1 Ibo basusu baangɔ ko bakɛɛ na Yesu ta boso bo Pilato. 2 Babanga bamopunda ko babala bo: «Iso lotanea moto iyoyo apangoa bato ba biso: abasia badae pɛpɛ boputa puti ta dii Kaisala ko iyo mɛnɛ asabaleakadea bo adii Masiya, mokondji.» 3 Pilato amowadja bo: «Wɛ, odii mokondji o Bayudha?» Yesu amosɔmbedja bo: «Wɛ, mɛnɛ obali.» 4 Pilato abala na ba banganga ba Ndjakomba banɛnɛnɛnɛ ko na emumu e bato bo: «Nataɛnɛkɛdea modjɔ mobe mobwani na mbi bodumba moto iyo.» 5 Bakongola bobala bo: «Iyo apangoakadea bato na bileho bi nde. Abanga ta Galileya, anɔɔ a Yudhea, mbunoko iyaya.»

6 Ehole eoka Pilato mɛko mimina awadja bo: «Moto iyoyo adii moto o Galileya?» 7 Ko iyana aoka iyo bo Yesu adaaka moto o ekenge e mokili ebaneaka Elode, amoloma ta dii Elode, odaaka ta Yelusalɛmɛ ta masu mamina imia. 8 Elode amayo enɛ Yesu adaaka na sepi enɛnɛ. Modjɔ mo, aoka gala e nde donga ehele, ko adaaka na posa e bosongana na nde; alɛndɛkɛ bo Yesu amoinedje moo embete. 9 amowadja mawadja manɛnɛ, endelo Yesu aimosɔmbedja nongo eka emɔti. 10 Banganga ba Ndjakomba banɛnɛnɛnɛ ko balehi ba mobeko badaaka ena ko bamopunda bobe mɛnɛ. 11 Elode na basodha ba nde bamota ko bamonyɔkɔlɔ na masinga, ko Bamoloadja esendja epele mɛnɛ ko amosɔmbedja ta dii Pilato. 12 Elode na Pilato baiokanaka boso, ko ta busa bomina, baimea na bwela bopele.

13 Iboa Pilato aputoanedja banganga ba Ndjakomba banɛnɛnɛnɛ babanei ba Bayudha ko na bato basusu, 14 ko abala na bu bo: «Ino olwɛbinini moto iyoyo obalabini bo apangoakadea bato. Iboa mbi namowadjaki ta boso bo bino ko namobolodjiti na modjɔ momɔti mobe imumu momopundakadea na nu. 15 Elode aimobolodjabi na modjɔ mobe modjɔmo amosɔmbedji djɔno ta dii iso. Iboa, moto iyoyo akɔiti modjɔ mobe imumu mobwani na nde bogwa. 16 Namobomedje pimbo, ngɔngɔ djimina naso na mokine.» [ 17 Aengi tɛkɛ e Pasika, Pilato abwanaka bobatingoa moto omɔti ta bɔlɔkɔ.*] 18 Endelo ibo basusu bagama engbanga emɔti bo: «Owa moto omina! Kinea iso Balabasi!» 19 – Balabasi akwea ta bɔlɔkɔ na tina e wusuwusu ekɔɔmɔ ta ngando enɛnɛ ko aso aowaka moto. – 20 Pilato adaaka na posa e bokina Yesu, ko abala na bu na ikina mɛko mimina. 21 Endelo ibo bagamaka bo: «Mobaka ta ekulusu! Mobaka ta ekulusu!» 22 Abala naikina mbala e basato bo: «Bobe bokɔi iyo nda? Mbi naeniti modjɔ mobe mobwani na nde bogwa. Na moimanedjadea ngɔngɔ dji bomoboma.» 23 Endelo bakongola oko bagama na ngulu bo iyo abakame oko ta ekulusu. Ko na migamo mi bobo bopala bo bobo bokokedjama: 24 Pilato adhima akokedje bopala bo bobo. 25 Pilato aimedja moto opalaka bo, iyo odaaka ta bɔlɔkɔ na tina e wusuwusu iyena ekɔɔ ibo ko iyo aowa moto, ko akaba Yesu ta mɔmɔ ma bobo bɛngi bakɔe na nde mondumba mopalaka ibo.

26 Iyana akɛɛkɛ ibo na Yesu, basongana na Simona, moto o Silɛne, ahulaka ta gbie. Bamopea ko baamolwaja ekulusu sangɔngɔ dji Yesu. 27 Emumu e bato enɛnɛ badaaka batingi ngɔngɔ dji nde, ko bali babakeaka mɔmɔ ta melo ko bakɛsɛlɛkɛ tina e nde. 28 Yesu ahokowa ta dii ibo ko abala na bu bo: «Ino bali ba Yelusalɛmɛ, kina boyeani tinae mbi! Endelo yeani tinae bino bɛnɛ ko tina e bana ba bino! 29 Modjɔ mo ta masu makɛɛkɛdea adoe, babalabi bo: "Mongandi ta dii bali batete, ibibi badaa pɛpɛ bobota ko na bonungea bana." 30 Ta ndelo emina bato babalabi na ngomba bo: "Kwani diko di biso!" Ko babalabi na makoli bo: "Lokundani*!" 31 Modjɔ mo bakakɔɔ mole motɔtu iboa, modabi boni na mole mokakanake?»

32 Bakɛɛkɛ pongono na bapundji babae bɛngi ba baowoe engbanga emɔti na nde. 33 Ehole eimea bo ta esika iyeye ebeaka bo «Engɔngɔlɔ e molo», babaka Yesu ta ekulusu ko na bapundji babae* pongono, omɔti ta ebɔ e nde e baami, okina ta ebɔ e nde e bali. 34 Yesu abala bo: «Sesa, ba yɛɛ modjɔ mo batadjebakadea eka ekɔkɔɔdea ibo.» Baboma djeke tina e bokabana bisendja bi nde. 35 Bato basusu ibia badaaka ena baindjaka modjɔ momina. Babanei ba Bayudha bataka Yesu* ko babalaka na nde bo: «Aheledja bato bakina, asaheledje iyo mɛnɛ, akadaa sooti mɛnɛ Masiya, iyona ohɔɔ Ndjakomba!» 36 Basoda pongono bamotaa, badoaka mbuti na nde ko bamopaka vino e ngai*, 37 ko babala na nde bo: «Okadaa mokondji o Bayudha, saheledja wɛ mɛnɛ!» 38 Ta diko di molo mo nde bakoma ena bo: «Moto iyoyo adii mokondji o Bayudha.»

39 Omɔti o bapundji obaka ibo ta ekulusu amosingaka ko abala bo: «Wɛ te Masiya? Saheledja wɛ mɛnɛ, oko eheledja koko iso!» 40 Endelo mopundji iyoyo okina amogamea ko abala bo: «Wɛ, otabanga Ndjakomba, wɛ iyo odii etumbu emɔti na nde? 41 Tina e biso edii sooti, modjɔ mo iso lobolodji etumbu edii tina e mikɔ mi biso; ko iyo akɔiti nongo bobe bomɔti.» 42 Iboa abakea bo: «Yesu, tomalɛdjɛni ndelo eimeabi wɛ ta bokondji bo wɛ.» 43 Yesu amosɔmbedja bo: «Naotɔndeakadea sooti bo: oko busa ibubu mɛnɛ odadea na mbi ta paladiso*.»

44 Edaaka mbuti na midi, modidi motita ta kpɔtɔ djisusu ko mbunoko ngonga e basato ngɔngɔ dji midi, 45 ko modakabusa modimea, esendja enɛnɛ odaaka ta ndanda e Esika Esɛnɔke na ta Esika Enɔi esɛnɔke esɛpɛɛkɛ ibo ta tepelo* eso ealea bipasa bibae. 46 Yesu agama na ngulu bo: «Sesa, nasɔmbedji mwembo mo mbi ta mɔmɔ* ma wɛ. Asiedja iyo babala iboa, aso atsea molema.» 47 Kapita o basodha mokama aenɛ iyo modjɔ momina, akumedja Ndjakomba ko abala bo: «Edii sooti mɛnɛ, moto iyoyo adaaka moto o bosooti!» 48 Emumu e bato badoaka ena aindja modjɔ momina iyana aenɛ bo boa. Bayana mɔmɔ ta melo. 49 Bato basusu bamodjebaka ko na bali ibibi bamokimanaka donga ta Galileya, baemaka bohali* enɛ baindja midjɔ misusu imi minɔmɔkɔ.

50,51 Moto omɔti adaaka ena, kombe ende Yosepu moto o Alimatayo, ngando enɛnɛ e Bayudha. Moto omina adaaka mopele ko na bosooti. Ko aambaka bodoa bo Bokumu bo Ndjakomba. Iyo adaaka moto o Ikita dinɛnɛ. Endelo iyo aidhima mɛko miokanaka ibo ko mikɔ ibo ta Ikita dinɛnɛ. 52 Akɛɛ ta dii Pilato ko amosɛngɛ mokuku mo Yesu. 53 Ko atitedja mokuku ta ekulusu, amohua na molangiti ko amoisa ta ikila dilongeama ta ndanda e ibanga inɛnɛ, ko baipaka pusea moto omɔti ena. 54 Edaaka busa bo Mosɛlingo* mo sabata, ko sabata ehombaka eimee. 55 Bali ibibi bakimanaka na Yesu donga Galileya, bakimana Yosepu iho, ko baɛnɛ ikila ko baindja mondumba ndani moisa bo ebembe ta ikila. 56 Ngɔngɔ djimina basɔmbɔ ko babɔngedja mosula mo so epele ko na malasi. Bahema ta busa bo sabata tina e bosuma* mobeko.