1 Busa bo sabata, Yesu akɛɛkɛ ta dii mobanei omɔti o Bapalisai tina e boyaka. Ibibi badaaka na nde ba mokokoledja. 2 Moto omɔti o mokuku mohaloake adoa aema ta boso bo nde. 3 Yesu awadja balehi ba mobeko ko Bapalisai bo: «Edii ediimamake boheledja moto ta busa bo sabata kaoko ngasa?» 4 Endelo badaa bogo. Iboa Yesu apea moto omina, amoheledja ko amoyanedja. 5 Ngɔngɔ djimina abala na bu bo: «Omɔti o bino akadaa na mwana moomi omɔti kaoko ngɔmbɔ omɔti akwi ta mombɔndɔ, abwaniti bomoimanedja pɛpɛlɛ mɛnɛ, ta busa bo sabata?»* 6 Endelo baihɔnɔ bomosɔmbendja eka emɔti ta modjɔ momina.

7 Yesu aɛnɛ mondumba ndani modaaka bato basweana bisika bi boso. Mbunoko abala na bu ekuanedji iyeye bo: 8 «Ehole ebeami wɛ ta tɛkɛ e moki, pɛpɛ bokɛɛ adaa ta esika e boso. Ebwani boda bo moto okina oonɔi wɛ na gala abwani bodoa koko ena ko baoangɔdji tina e bomopa esika edaaki wɛ, 9 ko iyoyo oobeakini ta tɛkɛ ino basusu babae abwani bodoa aotɔndea bo: "Kinea moto iyoyo esika iyeye." Iboa wɛ odii bokɛɛ, na sɔni enɛnɛ, bokadaa ta edie e suka. 10 Endelo, bakaobea, kɛɛ adae ta esika esuka, ehole edoadea moswa tɛkɛ abaladea na wɛ bo: "Maninga, doa odae ta esika iyeye e gala*." Na mondumba momina, edaabi ta dii wɛ ekumu ta boso bo bato basusu badii na wɛ ta mesa. 11 Modjɔ mo, moto iyoyo odii bosangɔdjɔ bamotitidjadea, ko iyo odii bosatitedja bamoangɔdjɔdea.»

12 Yesu abala naikina na moto iyoyo omobeaka bo: «Ndelo ebɔngedji wɛ mia ma ehuma isa ma midi, pɛpɛ bobeya oto bina wɛ, bangi wɛ, bato ba ibota di wɛ, badieli kaoko mituteano mi wɛ, te ngasa babwani koko bobeya wɛ bɛngi baosɔmbedje leka lo bapa wɛ. 13 Endelo okabɔngedja miya ma tɛkɛ, beya bakwali, bitumbɛ, bato ba biɛmɛ, ko na bato ba miso mago. 14 Odadea na mongandi, modjɔ mo bato bamina badiiti na eka e boosɔmbedja. Modjɔ mo baosɔmbedjabi leka ehole esisoabi bato ba bodju ta bogwa.»

15 Ngɔngɔ dji booka bo modjɔ momina, omɔti ta ndanda e babeami abala na Yesu bo: «Mongandi ta dii iyona oyakabi miya ma nde ta Bokumu bo Ndjakomba!» 16 Yesu amosɔmbedja bo: «Moto omɔti abɔngedja miya ma manɛnɛ ma midi ko aso abea bato banɛnɛ. 17 Aimea ehole e boyaka mia ma midi, alomaka mosali o nde atɔndea bato babea iyo bo: "Doani, modjɔ mo edɛdiyeye leka losusu lobwani." 18 Endelo ibo basusu, moto na moto, asayeana. Iyona o boso abala bo: "Mbi nasombi gbie ko etungi na mbi nakɛe aeindja; naɔngɔni oyɛeni." 19 Iyoyo okina abala na nde bo: "Mbi nasombi ngɔmbɔ doomi ko nakɛɛkɛdea abakokoledja; nasangɔni nawɛ oyɛeni." 20 Iyona okina abala bo: "Nakɛɛkɛdea ahule aasɔ mwali edɛdiyeye, na tina emina, nitahɔnɔ bodoa." 21 Ahula mosali ta dii moswa nde amotɔndea misɔmbedja mimina. Moswa ndako alemoa bobuke ko abala na mosali o nde bo: "Kɛɛ ebango ta ndjea dji ngando enɛnɛ, kona idjidji djikɛkɛkɛkɛ ko doa na bakwali iyaya, bitumbɛ, bato ba miso mago ko na bato ba biɛmɛ." 22 Ngɔngɔ djimina mosali akɛɛ abala na moswa nde bo: "Moswa mbi nakɔi eka esusu elomakini wɛ, endelo bisika bikina bidii oko bwase." 23 Iboa moswa ndako abala na mosali bo: "Kɛɛ ta mokenge ko ta ndjea dji gbie. Ko pingedja naikina bato badoe banɛnɛ bɛngi balume ta ndako e mbi botɔɔ. 24 Modjɔ mo naotɔndeakani bo: pɛ nongo moto omɔti a bato ibibi babeaki mbi boso oyakadea mia ma mbi!"»

25 Bimumu bi bato bidalaka na Yesu ta ndjea. Ahokoa ko aso abala na bu bo: 26 «moto opalakadea bodoa ta dii mbi atungi bopalani bonɔ sango, nango, mwali o nde, baana ba nde, baana ba nango, ngɛnɛ dji nde, na bomɔ bo nde mɛnɛ. Emitidaa iboa, moto omina abwaniti boimea motingami o mbi. 27 Moto odaaka pɛpɛ botomba ekulusu e nde ko akimaneni abwaniti bodaa motingami o mbi. 28 Modjɔ mo moto omɔti ta tei e bino aka kana bo apike ndako e ekpalaka, abwaniti bodaa na mobondo bɛngi alange palanga djidii na nde isa ibwani bomadja mosala. 29 Ta bobanga bo akangɔdjɔ ndako, ko amitidaa na mwɛngi mo bomadja ndako emina bato bakaɛnɛ badaabi bamosɛkɛ ko babalabi bo: 30 "Indja moto iyoyo abangaka boangɔdjɔ ndako, endelo ahɔniti boesiedja!" 31 Kaoko mokondji ndani, opalaka bokɛɛ ana etumba na mina nde mokondji, adaadea na mobondo ko aindjadea basodha badii na nde koto doomi*, abwani bokɛɛ ana na minande mokondji iyona odii na basodha koto tuku ibae*. 32 Akaɛnɛ bo ahɔniti, alomadea bwɛndi ta dii mokondji iyona okina, ndelo edii iyo bohali, bɛngi baokane tina e boisa bogo. 33 Iboa, pɛpɛ nongo moto omɔti ta ndanda e bino obwani boimea motingami o mbi amiti lona bodieli bo nde bosusu.»

34 «Monana modii eka epele. Endelo mokataka edjɛ, mondumba ndani mobwani bo bosɔmbedja edjɛ emina? 35 Modiiti nongo na mosala momɔti ta kpɔtɔ, kaoko ta bipɔlu; endelo baka modumbe sokolu. Yɛɛ bo iyona odii na matoi aoke!»