Apocalipse 9

1 Ãnzwel m’ãtaan ãfel mvel-a-mvel. Mɛ̃ mwɛn ngam-a-ngam wu áfi ywel ábvi me nsie. Awi ngam-a-ngam ondɛ ɔ̃wɔɔl a ywɛn li ela li ke nsɛn a nsie. 2 Ndɛ odzweel ywɛn li ela li ke nsɛn a nsie. Yoo lɛn onge li bvuun e mbaa li nɛn epal onse ywɛn olɔ. Tal epiin y’ɔ̃piɛɛl a mfel me yoo li epal onse ywɛn olɔ. 3 Ansɛnsɛ apal onse yoo olɔ bu atsɔɔn me nsie. Awi bɔ waan lɛn onge li angiɛ̃-miin. 4 Aluo bɔ k’asa bviĩ bvi ɔ̃kiri y’ɛ̃ti obi, ekal mi enɛn, ekal mi ɛ̃tsi-ɛ̃tsi. Awi bɔ nkuul yi asa obi kɛn me baal bɛn k’ali y’eliĩ e Nziã m’ãmbwii wɛ. 5 Awi bɔ waan li atuaal baal mpal nswii taan, ke waan li abam bɔ wɛ. Mpal yi éketuaal bɔ baal éli onge mpal yi emwɛn mbuul wu etswi ngiɛ̃-miin. 6 M’ãtsoo omɔ̃, baal akieel abii epfu, kɛn a bɔ kieel k’abɔɔ lɔ wɛ. Bɔ akieel adzii k’akwa, kɛn epfu ekieel ebal bɔ.

7 Ansɛnsɛ obɔ áli k’emfa onge aswebval b’ayɛɛl me ndɔɔ a mvel. Nkal ɛ̃tswɛ ɛ̃ bɔ, éli y’eluɔ bvɛn onge ekɔrɔ bvi me ɔɔl, ãsu ã bɔ ã́li onge mã baal. 8 Mfu e bɔ éfɛɛn onge yi akaal, bvool miin ã bɔ ã́li k’emfa onge m’ebob. 9 Ãtwel ã bɔ áli onge mã baal b’alaal ɛ̃kuru ɛ̃ mvel mi ãbvieel, bvool nkyal yi ãpab ã bɔ éli onge yi aswaal b’edzuru aswebval bibi b’atsuu ntiin k’ayi mvel. 10 Ɛ̃kel ɛ̃ bɔ ɛ̃li y’ãnsiɛɛn onge mi angiɛ̃-miin. Waan e bɔ li asa baal obi mvel taan, éli onse ɛ̃kel ɛ̃ bɔ. 11 Mfam wu áli nkal a bɔ éli ãnzwel ã ywɛn li ela li ke nsɛn a nsie, m’ata m’Abadon m’ɔ̃nywã wu Ayuda. Ata mɔ̃ hɛ̃ m’Apolyon, m’ɔ̃nywã wa Ngelek, ŋ’ayɛɛn ndiri: «Ɔ̃biil».

12 Fool li ɛ̃kwel ebwel. Tal, ãndɔɔ mbuual mã fool bvool ãyeya ke nkwel.

13 Ãnzwel m’ãsɛɛn ãfel mvel-a-mvel. Mɛ̃ bu ngyoo nkii ngamɔ̃ efi k’ɛ̃soo ɛ̃nã mi nkiin yi awa Nziã ãkab yi ɔɔl, yi eli ke nkwel a Nziã. 14 Nkii oyɔ ékeyɛɛn ãnzwel m’ãsɛɛn m’ã́li ye mvel-a-mvel ndiri: «Nyiɔɔn ãnzwel ãnã m’akuru ɛ̃sii ke nzal yi nɛn yi ata m’Efalate.» 15 Obobɔ, anyiɔɔn ãnzwel ãnge-ãnã. Áyɛɛl mɔ̃ me ndɔɔ a lio lili olɔ, tsoo lili olɔ, nswii wuwu ondɛ ye mvel wuwu ondɛ, me ndɔɔ yi abam boo li ãtyel li ɔ̃bvɛn a baal. 16 Ɔ̃bvɛn a baal b’adzwaan m’aswebval áli wu amiliɔ̃ ɛ̃nkam mviaal (200.000.000), ondɛ ɔ̃bvɛn wu álieel mɛ̃.

17 Tal emfa kyɛn onse emwɛn e mɛ̃, mɛ̃ mwɛn aswebval ye b’ánɔɔn nkal a bɔ. Bɔ áli y’ɛ̃kuru ɛ̃ mvel mi ãbvieel mi abelaal m’otwel mi bɛ onge mbaa, ye mi bule onge nkɔɔn yi ɔ̃bvɛn yi Safiil, bvool mbaal-mbaal ong’ɔ̃fel wu ata me sofolo. Ɛ̃tswɛ mi aswebval eli onge mi ebob. Ɛ̃nywã ɛ̃ bɔ ɛ̃kepaal mbaa, ye yoo, y’ɔ̃fel wu ata me sofolo. 18 Eywiri obvɛ ebam boo li ãtyel li baal. Eywiri obvɛ éli bvi: mbaa, ye yoo, y’ɔ̃fel wu ata me sofolo. Bvɛ ekepal onse ɛ̃nywã mi asweval obɔ. 19 Ke ngwel wɛ, waan li aswebval éli onse ɛ̃nywã y’ɛ̃kel ɛ̃ bɔ. Ɛ̃kel ɛ̃ bɔ ɛ̃́li k’emfa onge antaal. Bɔ áli y’ɛ̃tswɛ, bvool bɔ ákesa baal obi m’ɛ̃tswɛ omyɛ̃.

20 Baal b’asiil bɛn eywiri obvɛ k’ébam wɛ, k’atiɔ etiɔ bvi ési bɔ me mviɔɔl ɛ̃ bam eboo wɛ. Bɔ k’ayɔɔl k’alweel ɛ̃fel mi ɛ̃bi-ɛ̃bi, y’etiɔ bvi me ɔɔl, bvi me bvieel li aadzã, bvi me bvieel li bolonze ye bvi m’ɛ̃ti, wɛ. Kwɛn ŋɛn etiɔ obvɛ k’ekoo m’omwɛn wɛ, m’oyoo wɛ, m’odzuu hɛ̃ wɛ. 21 Bɔ k’ayɔɔl obam o baal wɛ, k’ayɔɔl ebel wɛ, k’ayɔɔl ãndɔɔ m’esio wɛ, k’ayɔɔl pfuul hɛ̃ wɛ.