1 Yesu, aluma na Mwembo Mosɛnɔke, adonga ta Yɔlɔdane, ko Mwembo mo moloma ta etengelenge. 2 Iho, amekama na djabulu masu tuku inɛi. Aiyakaka eka emɔti ta masu mamina, ngɔngɔ dji masu mamina, aoka ndja. 3 Iboa djabulu abala na nde bo: «Wɛ okadaa Mwana o Ndjakomba, bala na ibanga ididi dikindoe ipa.» 4 Yesu amosɔmbedja bo: «Eekomama bo: "Moto abwaniti bohela oto na *mwɛmbɛ."»

5 Djabulu akɛɛ na nde ta diko, amoinedja mbala emɔti bokumu bosusu bo kpɔtɔ, 6 ko djabulu na nde bo: «Naopadea bokondji ibubu bosusu ko na ekumu ko na bodieli bo bokumu ibu: midjɔ mia misusu mipama na mbi ko nabwani bomipa na moto yona opali mbi. 7 Okakwa magbunda ta boso bo mbi, leka ilulu losusu lodaadea lo wɛ.» 8 Yesu amosɔmbedja bo: «Ekomama bo: "Okumeadea Kumu Ndjakomba* o wɛ, ko omosaleadea oko iyo mɛnɛ."»

9 Naikina, djabulu amotomba ta Yelusalɛmɛ, amobakei ta sɔngɔ e tepelo, ko abala na nde bo: «Wɛ okadaa Mwana o Ndjakomba, sadumba donga iyaya mbunoko ta kpɔtɔ; 10 modjɔ mo ekomama bo: "Ndjakomba alomadea babwɛndi ba nde bɛngi baobanee." 11 Ko na ikina: "Baokaabi na mɔmɔ ma bobo, bɛngi bo egbota e wɛ edae pɛpɛ bota ibanga*."» 12 Yesu amosɔmbedja bo: «Eekomama bo: "Pɛpɛ bomeka Kumu Ndjakomba o wɛ." » 13 Aɛnɛ djabulu bo ameki Yesu na mindumba misusu, aso amokina bɛngi aambe ehole ekina.

14 Iboa Yesu aluma na ngulu e Mwembo Mosɛnɔke, asɔmbɔ ta Galileya. Ko gala e nde enangana ta ekenge e mokili momina mosusu. 15 Alehaka ta ndako e miɔngɔnɔ e bobo ko bato basusu bamokumedjaka.

16 Yesu aimeaka ta Nadjalɛtɛ, ta ngando iyeye ekandoama yo. Ta busa bo sabata, akwea ta ndako e miɔngɔnɔ e Bayudha bobwana na momɛsɛno mo nde. Aangɔkɔ ta tina e bolanga. 17 Ko bamopa buku e motɛli Isaya, aediipoa ta ekenge iyeye ekomama bo:

18 «Mwembo mo Kumu modii ta dii mbi,

modjɔ mo ahɔɔini tina e botɔndea bakwali Bwɛndi Bopele.

Alomani tina e botɔndea bato ba bɔlɔkɔ bo baimanabi ta bɔlɔkɔ,

ko bato baagwa miso bo basɔmbɔbi boɛnɛ,

bolwɛ bato badi bonyɔkɔmɔ bosɔmi,

19 botɔndea bato bo yanga iyeye Kumu ainedjadea bopele bo nde*.»

20 Ko Yesu akunda buku, ko aepa ta dii mosali ko adaa na mobondo. Bato basusu ta tei e ndako e miɔngɔnɔ e Bayudha miso ma bobo madaaka mamoindja. 21 Iboa, abanga bobatɔndea bo: «Busa ibubu, Ikomi idii ikokedjami ta dii ino ibibi baokakadea busa ibubu.» 22 Bato basusu badaaka babala tina e nde, bakamoaka na mɛko mipele imimi mimanaka ta monɔkɔ mo nde, ko babalaka bo: «Iyoyo te mwana o Yosepu?» 23 Yesu abala na bu bo: «Sooti mɛnɛ olangeadeanini ekuanedji iyeye: "Monganga, saheledja wɛ mɛnɛ." Obaladeani na mbi pongono: "Iso lookabi misusu minɔkɔ ta Kapalanaume saheledja, kokedja midjɔ mimina misusu iyaya, ta ngando e wɛ mɛnɛ."» 24 Ko abakeaka bo: «Naotɔndekadeani sooti bo te badhimee motɛli ta ngando e nde. 25 Sooti mɛɛnɛ, naotɔndeini bo bali bagwa na baami badaaka banɛnɛ ta Isalɛlɛ ta ndelo e Eliya, ehole ediipama busa mbuwa aikwaka bonɔ bianga bisato na mboka ko ndja enɛnɛ edaaka ta mokili* mo mina mosusu. 26 Enakoboa, Ndjakomba ailoma Eliya adii mwali omɔti ta tei e bobo endelo akɛɛ ta dii mwali ogwa na moomi ta ngando e Salepeta ta ekenge e mokili mo Sidona*. 27 Bato ba mabha badaaka banɛnɛ ta Isalɛlɛ ta ehole e motɛli Elisa, ko pɛpɛ moto omɔti osɛnɔ na mabha ma nde, dongedja oko Namana, moto o Siliya*.»

28 Iyaya aoka bo mɛko mimina, bato basusu baluma na kɛlɛ ta tei e ndako e miɔngɔnɔ e Bayudha. 29 Baangɔ diko, ko bamobengana ta ngando, ko bakɛɛ na nde mbunoko ta sɔngɔ e ikoli ta esika etongama ngando e bobo tina e bomodumba ta kpɔtɔ. 30 Endelo iyo, anɔi ta ndanda e bobo ko aso akɛɛ.

31 Yesu atiti naikina ta Kapalanaume, ngando emɔti enɛnɛ e Galileya; adaaka aleha bato ta busa bo sabata*. 32 Bato bamokaka badaaka bakamoa na mondumba mo nde mo boleha, modjɔ mo bo adaaka abala na kpati esusu. 33 Ta ndako e miɔngɔnɔ e Bayudha, edaaka ena moto omɔti iyoyo odaaka na mwembo mo pita. Agama na ngulu bo: 34 «Aa! Yesu o Nadjalɛtɛ, modjɔ mo wɛ na su nda? Odoi tina e bolobedja? Naodjebaka bopele: Mosɛnɔke o Ndjakomba!» 35 Yesu agamea mwembo mobe; ko amolomi: «Dipa monɔkɔ mo wɛ ko imana ta dii moto iyoyo!» Mwembo mobe modumba moomi omina ta kpɔtɔ ta ndanda e bato, ko moimani ta tei e nde ko moimokɔ bobe. 36 Bato basusu bakamoa bobuke mɛɛnɛ ko basawadjaka ibo na ibo: «Iyeye ndenge mɛko nda! Moto omina aimedjakadea membo mi pita na kpati ko na ngulu ko membo mibe mimanakadea!» 37 Ko gala e Yesu enangana ta bisika bisusu bi ekenge e mokili emina.

38 Yesu aimana ta ndako e miɔngɔnɔ e Bayudha, akwea ta ndako e Simona. Bokiyo bo mwali o Simona adaaka na pɛpɛlɛ epipo, ko bamowadja bo akɔe moo eka tina e nde 39 Yesu angulama mbuti na nde, ko agamea pɛpɛlɛ. Ko pɛpɛlɛ emokina, na mbala emɔti asangɔdjɔ, ko abanga bobakɔmedja.

40 Ta ehole e mɔkɔmɔkɔ*, bato basusu badaaka na bato ba bego dji mindumba misusu badoa na bu ta dii Yesu. Abakea mabɔ ta dii moto na moto ko abaheledjaka. 41 Membo mibe pongono mimanaka ta dii bato banɛnɛ, ko migamaka bo: «Wɛ odii Mwana o Ndjakomba!» Endelo Yesu abasia na ngulu badae pɛpɛ bobala, modjɔ mo badjebaka bo iyo adii Kilito.

42 Iyana aya busa, Yesu aimana ko akɛi ta etengelenge. Emumu e bato bamohombaka; bamotanea ko bamekaka bomosiya bo adae pɛpɛ bo bakina. 43 Endelo abala na bu bo: «Etungi na mbi botɔndea Bwɛndi Bopele bo Bokumu bo Ndjakomba ta ngando djinɛnɛ dji kina pongono modjɔ mo nalomama na tina emina.» 44 Ko atɔndɔkɔ Bwɛndi Bopele ta ndako dji miɔngɔnɔ dji Bayudha ba Yudhea.