1 Ta busa bomɔti bo sabata, Yesu anɔɔkɔ ta gbie dji mbuma dji ble. Batingami ba nde batswaka mbuma dji ble ba dji sianaka na mɔmɔ ma bobo ko ba dji yakaka*. 2 Ndambo e Bapalisai babala bo: «Tina ndani obedjakini mobeko imu mosii bokɔɔ mosala ta busa bo sabata*?» 3 Yesu abasɔmbedja bo: «Oilangani nongo modjɔ mikɔɔ Dhapiti ehole edaaka iyo na ndja, na bato badalaka na nde? 4 Ndenge ndani akwea ta ndako e Ndjakomba, atomba mapa ma mabondja, amaya ko amapa na bato badalaka na nde, mapa mamina nongo moto omɔti aidaka na enɔli e bomayaka, dongedja oko banganga ba Ndjakomba ibo bɛnɛ.» 5 Yesu abalaka na bu bo: «Mwana o moto adii moswa busa bo sabata.»

6 Ta busa bokina bo sabata, Yesu akwea ta ndako e miɔngɔnɔ mi Bayudha ko abanga boleha. Moto omɔti adaaka ena ebɔ e nde e baami edaaka ekatatake. 7 Balehi ba mobeko na Bapalisai bakokoledjaka Yesu, embingi akaheledja moto ta busa bo sabata, bɛngi bamodie na modjɔ mo bomopunda. 8 Endelo Yesu adjebaka malɛno ma bobo. Abala na moto iyoyo odaaka na ebɔ ekatatake: «Angɔ ko ema yana ta ndanda.» Asangɔdjɔ ko aema diko. 9 Ngɔngɔ djimina, Yesu abala na bu bo: «Naowadjakadeani bo: Edhimama bokɔɔ ta busa bo sabata nde? Bokɔɔ bopele kaoko bokɔɔ bobe? Boheledja bomɔ bo moto kaoko bobobedja?» 10 Iboa, abaindja ibo basusu, ko abala na moto o omina bo: «Ninodja ebɔ.» Aninodja ebɔ e nde ko eso ehela. 11 Endelo balehi ba mobeko ko na Bapalisai baluma na kɛlɛ ko basatɔndɔnɔkɔ ta tei e bobo bo modjɔ ndani mo bwani ibo bokɔɔ tina e Yesu.

12 A masu mamina, Yesu aiwea ta ngomba tina e boangɔnɔ ko anɔdjɔ bulu bosusu oko ta boangɔnɔ Ndjakomba. 13 Aya busa, abeya batingami ba nde ahɔɔkɔ ta tei e bobo doomi na babae ko abapa kombe e bapɔsɔlu: 14 Simona – iyo opa iyo kombe e Petelo – Andele mwanango, Djake, Yoane, Pilipo, Batelemi, 15 Matayo, Tomasi, Djake, mwana o Alipe, Simona – obeaka bo Djeloti –, 16 Yudhe, mwana o Djake, ko na Yudhasi Isikaliote, iyoyo okaba Yesu.

17 Yesu atita ta ngomba engbanga emɔti na bu aema ta esika e nase, ta esika edaaka emumu e batingami ba nde. Ko badaaka ena pongono na bakina bato banɛnɛ badongaka ta Yudhea esusu, ta Yelusalɛmɛ ko ta ngando djinɛnɛ Tile na Sidona djidaaka ta mokula mo dua; 18 ibo badoaka bɛngi bamohokamedje ko bɛngi bahele na bego dji bobo. Bato batungeamaka na membo mi pita batingoamaka. 19 Ko bato basusu bahombaka ba mobɛndjɛe, modjɔ mo ngulu edaaka emɔti eimana na nde ko abaheledjaka ibo basusu.

20 Yesu aindja batingami ba nde ko abala bo:

«Mongandi ta dii, ino bakwali,

modjɔ mo Bokumu bo Ndjakomba bodii tina e bino!

21 Mongandi, ta dii ino ibia baokakadea ndja edɛdiyeye,

modjɔ mo ogoladeani!

Mongandi, ta dii ino bayeaka biyo edɛdiyeye,

modjɔ mo osɛkɛbini!

22 «Mongandi na ino bia ndelo elonadeani bato, nongo baka satuba na nu baka osingani nongo baka obaleani bobe ta tina e Mwana o moto. 23 Sepani ndelo ebwani modjɔ momina boimea pimboani na sepi, modjɔ mo ta busa iputi inɛnɛ dioambakadeani. Modjɔ mo bakɔkɔ ba bobo banɔngedjaka batɛli* okomondumba momina momɔti.

24 «Endelo ndjokwa ta dii ino badieli, modjɔ mo osiani bodia ibondo di bino ehele!

25 Ndjokwa ta dii ino ibia balumi na igola edɛdiyeye,

modjɔ mo okadeani ndja!

Ndjokwa ta dii ino ibia basɛkɛkɛdea edɛdiyeye,

modjɔ mo odiadeani malaka ko oyeadeani!

26 «Ndjokwa ta dii ino ndelo ebaladea bato basusu bopele tina e bino, modjɔ mo edii oko mondumba momɔti imua mokɔɔkɔ bakɔkɔ ba bobo batɛli ba bokuta!»

27 «Endelo nabalakadea na nu ibia baokakadeani bo: Palani baloni ba bino, kɔɔni mɛko mipele ta dii bato bakaoloneni, 28 djongoani ibia baolakedjakani ko ongɔnɔni tina ebia baonyɔkɔlɔdeani. 29 Moto akaoboma epapata ta mobanga momɔti balea koko mokina; moto akaokatoa simisi mokinea pongono esendja e wɛ. 30 Moto akaowadja eka mopa, moto akaokatoa eka e wɛ pɛpɛ bosweana na nde. 31 Kɔmeani bato bakina oko mondumba mopalakadea ino baokɔmeeni*. 32 Okapalani ibibi baka opaleni, tɛtɔ ndani ediiadea ino? Bato ba pekato pongono bakapale boto ibia bakapale! 33 Ko okakɔɔni bopele oto ta dii ibia bakaokɔeni bopele, tɛtɔ ndani ibwani ino bodia? Bato ba pekato bo bɛɛnɛ bakakɔe koko iboa! 34 Ko okabekedjani leka ta dii bato ibibi babwani bosɔmbedjani, tɛtɔ ndani ebwani ino bodia? Bato ba pekato bakabekedje leka pongono a di bato ba pekato na elɛndɛ ebo ba basɔmbedjabi! 35 Endelo ino palani baloni ba bino, kɔɔni bopele ko bekedjani na pɛpɛ bosɔmbedja. Iboa, ibondja i bino idaadea inɛnɛ odaadeani bana ba Onɔi Diko, modjɔ mo iyo adii mopele ta dii bato bakadae pɛpɛ bosɔmbedja bopele bo moto na ta dii bato babe. 36 Sangwanu adii molumake na bwela*. Ino pongono daani ondingo iyo.»

37 «Pɛpɛ bosambedja minɔ moto modjɔ mo basaosambedja wɛ pongono; pɛpɛ bodumba minɔ moto na ikambo basaodumba wɛ pongono. Yɛɛni bato bakina ko baoyɛɛdeani. 38 Pani bato leka ko baopadeani leka, aisadea ta mabenga ma bino leka lonɛnɛ alodɛsɛdea alosueyadea bɛngi lolume botɔɔ, ko losopeane. Modjɔ mo aopadeani oko ndenge emɔti ekapɛ ino binanu.»

39 Yesu abatɔndea naikina ekuanedji emɔti bo: «Moto omɔti o miso mago abwani koko boinedja minande o miso mago ndjea? Ibo basusu babae batakwadea ta mombɔndɔ? 40 Pɛpɛ nongo motingami omɔti anɔi molehi o nde, endelo motingami iyoyo oikoi bopele bileho bisusu bi molehi abwani bobwana na molehi o nde. 41 Tina ndani oɛnɛkɛdea ebumbu e epɛtɛ edii ta diiso di mwangwao, ko otaɛnɛkɛdea ibaya isulu idii na wɛ ta diiso? 42 Ndenge ndani ebwani wɛ bobala na mwangwao bo: "Maninga, amba nadongedje ebumbu e epɛtɛ edii ta diiso di wɛ", ekahia wɛ mɛnɛ otaɛnɛkɛdea ibaya i sulu idii ta diiso di wɛ? Moto o ndango e mongi, dongedja boso ibaya isulu idi ta diiso di wɛ, ko oɛnɛdea bopele bɛngi odongedje epɛndjɛ e epɛtɛ edii ta diiso di mwangwao.»

43 «Mole mopele temobote mbuma djibe, ko mole mobe temobote mbuma djipele. 44 Modjɔ mo mole na mole mokadjebame na mbuma djimu, tebatswɛ mbuma dji pigi* ta mole mo ndjubɛ, tebatswɛ mbuma dji vino ta mole mo kwɛ*. 45 Moto mopele akainedje mɛko mipele imimi midii ta molema mo nde; moto mobe akainedje mɛko mibe imimi midii ta molema mo nde mobe. Modjɔ mo, monɔkɔ mo moto na moto mokaimedje midjɔ miluma ta molema mo nde.»

46 «Tina ndani okabeenini "Kumu, Kumu", ko tosumeni mɛko mi mbi? 47 Nadii boinedjani moto ndani obwani na iyoo odii badoa ta dii mbi, aoki mibalo mi mbi ko amiisi ta mosala: 48 moto omina abwani na moto iyoyo opika ndako; alongea mombɔndɔ mombɛngɛ ko angɔdjɔ moboku ta ndeke. Ehole eduaka pela, madiba malumaka ta ndako, endelo ndako eikwaka, modjɔ mo epikamaka bopele. 49 Endelo moto okaoke mibalo mi mbi ko tamise ta mosala abwani na moto iyona opiki ndako diko di kpɔtɔ, pɛpɛ boisea moboku. Ko ta ndelo esadoa pela akwea ta ndako emina pɛpɛlɛ mɛnɛ ndako emina ekwa, ko ebukeani bobuke mɛnɛ.»