1 Yesu akwea ta Yeliko, ko aso anɔɔkɔ ta ngando enɛnɛ. 2 Moomi omɔti adaaka ena kombe e nde Djakayo; adaaka mokondji o baputedji ba puti ko adaaka modieli. 3 Adaaka na posa e boenɛ Yesu, endelo aihɔnɔ bomoɛnɛ, tina e emumu e bato ko adaaka mokuwe. 4 Apotia ebango akɛi boso ko aiwei ta mole mo sikomɔle,* bɛngi amoɛnɛ modjɔ mo Yesu anɔdea ta ndjea emina. 5 Ndelo eimea Yesu ta esika emina, angɔdjɔ miso o diko ko abala na nde bo: «Djakayo tita pɛpɛlɛ, etungi busa ibubu na yeyoe ta ndako e wɛ.» 6 Djakayo atita pɛpɛlɛ ko amoasɔ na mongandi monɛnɛ. 7 Amaka ɛnɛ bato iboa, ibo basusu banungunaka; babalaka bo: «Indja moto iyoyo akɛi ayeyoa ta ndako e moto o pekato!» 8 Endelo Djakayo, angɔ diko, abala na Kumu bo: «Kumu, nakabanadea bodieli bo mbi ndanda iboa napadea ekenge emɔti ta dii bakwali, ko nakabhubhea moto na eka e nde, namosɔmbedjadea mbala inɛi.»* 9 Yesu abala bo: «Busa bu, mohelo modoi ta ndako iye, modjɔ mo iyo adii, pongono, motitani o Abalayama. 10 Modjɔ mo Mwana o moto adoa ahomba ko aheledja ibibi babunga ndjea.»

11 Iboa aoka bato mɛko mimina Yesu abala naikina ekuanedji emɔti. Modjɔ mo adaaka mbuti na Yelusalɛmɛ ko bato Balɛnɛkɛ bo Bokumu bo Ndjakomba bowani boimea gbundumo. 12 Iboa Yesu abala na bu bo: «Moto omɔti o ibota di bakulaka akɛɛkɛ a ekomi ekina e bohali ko iho bamohɔdea mokondji; ngɔngɔ djimina aso ahule. 13 Abea basali ba nde doomi ta tei e basali ba nde, abapa pata doomi dji wolo ko abala na bu bo: "Kɔɔni mombongu na palanga djimina mbunoko ta ihule i mbi." 14 Endelo bato ba ekomi e nde bamokea swɛ; baloma bato bakina ngɔngɔ dji nde abala bo: "Iso lotapalakadea moto omina adae mokondji o biso." 15 Ta ihule i nde ngɔngɔ i bomopa bokondji. Abea basali ba nde ibia bapa iyo palanga, bɛngi adjebe eka ndani ebakea ibo. 16 Mosali o boso adoa ta di iyo ko aso abala bo: "Kumu, nabakei pata doomi." 17 Kumu amosɔmbedja bo: "Edii bopele, odii mosali mopele; modjɔ mo odaaki na iyɔngi ta midjɔ mikɛkɛkɛkɛ, naohɔi okondje ngando inɛnɛnɛnɛ doomi." 18 Mosali o babae adoa ko abala bo: "Kumu, nabakei pata i wolo djitano." 19 amosɔmbedja bo: "Ko wɛ pongono, naohɔi okondje ngando inɛnɛnɛnɛ itano." 20 Mosali okina adoa ko abala bo: "Kumu, indja pata e wɛ e wolo iyeye; naenanga na esendja ko naso naebomba." 21 Nadaaka na bɔɔ bo wɛ, modjɔ mo odii moto o midjɔ mipipo, okatombe leka ta esika edai wɛ pɛpɛ bosambea, okabuke kona ta esika edai wɛ pɛpɛ boona. 22 Kumu amosɔmbedja bo: "Odii mosali mobe, mbi naosambedjadea bobwana na mibalo mi wɛ. Odjebaka bo nadii moto o midjɔ mipipo, nakatombe leka ta esika edai mbi pɛpɛ bosambea ko nakabuke kona ta esika edai mbi pɛpɛ boona. 23 Iboa, tina ndani oisabi palanga dji mbi ta ndako e mbombi e palanga?* Ta ihule di mbi, nabwanaki bokɛɛ atomba na mo mweka okina o diko." 24 Ngɔngɔ djimina abala na bato badaaka ena bo: "Mokatoani pata e wolo emina ko epani na iyona odii na pata doomi." 25 Ibo bamotɔndea bo: "Kumu, iyoyo adii boso na pata doomi!" 26 – "Nabalakadea na nu bo: moto odii na eka bamopabi na bonɔ; endelo iyoyo odii pɛpɛ bopea eka bamotinoabi nongo moo eka mokɛkɛ iyeye epeli iyo. 27 Ta dii baloni ba mbi ibibi balonabi ibo mbi nitabakondja, doani na bato bamina djɔno ko balenani mɔli iyaya ta miso ma mbi."»

28 Amaka sidja Yesu bobala boa, anɔɔkɔ boso ko akɛi ta Yelusalɛmɛ. 29 Ehole ebatama iyo mbuti na Betepadje ko na Betania, mbuti na ngomba e mele mi Olive, aloma batingami ba nde babae: 30 «Abala bo: kɛɛni ta ngando edii iyaya boso, ehole eimeadea ino ena, kweani otaneadeani mwana o tito okabee bo ane atingi na mokɔli, iyo odii moto pɛpɛ bopeta konda. Motingoani ko hulani na nde. 31 Ko moto akaowadjani bo: "Tina ndani emotingowaka na nu?" Mosɔmbedjani bo: "Kumu akambakadea na nde."»

32 Bato baloma iyo bakɛɛ ko batanea oko mondumba mobalaka iyo na bu. 33 Ehole etingoaka bo mwana o tito okabee bo ane, baswa punda babala na bu bo: «Otingoakadeani mwana o tito okabee bo ane tina nda?» 34 Ibo basɔmbedja bo: «Kumu akambakadea na nde.» 35 Ngɔngɔ djimina, badoa na nde ta dii Yesu; babakea bisendja bi bobo diko di mwana o tito okabee bo ane ko bakondedja Yesu* diko di nde. 36 Abangaka Yesu bodala, bato baandaka bisendja bi bobo na ndjea*. 37 Aimeaka iyo mbuti na botita bo ngomba e mele mi Olive, ndelo emina emumu esusu e batingami ba nde, baluma na mongandi, babanga bokumedja Ndjakomba na miholi mi diko tina e midjɔ mi bokamoa misusu miɛnɛ ibo. 38 Babalaka bo: «Kina bo adjongoame, mokondji iyoyo okɛɛkɛdea adoe na kombe Kumu! Bogo iho o diko ko ekumu ta bisika binɔi diko!»

39 Ndambo e Bapalisai ta ndanda emumu e bato, babala na Yesu bo: «Molehi, gamea batingami ba wɛ.» 40 Yesu asɔmbedja bo: «Nabalakadea na nu bo, nongo ibo bakapɔpɔnɔ, mabanga ma gamadea!»

41 Ehole eimea Yesu mbuti na Yelusalɛmɛ ko aeɛniɛ, ko aso ayeia bio tina e yu, 42 ko abala bo: «Oso djeba midjɔ mibwani boolwɛ bogo busa ibubu! Endelo edɛdiyeye, midjɔ momina midii mibolamake ta miso ma wɛ, obwaniti bomiɛnɛ. 43 Modjɔ mo ehole ekɛɛkɛdea adoe tina e wɛ baloni ba wɛ baemeadea ekuka enɛnɛ tina e boanedja, baohikabi ko baolanedjabi na ekuka pamba djisusu. 44 Baominakakabi, wɛ na bana ba wɛ, ta tei e wɛ, batakinabi nongo ibanga dimɔti diko di ikina ibanga, modjɔ mo odjebiti ndelo edoaki ekamweli e Ndjakomba!»

45 Amaka kweya Yesu ta tepelo abanga bobengana bato ba mimbongu, 46 abala na bu bo: «Ekomama bo: "Ndako e mbi edaabi ndako e miɔngɔnɔ." Endelo ino, oehokodjini esabalaka e bapundji*!»

47 Yesu alehaka masu masusu ta tepelo. Bakondji ba banganga ba Ndjakomba banɛnɛnɛnɛ, ko na balehi ba mobeko, ko babanei ba Bayudha, bahombaka ndjea ebo moowa. 48 Endelo baidjebaka mondumba ndani mobwani nabu bokɔɔ, modjɔ mo bato basusu babaleaka matoi ta dii iyo.