bodoa, ko nakabala na mosali o mbi bo: "Kɔɔ iboo!" Adii bokɔɔ.» 9 Ndelo eoka Yesu mɛko mimina, amodhimea, aindja emumu e bato ibibi bamokimanaka ko abala bo: «Nabalakadea na nu nongo ta Isalɛlɛ napakina ɛnɛ moto omɔti o edhimeli mondumba imumu.» 10 Ehole esɔmbɔ bato ibibi balomaka kapita o basodha mokama ta ndako, batanea mosali omina asi bohela.

11 Ngɔngɔ djimina Yesu akɛɛ na ikina ta ngando emɔti kombe eyu Naine*. Batingami ba nde na emumu e bato bakina bakɛɛkɛ na nde engbanga emɔti. 12 Ehole eimea bo mbuti na ngando, basonganaka bapeli mosongo mo moto omɔti mogo. Mwana moomi omina omɔti, nango adaaka mwali o bogwa, ko emumu e bato ba ngando badaaka na nde engbanga emɔti. 13 Ndelo eɛnɛ Kumu mwali iyona, amookea pɛhɛ ko abala na nde bo: «Pɛpɛ boyeako!» 14 Ko asalinda mbuti, apea ibaya; bato ibibi bamopeaka baema. Abala bo: «Mwenga, nabali na wɛ, sisoa!» 15 Iboa, moto iyoo ogwaka, adaa na mobondo ko abanga bobala. Ko amopa nango. 16 Bato basusu baluma na bɔɔ, ko bakumedjaka Ndjakomba ko babalaka bo: «Motɛli omɔti monɛnɛ aimei ta ndanda e biso ko Ndjakomba adoi aindja bato ba nde.» 17 Ko gala e Yesu enangana ta Yudhea* mosusu ko ta ngango dji mbuti mbuti.

18 Batingami ba Yoane bamotɔndea midjɔ mimina misusu, ko iyo abea batingami ba nde babae, 19 abaloma ta dii Kumu amowadja bo: «Odii Masiya iyoo okɛɛkɛdea adoe*? Kaoko ebɔngi na su boamba moto okina?» 20 Ehole eimea bo ta dii Yesu, babala na nde bo: «Yoane Mobatisi alolomi ta dii wɛ tina e boowadja bo: "Odii Masiya iyoyo okɛɛkɛdea adoe kaoko ebwani na su boamba moto okina?"» 21 Oko a ehole emina, aheledja bato banɛnɛ ba bego, bato ba yɛɛmɛ, ko bato badaaka na membo mibe ko aenɛdjɛ bato banɛnɛ badaaka na miso mago. 22 Ko abasɔmbedja bo: «Kɛɛni atɔndea Yoane mɛko misusu miɛni ino ko mioki ino: bato ibibi baagwa miso basɔmbi boɛnɛ, bitumbɛ badalakadea, bato ba mabha basɛnɔkɔdea, bato ba matoi mago baokakadea, bato bago basisoakadea, ko* Bwɛndi Bopele botɔndeamakadea ta dii bakwali 23 Ko mongandi ta dii moto iyoyo odaabi pɛpɛ bodumba edhimeli e nde ta tina e mbi!»

24 Ngɔngɔ dji boyana bo batingami ba Yoane, Yesu aso abanga bobala na emumu e bato ta tina e Yoane: «Eka ekɛɛki ino aindja ta etengelenge nda? Mososongo mokumanaki na mopɛpɛ? 25 Ekɛɛki ino aindja nde? Moto omɔti alwai bisendja bipele? Endelo ibia balwali bisendja bipele badii na bodieli bakadae ta ndako dji bakondji. 26 Ekɛɛki ino aindja nde? Motɛli? Sooti, nabalakadea na nu bo: iyo anɔi motɛli. 27 Modjɔ mo ekomama tina e Yoane bo:

"Indja nalomadea molomami o mbi boso bo wɛ,

abobɔngedja ndjea* tina e wɛ."

28 «Naotɔndeini bo, ta ndanda e bato basusu ibibi babotama na bali, pɛpɛ nongo moto omɔti onɔi Yoane, endelo ta Bokumu bo Ndjakomba iyo odii mokɛkɛ amonɔi na bonɛnɛ. 29 Bato basusu na baputedji ba puti bamokaka badhimeaka Ndjakomba ko batombaka batisimo ba Yoane. 30 Endelo Bapalisai ko balehi ba mobeko badumba eka epalaka Ndjakomba tina e bobo ko balona pongono botomba batisimo ba Yoane.»

31 Yesu abala naikina bo: «Mbi nadii bokuanedja bato ba mbota e busa ibubu mɛnɛ na nda? Badii olongo ba nda? 32 Babwani na bɛngɛ ibibi badii na mbondo ta esika ekaputoane bato, baasagameana ibo na ibo: "Lobomeakini baa mindule bakɛkɛkɛkɛ ko obuitini! Loembeakini ndjembo dji ilaka ko oyeitini." 33 Modjɔ mo, Yoane Mobatisi adowa iyo, ta yake mwɛmbɛ, ko ta mwake vino, ko obalini na nde bo: "Adii na mwembo mobe!" 34 Mwana o moto adoa iyo, ayaki, ko amwaki, ko obalini na nde bo: "Indja moto iyoyo akapale seko boyaka ko na bomwaka, adii mwange e baputedji ba puti ko na bato ba pekato!" 35 Endelo konga e Ndjakomba bodjebani sooti tadii bana ba nde basusu.»

36 Mopalisai omɔti abea Yesu bɛngi ayaka ta ndako e nde; akwea ta dii mopalisai ko adaa ta mesa. 37 Ta ngando emina enɛnɛ, mwali omɔti o pekato aoka bo Yesu adaaka ta ndako e mopalisai, adoa na molangi momɔti mo malasi mo motsuiya monɛnɛ molumake! 38 Ko aema diko sangɔngɔ dji nde, adaaka ayea biyo, ta mako* ma Yesu, ko mbisoli dji nde ipɔɔdjɔkɔ mako ma nde, ko ahakoaka mako ma Yesu na swe dji nde; ama bhimbaka na isuma ko asuowaka malasi ta mako masusu. 39 Iyaya aɛnɛ mopalisai iyoyo omobeaka iboa, asabalea ta molema bo: «Moto iyoyo asoada motɛli, akɔkidjeba bo mwali iyoyo omopeli adii: mwali o pekato.» 40 Yesu abala na mopalisai bo: «Simona, nadii na mɛko mibotɔndea.» Simona abala: «Molehi, tɔndeani.» 41 Ko Yesu abala bo: «Bato babae badaaka na nyongo ta dii mobekedji o palanga omɔti. Omɔti adaaka na nyongo e palanga mikama mitano, okina palanga tuku itano. 42 Iboa baidaaka na eka e bomosɔmbedja, abayɛɛ na nyongo dji bobo ibo basusu babae. Ta tei e bobo babae onɔɔdea bomopala nda?» 43 Simona asɔmbedja bo: «Nalɛdji edii iyoyo oyɛi iyo na nyongo enɛnɛ.» Yesu abali na nde bo: «Wɛ olongi.»

44 Ko ahombana ta dii mwali, abala na Simona bo: «Wɛ oɛni mwali iyo? Nakwei ta ndako e wɛ, wɛ osopeitini madiba ta mako*, endelo iyo, apɔdjini mako na mbisoli dji nde ko amahakoaki na swe dji nde. 45 Wɛ obhimbitini, endelo iyo, donga akwei iyo ta ndako, akiniti bobhimba mako ma mbi. 46 Osopeiti mosula ta molo* mo mbi, endelo iyo, asopeini malasi ta mako. 47 Na tina e mina nabalakadea na wɛ bo pekato dji nde djinɛnɛ djikutubani, modjɔ mo ainedjini bwela bonɛnɛ. Endelo adii iyona okutubanedji bo na midjɔ mikɛkɛ akapale oko na bokɛkɛ.» 48 Iboa abala na mwali bo: «Pekato dji wɛ djikutubani.» 49 Bato badaaka na nde ta mesa basabalea ta tei e milema mi bobo bo: «Moto omina nda iyoyo obwani bokutubanedja pekato?» 50 Endelo Yesu abala na mwali bo: «Edhimeli e wɛ eoheledji: kɛɛ na bogo.»