Apocalipse 15

Ãnzwel nsiaan y’eywiri nsiaan

1 Mɛ̃ bu mwɛn eliĩ ke ywel, eliĩ ki nɛn bvool ki ɛ̃kam. Eliĩ okyɛ ki ãnzwel nsiaan m’ã́kesiin eywiri nsiaan. Eywiri obvɛ eli ntɔ, ke ngwel wɛ me bvɛ, mpuru a Nziã emɔɔn.

2 Mɛ̃ bvool mwɛn eluɔ kyɛn onge ãdza m’ɔ̃ngwa m’ãli kal-a-kal onge bvɛɛl, m’amvee ye mbaa. Nkal ãdza m’ɔ̃ngwa omɔ̃, baal b’abvel nyam mpɛn, y’etiɔ e ndɛ, y’ɔ̃bvɛn wa nsiil ye nkuũ a ndɛ atɛɛn oŋɔ̃, bvool asiin ãnguɔ̃ m’éwi Nziã bɔ. 3 Bɔ ayam nziĩ a Moyize wu ɔ̃sal a Nziã ye nziĩ a Muaan-emɛmɛɛ̃. Bɔ ayam bubu:

«Mfam Nziã, Nziã-Nga-Waan,

ɛ̃sal ɛ̃ yɛ ɛ̃li mi ɛ̃nɛn bvool mi ɛ̃kam!

Ɔ̃kwɛn a ɛ̃kiri,

ãnkuul ã yɛ ãli dzu bvool ãli taa-taa!

4 Mfam, wu oli Ɔ̃nsensal kɛn a yam,

wɛn olɔ k’abal bvool olweel nkuũ a yɛ wɛ nã?

Ngwanyã, ɛ̃kiri mvieel ɛ̃kieel eya

bvool ɛ̃bva ãbuo ke nkwel a yɛ,

ke ngwel wɛ yɛ suo kwɛn yɛ li dzu!»

5 Ke mbee oŋɔ̃, mɛ̃ mwɛn kwɛn ke ywel, éli ye nzɔ yi m’ebaan bvi anyam yi etsweel kwɛn Nziã oli oŋɔ̃. Onse yɔ, éli ye mboo ã Nziã yi ɔ̃nsensal yi ezweel nzuru. 6 Ãnzwel nsiaan m’ákesiin eywiri nsiaan ãpal onse mboo a Nziã yi ɔ̃nsensal. Mɔ̃ ã́laal ekɔ ki ata me lɛ̃ ki tsɛtsɛ, ki enyɛɛn. Mɔ̃ bvool álaal ɔ̃sii wa ɔɔl me luu. 7 Ngemɔ̃ onse eluɔ bvi mwiĩ enge-enã, ewi ãnzwel nsiaan asaan nsiaan ba ɔɔl, b’ãluu me mpuru a Nziã wu oli y’elaã ɔ̃bu nkal ɔ̃bu. 8 Mboo a Nziã yi ɔ̃nsensal oyɔ eluul me yoo, me ndɔɔ a lweel e Nziã ye waan e ndɛ. Tiil ye k’ebwel eywiri enge-nsiaan bvi ãnzwel nsiaan, mbuul si ngɔmɔ̃ k’ákekoo k’asam onse okɔ wɛ.