Apocalipse 2

Ɔ̃nkaan wu akel ebvɔɔn li bviil li Efedze

1 «Kel ãnzwel m’ebvɔɔn li bviil li Efedze ɔ̃nkaan bubu:

"Tal m’eyɛɛn wu osiin angam-a-ngam nsiaan onse kuɔɔl e ndɛ ki elam, bvool wu adzuu mpɛ̃-a-mpɛ̃ eluɔ nsiaan bvi ɔɔl bvi abendɔɔl ambunda: 2 Mɛ̃ ngyɛɛ ɛ̃sal ɛ̃ yɛ, mɛ̃ ngyɛɛ fool li ebemwɛn yɛ m’ɔ̃sal y’osɛ-mwiĩ o yɛ. Mɛ̃ hɛ̃ ngyɛɛ kwɛn yɛ k’akoo k’akiool baal b’abi wɛ. Yɛ kie ɔ̃kwal a b’abeyɛɛn ndiri bɔ ali antam, kwɛn ŋɛn bɔ k’ali bɔ wɛ, yɛ bu paal bɔ anga-amfya. 3 Yɛ li y’osɛ-mwiĩ, yɛ mwɛn fool me nkuũ a mɛ̃, ke wɔɔl wɛ. 4 Kɛn a ndɔɔ yi mbyel mɛ̃ ola yɛ yɔ yi: Yɛ ke bekal ye dzii li éli a yɛ ŋ’ɛ̃kwel wɛ. 5 Obobɔ, yeel mboo yi ebvi yɛ, kaal ɔ̃kwal a yɛ, bvool sa ãndɔɔ m’ékesa yɛ ŋ’ɛ̃kwel. Okɛɛn yɛ ke kaal ɔ̃kwal wɛ, mɛ̃ èya ola yɛ, bvool mɛ̃ èmbaal eluɔ e yɛ ki ɔɔl ki abendɔɔl ambunda ke mboo a kyɛ. 6 Kɛn a ndɔɔ yi mvɛ ola yɛ yɔ yi: Yɛ abebyal ɛ̃sal ɛ̃ baal ba nkel a Anikolayite, onge b’ebebyal mɛ̃ hɛ̃.

7 Yɔɔl kwɛn wa y’ãtswi, ayoo m’eyɛɛn Ɔ̃fel ãbvɔɔn! Mbuul wu abvel mpɛn, mɛ̃ èwa ndɛ nkuul yi adza esia li ɔ̃ti wu elaã, wu oli onse paladi a Nziã."»

Ɔ̃nkaan wu akel ebvɔɔn li bviil li Simiine

8 «Kel ãnzwel m’ebvɔɔn li bviil li Simiine ɔ̃nkaan bubu:

"Tal m’eyɛɛn wu oli mbuul wu ɛ̃kwel bvool wa ntɔ, wu ákwi bvool ásiool: 9 Mɛ̃ ngyɛɛ fool y’oywal o yɛ, kwɛn ŋɛn yɛ ɔ̃pfel li. Mɛ̃ ngyɛɛ kwee li ebekwee baal yɛ. Baal obɔ abeyɛɛn ndiri bɔ ali Ayuda, kwɛn ŋɛn bɔ k’ali bɔ wɛ. Bɔ ali nkel a baal a Satana. 10 Oyɛɛ ke kal bam ye buɔ me fool li èmwɛn yɛ wɛ. Tal: Ɔ̃pfu àtyal bakyɛ onse byɛ me bwal, me ndɔɔ yi ambio byɛ. Byɛ èmwɛn fool ãtsoo kuun. Kuru nzuru me mɛ̃ tiil epfu, m’emfa okyɛ mɛ̃ èwa yɛ ekɔrɔ ki elaã.

11 Yɔɔl kwɛn wa y’ãtswi, ayoo m’eyɛɛn Ɔ̃fel ãbvɔɔn! Wu akieel abvel mpɛn, epfu li nsa yuaal k’etuaal ndɛ mpal wɛ."»

Ɔ̃nkaan wu akel ebvɔɔn li bviil li Pɛɛgame

12 «Kel ãnzwel m’ebvɔɔn li bviil li Pɛɛgame ɔ̃nkaan bubu:

"Tal m’eyɛɛn wu oli y’epwel ki ápɛɛl: 13 Mɛ̃ ngyɛɛ mboo yi ekal yɛ ngesɛ. Oyɔ mboo yi eli kiri li okwɛn li Satana. Yɛ kuru nzuru me nkuũ a mɛ̃, bvool ke yɔɔl k’akiool mɛ̃ wɛ, onkyam m’ãtsoo m’ábam Antipas wu áli ɔ̃tsweel a mɛ̃ wa taa-taa, ola byɛ ke mboo yi ekal Satana. 14 Kɛn ãndɔɔ ke kwɛ me mbyel mɛ̃ ola yɛ mɔ̃ mã: Ola yɛ, eli ye baal b’akuru nzuru m’ãtee ã Balam. Ndɛ wu ákewa ɔ̃kwɛn Balak luo li aywiin Afi-Isalayel bɛɛ, ŋ’éketam ndɛ bɔ k’adza anyam b’áwi ãkab ol’etiɔ, bvool k’atiɔ Nziã wa taa-taa eboo*2.14 Otiɔ o Nziã eboo ŋã, ŋ’ayɔɔl Nziã wa taa-taa m’obuɛɛn b’etiɔ. Ɔ̃nkaan a Nziã ata ndɔɔ oyɔ m’osa b’ãndɔɔ m’esio. Etal onse Odze 1. 2.. 15 Emfa kiki, ola yɛ hɛ̃, yɛ eli ye baal b’akuru nzuru m’ãtee ã baal ba nkel a Anikolayite. 16 Oŋɔ̃ kaal ɔ̃kwal, okɛɛn k’obobɔ wɛ, mɛ̃ ŋ’esa eya ola yɛ, bvool edzɔɔ bɔ eta m’epwel ki epal onse ɔ̃nywã a mɛ̃.

17 Yɔɔl kwɛn wa y’ãtswi, ayoo m’eyɛɛn Ɔ̃fel ãbvɔɔn! Wu akieel abvel mpɛn, mɛ̃ èwa ndɛ mane wu áli m’edziɔɔn bvool èwa ndɛ nkɔɔn yi fuu. Nkal a nkɔɔn oyɔ, ápuul nkuũ yi enyiɔɔn yɛn mbuul si ngɔmɔ̃ k’akoo k’atsiɔ yɔ wɛ, wu atsiɔ yɔ kɛn a wu obɔɔ yɔ."»

Ɔ̃nkaan wu akel ebvɔɔn li bviil li Tiatiil

18 «Kel ãnzwel m’ebvɔɔn li bviil li Tiatiil ɔ̃nkaan bubu:

"Tal m’eyɛɛn Muaan a Nziã, wɛn mviil ãli onge elam e mbaa yi kokɔ, bvool wɛn ntaã eli onge bvieel li bolonze li enyɛɛn. 19 Mɛ̃ ngyɛɛ ɛ̃sal ɛ̃ yɛ, ye dzii e yɛ, y’okiool o yɛ, ɔ̃sal wu ebesa yɛ, y’osɛ-mwiĩ o yɛ. Mɛ̃ ngyɛɛ ngesɛ wɛn ɛ̃sal ɛ̃ yɛ mi ãmbee ɛ̃nduru mi ɛ̃kwel olɔɔ. 20 Kɛn a ndɔɔ yi mbyel mɛ̃ ola yɛ yɔ yi: Ɔ̃bvu-ayi Dzodzabel, wu abeyɛɛn ndiri ndɛ ɔ̃liaal-ɔ̃kiɛɛn, yɛ abewa ndɛ nkuul yi apfuru asal a mɛ̃, ŋ’ebewa ndɛ bɔ luo li atiɔ Nziã wa taa-taa eboo, bvool li adza anyam b’awi ãkab ol’etiɔ. 21 Mɛ̃ ngwi ndɛ mpwee yi akaal ɔ̃kwal, kɛn a ndɛ k’adzii k’ayɔɔl k’atiɔ mɛ̃ eboo wɛ. 22 Obɔ otsɛn bɛn, mɛ̃ ètyal ndɛ nkal a ntal yi fool li bibi, ndɛ y’andoo b’abesa ãndɔɔ m’esio ye ndɛ. Kɛn a ŋɛn bɔ akaal ɛ̃kwal, bvool k’abesa ãndɔɔ onge ndɛ wɛ, ndɔɔ oyɔ k’èya me bɔ wɛ. 23 Mɛ̃ ètam k’abweel ayio a ndɛ. M’emfa okyɛ, ãbvɔɔn mbueel ãkieel ãyɛɛ kwɛn mɛ̃ ndi wu ebebwɛɛl ãtsam y’efua e baal. Mɛ̃ esa mbuul bwɛn a mbuul m’emfa ki ɛ̃sal ɛ̃ ndɛ. 24 Me b’otal byɛ b’akiool ba Tiatiil b’esiil, byɛ bɛn k’ekuru nzuru m’ãtee mã mfya omɔ̃ wɛ, bvool k’ekiool k’ebii k’eyɛɛ m’ebeta bɔ me dzio li ãndɔɔ ã Satana wɛ, mɛ̃ ngyɛɛn wɛn, mɛ̃ k’endɔɔl pfuũ ekyam nkal a byɛ wɛ. 25 Kɛn a byɛ esɛn ãnã onse m’eli a byɛ, tiil k’èya mɛ̃. 26 Wu akieel abvel mpɛn bvool akieel asal kɛn osal m’emfa ki ãtee ã mɛ̃ tiil ntɔ, mɛ̃ èwa ndɛ okwɛn nkal ɛ̃kiri. 27 Ndɛ akieel abiri ɛ̃kiri omyɛ̃ ye nkoo yueel, bvool akieel abwel myɛ̃ onge b’abwel asaan b’abuo m’ɔ̃bwɛɛ, 28 onge b’éyɔɔ mɛ̃ okwɛn ola Tal a mɛ̃. Mɛ̃ bvool èwa wu obvel mpɛn ngam-a-ngam wu epal-epal.

29 Yɔɔl kwɛn wa y’ãtswi, ayoo m’eyɛɛn Ɔ̃fel ãbvɔɔn!"»