1 Yesu aputwanedja *batingami ba nde doomi na babae ko abapa ngulu ko na kpati e bobengana membo mibe misusu ko boheledja bato ba bego. 2 ko, abaloma atɔndea bato Bokumu bo Ndjakomba ko na boheledja bato ba bego. 3 Abatɔndea bo: «Pɛpɛ botombani nongo eka emɔti ta mɔɔngɔ: edae pango, tɔmbi, mwɛmbɛ, palanga, moto omɔti pɛpɛ botomba bisendja bibae. 4 Okakweani ta ndako emɔti, dikamani oko ena tee mbunoko okakinani esika emina. 5 A pamba djisusu bato bamiti pala boasɔni, dongani ta ngando emina ko bhubholani bigbota* bi bino: edaabi embete e tati tina e bobo.» 6 Batingami bakɛɛ, banɔɔkɔ ta ngando na ngando, batɔndɔkɔ Bwɛndi Bopele ko baheledjaka pamba djisusu bato ba bego.

7 Elode okondjaka ena, aoka midjɔ misusu minɔɔko. Ko asayekea bobuke mɛɛnɛ, modjɔ mo bato bakina babalaka bo: «Iyona edii Yoane Mobatisi asisoi ta bogwa.» 8 Bakina bato babalaka bo: «Edii Eliya iyo asɔmbi na ikina.» Bato bakina koko babalaka bo: «Edii omɔti o batɛli bayou asisoi ta bogwa.» 9 Elode abala bo: «Mbi mɛɛnɛ nalenedja molo mo Yoane. Moto iyoyo okaka mbi gala dji nde adii nda?» Ko ahombaka amoɛnɛ.

10 Bapɔsɔlu bahula ko badjebedja Yesu midjɔ misusu mikɔɔkɔ ibo. Abatomba ko asasua na bu ta dɔɔngɔ, di ngando enɛnɛ iyeye ebeaka bo Betesaida. 11 Emumu e bato badjeba ko bamokimana. Yesu aba asɔɔ , ko abalaka na bu tina e Bokumu bo Ndjakomba ko aheledjaka ibibi badaaka na posa e mohelo. 12 Busa boimei mɔkɔmɔkɔ, bapɔsɔlu doomi na babae babatama mbuti na Yesu ko babala na nde bo: «Yanedja emumu iyeye e bato, ta ngando ko ta miyako imimi madii mbuti mbuti bɛngi badie mia ma boyaka, modjɔ mo lodii ta etengelenge.» 13 Endelo Yesu abala na bu bo: «Ino bɛɛnɛ bapani mia ma boyaka!» Basɔmbedja bo: «Lodii oto na mapa matano ko na swi babae. Emekande iso bɛnɛ bokɛɛ asomba mia tina e boyedja bato ibibi basusu.» 14 Modjɔ mo bato baami badaaka ena mbuti na koto itano. Yesu abala na batingami ba nde bo: «Badedjani na mbondo bato mbuti na tuku itano tuku itano.» 15 Batingami basumia ko badedja bato basusu na mbondo. 16 Yesu atomba miɛmbɛ mitano ko swi babae, angɔdjɔ miso ta busa ko asakoa Ndjakomba tina e miya mamina. Alobukaka ko alopa ta dii batingami bɛngi bakabane na emumu e bato. 17 Moto na moto ayaka ko agola. Ko baandoana bikenge idjia djidika ko balumedja mitinga doomi na mibae*.

18 Busa bomɔti, Yesu angɔnɔkɔ tɔtɔkɔ ko batingami badaaka mbuti na nde. Iyo abawadja bo: «Emumu e bato bakabale bo mbi nadii nda?» 19 Bamosɔmbedja bo: «Bato bakina bakabale bo wɛ odii Yoane Mobatisi; bakina bo wɛ Eliya, ko bakina pongono bo odii omɔti o batɛli bayou iyoyo osisoi ta bogwa.» 20 Yesu abawadja bo: «Ko ino bɛɛnɛ, okabaleni bo mbi nadii nda?» Petelo amosɔmbedja bo: «Wɛ odii Masiya o Ndjakomba.»

21 Yesu abasia na bobuke mɛɛnɛ bo badae pɛpɛ botɔndea moto, 22 ko Yesu abala naikina bo: «Etungi na Mwana o moto aoke saya enɛnɛ; basuku, banganga ba Ndjakomba banɛnɛnɛnɛ ko balehi ba mobeko bamodumbadea, bɛngi agwɛ ko ta disu di basato, asisoadea ta bogwa.» 23 Yesu abala na ibo basusu bo: «Moto akapala bokimanani, asalone iyo mɛɛnɛ, ko atombe ekulusu e nde busa na busa, ko akimaneni. 24 Modjɔ mo, moto iyona opaladea boheledja bomɔ bo nde abobungedjadea; endelo iyo obungedjadea bomɔ bo nde tina e mbi aboheledjadea. 25 Ebwani bokɔɔmɔ na moto nde akatomba ngondo esusu, ko abungedji bomɔ bo nde ko asabedji iyo mɛnɛ? 26 Modjɔ mo, moto iyona ookeabini sɔni ko mobalo mo mbi, Mwana o moto pongono amokeabi sɔni, ehole edowabi iyo ta ekumu ende ko na ekumu e Sange e nde ko e babwɛndi basɛnɔke. 27 Naotɔndɔkɔni, sooti bo: bakina bato ta tei e ibibi badii iyaya, bagwɛtebi boso pɛpɛ boɛnɛ Bokumu bo Ndjakomba.»

28 Ngɔngɔ dji masu bomwambe asidja iyo bobala iboa, Yesu atomba Petelo, Yoane ko na Djake, ko aso aiwei ta moono tina e boangɔnɔ. 29 Ehole edaaka iyo aangɔnɔ, boso bo nde bosɔmbɔtɔnɔ na mondumba mokina ko esendja e nde eimea epu ipɛɛ. 30 Ko na mbala emɔti edaaka ena na baami babae basolaka na nde: edaaka Mose na Eliya, 31 baimanaka na ekumu, babalaka ta tina e bokɛɛ bo nde ibubu bokokedjamadea ta Yelusalɛmɛ. 32 Petelo na binande bawɛɛ hiɔ ipipo; ehole esisoa bo baɛnɛ ekumu e Yesu ko na baami babae ibia baemaka na nde esika emɔti*. 33 Ehole ebɔtɔkɔ bo na Yesu, Petelo abala bo: «Molehi, edii bopele lodae iyaya. Lopike bikpangba isato, emɔti tina e wɛ, emɔti tina e Mose, ko emɔti tina e Eliya.» Endelo aidjebaka mɛko mibalaka iyo. 34 Ehole edaaka iyo abala boa, itute imɔti idoa abadipa na esii* edu. Batingami baluma na bɔɔ ndelo ebahuaka itute imina. 35 Ko ta tei e itute kɔpi emɔti, ebala bo: «Iyo adii Mwana o mbi, iyoyo ohɔɔ mbi. Mookeani!» 36 Ehole eokama kɔpi emina baɛnɛ oto Yesu iyo mɛnɛ. Batingami badikama bogoo, ko andelo emina, baitɔndea nongo moto omɔti midjɔ miɛnɛ bo.

37 Amaka yaa busa, batita ta moono ko emumu e bato edoasongana na Yesu. 38 Ta ndanda e emumu e bato bamina, moto omɔti agama bo: «Molehi, naoangɔnɔkɔdea, indjeani mwana iyoyo o mbi, adii mwana o mbi moomi omɔti! 39 Mwembo mobe mokamopee, akalɛbe, mokamosendjodje ko na mbala emɔti akaimedje mapuli ta monɔkɔ, ko te momokine pɛpɛlɛ. 40 Nangɔnɔki batingami ba wɛ bɛngi babengane mwembo momina, endelo bahɔniti bomobengana.» 41 Yesu abala bo: «Mbota ebe ko badiiti na bodhima! mbunoko ndelo ndani ediikamabi mbi na nu? Ko mbunoko ndelo ndani ebwanimbi boita midjɔ mi bino? Dowa na mwana owɛ iya.» 42 Ndelo eimea mwana mbuti na Yesu, mwembo mobe mo modumba a kpɔtɔ ko mo modjongedja na ngulu mɛnɛ. Endelo Yesu agamei mwembo mo pita, ko aheledja mwana ko aso amopa a di sange ende. 43 Ko bato basusu bakamoa na ngulu enɛnɛ e Ndjakomba.

Abo moto mosusu akamoaka na midjɔ misusu mikɔkɔ Yesu, abala na batingami bande bo: 44 «Okani bopele mɛko mipalaka mbi naotɔndeni edɛdiyeye: Mwana o moto akabamadea a mabɔ ma bato.» 45 Endelo batingami baisipoaka tina e mɛko mimina: midika adi bo mobombamo bɛngi badae pɛ bosipoa tina; ko badaaka na bɔɔ bo bowadja Yesu modjɔ momina.

46 Batingami basatubanaka bɛngi badjebe moto ndani onɔi monɛnɛ a ndanda e bobo. 47 Yesu adjebaka midjɔ midaka bo balɛnɛ. Atomba mwana omɔti, amoemea mbuti na nde, 48 ko abala na bu bo: «Moto iyo oasɔi mwana yo a kombe e mbi, asɔi mbi mɛnɛ; ko iyona oasɔini, asɔi pongono Iyona olomani. Modjɔ mo moto onɔi bokɛkɛ ta tei e bino, iyo anɔi monɛnɛ.»

49 Yoane atombi kɔpi, abala: «Molehi, loɛnɛki moto omɔti adaki abengana membo mibe na kombe ewɛ ko lohombaki lomosie, modjɔ mo adiiti na su engbanga emɔti.» 50 Endelo Yesu amosɔmbedja bo: «Pɛpɛ bomosiani, modjɔ mo moto odaaka pɛ boolonani adi moto obino.»

51 Ndelo ebatama masu ma Yesu bɛngi aiwee ta busa, akana bo akɛe a Yelusalɛmɛ. 52 Alomaka bato ba elomu ta boso bo nde. Bato bamina bakɛɛ ko bakwea a ngando emɔti e Samalia bɛngi bo basɛlingoe bodoa bo nde. 53 Endelo bato ba ngando emina balona bomoasɔ modjo mo akɛɛkɛ a Yelusalɛmɛ. 54 Ehole eoka batingami Djake na Yoane iboa, baso babala: «Kumu, opalaka bo lobee mosa modonge a diko tina ebotumba* bato bamina?»

55 Endelo Yesu ahekoa adi bo ko aba dosi. 56 Ko bakɛɛ ta ngando ekina.

57 Ehole edaka bo bakɛɛkɛ akɛe a ndjea, moto omɔti abali na Yesu bo: «Mbi naokimanadea a bisika bisusu bikɛɛkɛ wɛ.» 58 Yesu amosɔmbedja bo: «Bibanga badi na mabikoa ko mbulu ba diko badi na moopo, endelo Mwana o moto aditi na esika e bosama kona bosamehedja.»

59 Abali na moto okina bo: «Kimanani.» Endelo moto omina amosɔmbedja bo: «Kumu kinani napetekɛɛ apusea sange embi.» 60 Yesu amosɔmbedja bo: «Yɛɛ bo bato bago bapuseane ibo na ibo; endelo wɛ, kɛɛ atɔndee Bokumu bo Ndjakomba.»

61 Okina moto omɔti pongono abali na nde bo: «Kumu, naokimanadea, endelo kinani nongo nakɛe aiseana na denga di mbi.» 62 Yesu amosɔmbendja bo: «Moto yo opeli kongo bɛngi aone dona ko aindji ngɔngɔ, abwaniti na Bokumu bo Ndjakomba.»