1 52 Eyenga e mapa imimi ma pɛpɛ levile ekabee ibo Pasika, ebatamaka*. 2 Banganga ba Ndjakomba banɛnɛnɛnɛ ko balehi ba mobeko bahomba ndjea e boowa Yesu, endelo badaaka na bɔɔ bo bato.

3 Iboa Satana akwea ta dii Yudhasi, iyoyo obeaka ibo Isikaliote, iyo adaaka ta tei e batingami doomi na babae. 4 Akɛɛ asola na banganga ba Ndjakomba banɛnɛnɛnɛ ko babanei ibia basɛndjɛlɛkɛ tepelo bɛngi adie mwɛngi mo bokaba Yesu. 5 Ibo basepa ko bamodikanedja bo bamopɛ palanga. 6 Yudhasi adhima ko abanga bohomba ndjea epele ebwanaka na nde bokaba Yesu bɛngi emumu edae pɛpɛ bodjeba.

7 Busa bo mapa ma pɛpɛ levile, botungamaka boowa bana ba bhata tina e Pasika, boimea. 8 Yesu aloma Petelo na Yoane ko abala na bu bo: «Kɛɛni alobɔngedja mia ma Pasika*» 9 Bamowadja bo: «Apalakadea wɛ lokɛe aebɔngedja djɔ?» 10 Abasɔmbedja bo: «Ndelo eimeadea ino ta ngando enɛnɛ, osonganadeani na moomi omɔti iyoyo apeli mondungulu mo madiba. Mokimanani ta ndako iyeye ekweadea iyo, 11 ko tɔndeani moswa ndako bo: "Molehi aowadjakadea bo: ekenge e ndako eyakadea mbi Pasika na batingami ba mbi edo?" 12 Ko aoinedjadeani ta ndako o diko ekenge e ndako enɛnɛ edii ebɔngedjamake. Iyena edii polo ebɔngedjadea ino mia.» 13 Bakɛɛ, ko batanea midjɔ misusu oko mondumba mobalaka Yesu, babɔngedja mia ma Pasika.

14 Aimea ehole emina, adaa ta mesa na bapɔsɔlu ba nde. 15 Abala na bu ibo: «Mbi nadaakabi na posa enɛnɛ e boyaka na nu mia ta Pasika iyeye boso bo boɛnɛ saya! 16 Modjɔ mo, naotɔndeakadeani sooti bo nitaeyakebi na nu naikina mbunoko ekokedjame ta Bokumu bo Ndjakomba.» 17 Iboa atomba keni, asakoa Ndjakomba ko abala bo: «Tombani keni iyeye ko kabanani ta tei e bino; 18 Nabalakadea na nu sooti bo, banga busa ibubu namwaketebi naikina vino iyeye mbunoko busa bodoabi Bokumu bo Ndjakomba.»

19 Ngɔngɔ djimina atomba mapa ko asakoa Ndjakomba, abuka ko apa batingami ba nde, abala bo: «Iyeye edii mokuku mo mbi imumu mokabamadea tina e bino. Kɔɔkɔni boa tina e bolɛdjɛnini.» 20 Ta tina e keni akɔɔ oko mondumba momɔti, ngɔngɔ dji boyaka abala bo: «Keni iyeye edii mokongo mo yeene mo makiya ma mbi, masopea tina e bino. 21 Endelo indjani: moto okabadeani adii na mbi* ta mesa emɔti! 22 Sooti mɛnɛ, Mwana o moto adii bogwa bobwana na mbuno e Ndjakomba; endelo ndjokwa ta dii iyona omokabadea!» 23 Ko babanga bosawadjana bɛngi badjebe moto ndani iyoyo okɔɔdea modjɔ momina.

24 Batingami basweana bɛngi badjebe moto ndani onɔi na monɛnɛ ta ndanda e bobo. 25 Yesu abala na bu bo: «Bakondji ba bikomi ibia bakakondje bato ko ibia bakainedje kpati dji bobo bakapale bobabea bato bapele. 26 Endelo etabɔngɔ edae iboa ta dii ino. Ta ndanda e bino moto onɔi atungi adae odingo yɛngɛ mokɛkɛ, ko iyona okondjakadea bato atungi adae mosali. 27 Modjɔ mo moto onɔi monɛnɛ, idii iyona odii ta mesa, kaoko iyona okɔmedjakadea? Editi iyona odii a mesa? Endelo mbi nadii ta ndanda e bino odingo mosali o bino! 28 Ino odaakini bato kaika milema bihole bisusu bidaaki mbi ta mameko. 29 Ndenge emɔti epani Sesa Bokumu mbi pongono naopini, 30 iboa oyakabini ko omwabini na mbi ta mesa e mbi ta Bokumu bo mbi ko odaabini ta kiti dji bokumu tina e bodaledja mabota doomi na mabae ma Isalɛlɛ.»

31 «Simona, Simona! Hokamedja: Satana awadji ndjea bɛngi aomeke ondingo mondumba mokanyɔngɛle bo mbuma dji ble. 32 Endelo mbi, naangɔnɔki tina e wɛ bo edhimeli e wɛ esa kwa. Ko ndelo eangodea wɛ ta edhimeli, oma pingedja bana ba ngwao.» 33 Endelo Petelo abala na nde bo: «Kumu, mbi nadhimi bokwea ta bɔlɔkɔ ko bogwa engbanga emɔti na wɛ.» 34 Yesu amosɔmbedja bo: «Petelo, naotɔndeakadea bo, boso bo kɔkɔ bobekoa busa ibubu mɛnɛ oinganadeani mbala djisato.»

35 Yesu abala na bu naikina bo: «Ehole eolomakani mbi bo, pɛpɛ botombani mosenge, tɔmbi, sapato, eka mɛnɛ ndani etaka ino?» Bamosɔmbedja – «Pɛpɛ nongo eka emɔti». 36 Iboa abala na bu bo: «Edɛdiyeye edii mondumba mokina, moto odii na palanga, adjitombe, ndenge emɔti na iyona odii na tɔmbi, aetombe, ko iyona otaki mopata, etungi atɛke kasaka e nde bɛngi asombe mopata momɔti. 37 Modjɔ mo, naotɔndeakani sooti bo, etungi ekokedjame ta dii mbi mobalo mokomama bo: "Bamoisa engbanga emɔti na bato babe*." Bɛngi eka esusu ekomama tina e mbi ekokedjame.» 38 Batingami babala bo: «Kumu, indja, mipata mibae imimi.» Iyo abala na bu bo: «Mibwani oko boa!»

39 Yesu aimana ko akɛɛ ta ngomba e mele mi Olive ndenge edaaka momɛsɛno mo nde. Batingami ba nde bamokimana. 40 Ehole aimea iyo ta esika emina, abala na bu bo: «Angɔnɔni bɛngi odaeni pɛpɛ bomekama.» 41 Ngɔngɔ djimina asasua na batingami ba nde ko akwa magbunda, ko aso angɔnɔ bo: 42 «Sesa, okapala, dongedja mbuti na mbi keni iyeye e saya. Pɛpɛ bokɔɔ bolulea bo mbi, yɛɛ bo bolulea bo wɛ bokɔɔme.» [ 43 Iboa obwɛndi omɔti adongi ta diko adoa tina e bomopingedja molema. 44 Yesu aoka manene mɛnɛ, ko angɔnɔkɔ naikina na ingbangba inɛnɛ. Bidjungu bitangaka na nde ondingo makiya ko djiakwa ta kpɔtɔ.]

45 Amaka iyo madja boangɔnɔ, aangɔ ko akɛɛ ta dii batingami ko abatanea bawɛli, modjɔ mo ndjokwa e banɔɔkɔ. 46 Abawadja bo: «Ino owɛlini oko hio? Angɔni ko angɔnɔni bɛngi bo adaeni pɛpɛ bomekama.»

47 Oko ta ndelo ebalaka iyo emumu e bato emoimanea. Yudhasi, omɔti o batingami doomi na babae, adaaka boso. Abatama mbuti na Yesu bɛngi amopɛ ekɔpi. 48 Endelo Yesu abala na nde bo: «Yudhasi, okabakadea Mwana o moto na bomodinga ekɔpi?» 49 Ndelo eɛnɛ bato badaaka na nde midjɔ mimina baso bamowadja bo: «Kumu obwani bopala lobabome na mipata?» 50 Ko omɔti o bobo alena mosali o mokondji o banganga ba Ndjakomba itoi di ebɔ e baami. 51 Endelo Yesu abala bo: «Kinani, modjɔ mosi.» Apea itoi di moto omina ko itolongana.

52 Ngɔngɔ djimina Yesu abala na banganga ba Ndjakomba banɛnɛnɛnɛ, bakondji ba babanei ba tepelo ko na basuku ibibi badoaka amopea bo: «Edii mbi mokondji o batɔmbɔki bɛngi odoeni ta dii mbi na mipata ko na pengu? 53 Nadaaka na nu masu masusu ta tepelo ko oipeakanini endelo ehole iyeye edii e bino ta bokondji bo bulu.»

54 Bapea Yesu ko bakɛɛ na nde bamokwedja ta ndako e mokondji o banganga ba Ndjakomba. Petelo abakimanaka ko adikaka moo bohali. 55 Balanedjaka mosa ta ndanda e ikanga ko Petelo adaa na mobondo ta ndanda e bobo.

56 Mosali mwali omɔti amoɛnɛ adii na mobondo mbuti na mosa; amokokoledja ko abala bo: «Moto iyoyo adaaka pongono na Yesu!» 57 Endelo amoinganea ko aso abala bo: «Mwali nitamodjebakadea.» 58 Ngɔngɔ djimina, okina amoɛnɛ ko abala na nde bo: «Wɛ pongono, odii omɔti o bato ba nde!» Endelo Petelo asɔmbedja bo: «Ngasa, ediiti mbi.» 59 Ngɔngɔ dji bokimana ngonga emɔti, okina atɛɛ bo: «Edii sooti moto iyoo adaaka na nde, modjɔ mo adii moto o Galileya.» 60 Endelo Petelo asɔmbedja bo: «Nitadjebakadea eka epalakadea wɛ bobala!» Ko ta ndelo iyena abalaka iyo, kɔkɔ abekoa. 61 Kumu ahombana ko akokoledja Petelo. Iboa Petelo alɛnɛ mɛko mimotɔndeaka Yesu bo: «Boso bo kɔkɔ bobekoa busa ibubu oinganeadeani mbala isato bo otadjebakani.» 62 Aimana sokolu ko ayea biyo dji ndjokwa mɛɛnɛ.

63 Bato basɛndjɛlɛkɛ Yesu ba motaka ko bamobomaka. 64 Bamonangaka esendja ta miso ko bamowadjaka bo: «Inedja bo odii motɛli! Bala osa oboma nda?» 65 Ko bamosingaka naikina na mindumba minɛnɛ.

66 Ndelo eya busa, inginda di basuku ba Bayudha, bakondji ba banganga ba Ndjakomba banɛnɛnɛnɛ ko na balehi ba mobeko diputoana. Ko bakɛɛ na Yesu boso bo Ikita dinɛnɛ di bobo, 67 ko baso bamowadja bo: «Wɛ odii Masiya? Lotɔndea.» Abasɔmbedja: «Nakaotɔndeadaeni, otadhimeadeanini, 68 ko nakaowadjadeani, otasɔmbedjadeanini. 69 Endelo banga busa ibubu Mwana o moto adaabi ta ebɔ e baami e Ndjakomba o ngulu*.» 70 Ibo basusu bamowadja bo: «Wɛ odii Mwana o Ndjakomba?» Iyo abasɔmbedja bo: «Ino obalini eka edii mbi.» 71 Ibo babala bo: «Tina ebwani nasu bohomba naikina tati nda? Iso bɛnɛ looki ta monɔkɔ mo nde iyo mɛnɛ!»