1 Tsoo ngelemɔ̃, Yeso obvool antam a ndɛ ange-kuun ye buaal, bvool owi bɔ waan y’omfam b’atswɛɛl ɛ̃fel myam mvieel mi ɛ̃bi-ɛ̃bi, ye b’aboo anga-ãluu. 2 Ndɛ otam bɔ k’ayetsal Nsia yi Ngesɛ yi Okwɛn o Nziã, bvool m’oyeboo anga-ãluu. 3 Ndɛ olieel bɔ ndiri: «Ŋ’èyi byɛ dzwɛ, ebee eluɔ si ngemɔ̃ obiri, ekal ɔ̃mpaã, ekal ɔ̃paa, ekal mampa, ekal nzi. Wu a biri ɛ̃nkuru mviaal pyɛ! 4 Ŋɛn ayɔɔ byɛ onse nzɔ ngamɔ̃, ekal kɛn onse nzɔ oyɔ tiil ye k’embal byɛ ola obɔ. 5 K’ola b’abee byɛ oyɔɔ, epal onse bɔ. Ŋ’eyii epal byɛ, ekweel ɔ̃fel a ntaã e byɛ. Okyɛ èkal eliĩ ki esuo kwɛn bɔ asi obibi.» 6 Antam bu ayɛn. Onse ãla mam mbueel m’ékebwel bɔ, bɔ áketsal Nsia yi Ngesɛ, bvool ákebvuul baal ba y’ãluu.

7 Ŋ’esa oŋɔ̃, Elode Antipas wu áli ɔ̃kwɛn k’etswi e nsie ki Ngalile oyoo nsia a ãndɔɔ mam mbueel m’ã́kebwel. Ndɛ ebɔɔ e nsie bu edziɔɔn. Ke ngwel wɛ, baal bakyɛ ákeyɛɛn ndiri: «Ondɛ Dzaã Batis osiool onse b’ákwi-ákwi.» 8 Bakyɛ ákeyɛɛn ndiri: «Eli, mbuul wu oyebvool!» Bakyɛ bvool ákeyɛɛn ndiri: «Ngɔmɔ̃ onse aliaal-ɛ̃kiɛɛn a Nziã ba tsɔɔn-tsɔɔn, mbuul wu osiool onse b’ákwi-ákwi.» 9 Kɛn Elode ákeyɛɛn ndyam-a-ndyam ndiri: «Mɛ̃ mpii étsiil Dzaã Batis ɔ̃tswɛ. Ke mbuul wu ebeyoo mɛ̃ nsia a ndɛ, m’ãndɔɔ m’ɛ̃kam m’ebesa ndɛ, bvool nã?» Obobɔ, ndɛ oyii abii k’amwɛn Yeso.

10 Antam abvool ola Yeso, bu alieel ndɛ mam mbueel m’esi bɔ. Obobɔ, Yeso olieel bɔ ndiri ayi ye ndɛ me pyɛ lela ye baal, m’etswi ki bviil li ata me Betesayida. 11 Kɛn a ŋ’eyoo baal nsia yi eyɛn bɔ, bɔ anɔɔn a ndɛ. Ndɛ oyɔɔ bɔ, oyɛɛn bɔ ãndɔɔ m’Okwɛn o Nziã, bvool oboo anga-ãluu b’áli ye kɔɔ li obvuul. 12 Ŋ’eyii ekwal bviil, antam ange-kuun ye buaal asyel tsotsoo a ndɛ, bvool alieel ndɛ ndiri: «Bveel baal ba, kwɛn bɔ ayi onse ãla y’ãŋaan m’ãli m’opal ba, me ndɔɔ yi ayebii bvi-odza, y’ãmboo m’ala twal. Ke ngwel wɛ, bia-byɛ ŋã eli nkal ɔ̃baan.» 13 Kɛn a Yeso obveel bɔ bubu: «Ewa bɔ bvi-odza byam!» Bɔ abveel ndɛ ndiri: «Bee eli kɛn a y’amampa ataan y’answi buaal. Bee eyesuun bvi-odza, me ndɔɔ yi eliil olɔɔ o baal ba bueel?» 14 Nzal-a-ŋɛn, onse baal b’áli oŋɔ̃, abɔɔl áli nku-a-nku amiil ataan. Yeso bu alieel ayio a ndɛ ndiri: «Emviaal baal nsɛn m’ãnkel m’ãnkel, nkel ngamɔ̃ baal sua ãku-ãtaan.» 15 Antam asi obobɔ, bu amvieel baal bam bueel nsɛn. 16 Yeso bu awel amampa ange-ataan y’answi ange-buaal. Ndɛ oseel mviil ke ywel, obuɛɛn kwɛn Nziã andɔɔl bɔ kuɔɔl. Ndɛ otsiil bɔ, bu awi ayio bɔ, me ndɔɔ yi akab baal bɔ. 17 Baal bam bueel bu adzi ayool. Bɔ abiri etswel-etswel bvi ésiil m’etsaka kuun ye bviaal.

18 Tsoo ngelemɔ̃, Yeso ákebuɛɛn me pyɛ, ayio a ndɛ áli oŋɔ̃. Ndɛ ofuul bɔ bubu: «Baal abeyɛɛn ndiri mɛ̃ nã ndi?» 19 Bɔ abveel ndiri: «Bɛn ndiri yɛ Dzaã Batis, bɛn ndiri yɛ Eli. Bakyɛ bvool ndiri yɛ li ngɔmɔ̃ onse aliaal-ɛ̃kiɛɛn a Nziã ba tsɔɔn-tsɔɔn, wu osiool onse b’ákwi-ákwi.» 20 Yeso bu afuul bɔ ndiri: «Ke byɛ, byɛ eyɛɛn wɛn mɛ̃ nã ndi?» Piɛɛl obveel ndiri: «Yɛ li Mãsia wu eyuɔɔl Nziã!»

21 Yeso bu awi bɔ ãnkunkwa mam bibi kwɛn bɔ mbuul ndɔɔ oyɔ oliaal wɛ. 22 Ndɛ olweel bubu: «Ebvaan kwɛn Muaan a mbuul amwɛn mpal yam boo-boo. Akuul-kuul b’Ayuda, y’amfam b’angaa-a-Nziã, y’ayiool b’ãngel àtiɔ ndɛ eboo. Àbam ndɛ, kɛn a me tsoo li ãtyel, ndɛ àsiool.»

23 Ke mbee oŋɔ̃, Yeso olieel baal bam bueel bubu: «Okɛɛn mbuul odzii k’aluɛɛn a mɛ̃, ebvaan ndɛ abee elaã e ndyam bvool obesiɔɔl. Tsoo bwɛn a tsoo, ndɛ ebvaan abiri enkulusu e ndɛ, bvool aluɛɛn a mɛ̃. 24 Ke ngwel wɛ, mbuul wu odzii k’abvuul elaã e ndɛ, ndɛ àywɛn a lɔ. Kɛn a mbuul wu àywɛn elaã e ndɛ me ndɔɔ a mɛ̃, wu àbɔɔ elaã li taa-taa. 25 Ŋɛn mbuul obɔɔ opfel b’ɔ̃kiri a nsie ndyam wueel, bvel emã li ebɔɔ ndɛ, okɛɛn ndyam oywɛn elaã wuo obiil lɔ? 26 Okɛɛn mbuul oyoo opfuru me ndɔɔ a mɛ̃, wuo me ndɔɔ ãndɔɔ ã mɛ̃, mɛ̃ wu Muaan a mbuul hɛ̃ ekieel eyoo opfuru me ndɔɔ a ndɛ, ŋ’ekieel eya mɛ̃ onse okwɛn o mɛ̃, b’oli okwɛn o Taal, y’ãnzwel m’ɔ̃nsensal. 27 Taa-taa bam, mɛ̃ eyɛɛn byɛ kwɛn onse ŋã, eli ye baal bakyɛ bɛn k’àkwa wɛ, ye k’emwɛn bɔ Okwɛn o Nziã.»

28 Ke mbee ãtsoo ke mpuɔ̃ abwɛn m’eyɛɛn Yeso ãndɔɔ omɔ̃, ndɛ onɔɔn nkal a nkio ye Piɛɛl, ye Dzaã ye Dzak, me ndɔɔ yi abuɛɛn. 29 Ŋ’eyii ebuɛɛn ndɛ, osu o ndɛ oswɛɛl emfa, ekɔ e ndɛ hɛ̃ eyii kyam fuu bvool ebvi onyɛɛn. 30 Pfa! Baal buaal abvi ombwɔɔ ye ndɛ. Éli Moyize y’Eli. 31 Bɔ ákenyɛɛn me mbaa yi efi ola Nziã. Ɔ̃sam wu éketa bɔ ye ndɛ átal dzwɛ li ékeyi ndɛ okwa ke Yelusalem, m’ombɛɛl b’ɔ̃sal.

32 Piɛɛl ye b’áli ye ndɛ ayiool me twal lam bɔɔ. Ŋ’esiool bɔ, bɔ amwɛn Yeso ye baal ange-buaal onse mbaa yi efi ola Nziã. 33 Me lio lɛn Moyize y’Eli ayii asiil Yeso, Piɛɛl olieel ndɛ bubu: «Mfam, okal ŋã y’obvie! Etuu asɛɛ atyel: ngɔmɔ̃ wa yɛ, ngɔmɔ̃ wa Moyize, ngɔmɔ̃ wu Eli.» Kɛn a Piɛɛl k’ábɔɔ b’ékeyɛɛn ndyam otsɛn wɛ. 34 Me lio li ékeyɛɛn ndɛ, epɛn eyefoo bɔ. Obobɔ, ayio buɔ bo kokɔ obɔɔ bɔ, ŋ’esam bɔ onse epɛn. 35 Nkii ngamɔ̃ eyɛɛn fa onse epɛn, bu eyɛɛn ndiri: «Wu bu Muaan a mɛ̃ wu asueel: Eyoo ndɛ!*» 36 Ŋ’eman nkii oyɔ oyɛɛn, Yeso osiil ndyam sii. Ayio aweel pi, bvool me lio olɔ, bɔ k’ati mbuul si ngɔmɔ̃ ɔ̃sam wu ãndɔɔ m’emwɛn bɔ wɛ.

37 Ela esiool, Yeso y’ayio ange-atyel asool ke ywel a nkio. Baal boo-boo ayemwɛɛn ye ndɛ. 38 Onse baal obɔ, mbuul ngɔmɔ̃ obiool bubu: «Ɔ̃tee, mɛ̃ mbuɛɛn yɛ, mewuaal a mɛ̃ muaan wu bɔɔl wu! Mɛ̃ ndɛ ɔ̃kyam pyɛ! 39 Lio bwɛn a lio, ɔ̃fel wu ɔ̃bi-ɔ̃bi abesiin ndɛ. Oŋɔ̃, me lio olɔ, muaan obvi ɛ̃sɔɔl ota, obvi okwa swii-swii, bvool ãfel ãbvi opal k’ɔ̃nywã. Ɔ̃fel ondɛ abepeel ndɛ kɛn a ke mbee a ŋ’emeetuaal ndɛ muaan mpal yam bibi. 40 Mɛ̃ nduɔɔn ayio a yɛ m’otswɛɛl b’ɔ̃fel ondɛ, bɔ k’akoo wɛ.» 41 Yeso bu ayɛɛn ndiri: «Byɛ baal b’abi! Byɛ eywɛn a okiool! Mɛ̃ èkal ye byɛ tiil mpuanki? Mɛ̃ èkuru ɔ̃kwal wu ekal ye byɛ tiil lio emã?» Ke mbee oŋɔ̃, ndɛ olieel mbuul ondɛ bubu: «Oŋɔ̃ ya ye muaan!» 42 Ŋ’etɔ muaan tsotsoo a Yeso, ɔ̃fel wu ɔ̃bi-ɔ̃bi odzweel muaan me nsie, bvool onziool ndɛ bam kokɔ. Kɛn a Yeso oyɛɛn ɔ̃fel wu ɔ̃bi-ɔ̃bi, obvuul muaan, bvool obveel ndɛ ola tal. 43 Baal bam bueel ongɛɛ obɔɔ me ndɔɔ a waan e Nziã li enɛn.

Onge bɛn mbuul bwɛn a mbuul ákekam me ndɔɔ ãndɔɔ mam mbueel m’ékesa Yeso, ndɛ olieel ayio a ndɛ bubu: 44 «Eyoo ãndɔɔ m’eyɛɛn mɛ̃ byɛ ngesɛ: Akieel atiɔ Muaan a mbuul me mviɔɔl ɛ̃ mbaal.» 45 Kɛn ayio k’ábɔɔ ndɔɔ oyɔ otsɛn wɛ. Álwɔɔn bɔ otsɛn o yɔ, me ndɔɔ yɛn bɔ abee otsɛn o yɔ oyɛɛ. Bɔ hɛ̃ áli ye buɔ b’afuul Yeso yɔ.

46 Ŋ’esa oŋɔ̃, ayio abvi otsuun bam-a-bam, me ndɔɔ yi ayɛɛ wu onduru bakyɛ onse bɔ. 47 Yeso oyɛɛ ãtsam m’ɛ̃kwal ɛ̃ bɔ. Obobɔ, ndɛ owel muaan wu ɔ̃tsi-tsiri ngɔmɔ̃, osuul ndɛ tsotsoo a ndɛ. 48 Ndɛ bu alieel ayio ndiri: «Mbuul wu ayɔɔ muaan wu me nkuũ a mɛ̃, mɛ̃ ayɔɔ. Mbuul wu ayɔɔ mɛ̃, ŋ’ayɔɔ mbuul wu atam mɛ̃ hɛ̃. Ke ngwel wɛ, wu onduru otsiaal onse byɛ, wu onduru bakyɛ!»

49 Obobɔ, Dzaã olieel Yeso ndiri: «Mfam, bee emwɛn mbuul wu atswɛɛl ɛ̃fel mi ɛ̃bi-ɛ̃bi me nkuũ a yɛ. Bee bu eluo ndɛ obobɔ osa, me ndɔɔ yɛn ndɛ k’abenɔɔn a yɛ onse nkel a bee wɛ.» 50 Yeso obveel ndɛ bubu: «Ebee ndɛ oluo k’asa obobɔ. Ke ngwel wɛ, mbuul wɛn k’ali ɔ̃taal a byɛ wɛ, ŋ’ali wa byɛ.»

51 Ŋ’eyii ekoo lio li esiil Yeso ɔ̃kiri, ndɛ okuru bam kwɛn ebvaan ndɛ ayi Yelusalem. 52 Ndɛ oyuɔɔl antam atsɔɔn nkwel a ndɛ. Bɔ bu ayɛn. Bɔ asam onse ola ngɔmɔ̃ bo nsie yi Samali, me ndɔɔ yi afaal ndɛ mboo yi ayɔɔ ndɛ. 53 Kɛn a baal b’ola obɔ abee k’ayɔɔ ndɛ, me ndɔɔ yɛn ndɛ ákeyi Yelusalem. 54 Ŋ’emwɛn ayio a ndɛ, Dzak ye Dzaã, obobɔ, bɔ ayɛɛn ndɛ bubu: «Mfam, okɛɛn ye dzii, yɔɔl kwɛn bee eyɛɛn kwɛn nzyel àbva nkal a bɔ, bvool atsoo bɔ mbaa!»

55 Yeso okɔɔl otal bɔ, bu apɛɛn bɔ bam kokɔ. [«Byɛ k’eyɛɛ ɔ̃fel wu awa byɛ ãtsam m’emfa okyɛ wɛ. 56 Ke ngwel wɛ, Muaan a mbuul k’ayi me ndɔɔ yi abam elaã baal wɛ, ndɛ oyi me ndɔɔ yi abvuul myɛ̃.*»] Bɔ bu ayɛn onse ola onkyam.

57 Me lio li ékeyi bɔ, mbuul ngɔmɔ̃ olieel Yeso ndiri: «Mɛ̃ ènɔɔn a yɛ k’ãmboo mam mbueel m’èyi yɛ.» 58 Yeso obveel ndɛ bubu: «Ambwel ali y’ãywɛn m’akal, anywɛn hɛ̃ ali y’ãnzɔ. Kɛn a Muaan a mbuul k’ali ye mboo yi awuun wɛ.»

59 Yeso olieel mbuul ɔ̃kyam bubu: «Luɛɛn a mɛ̃!» Kɛn a mbuul ondɛ obveel ndɛ ndiri: «Mfam, mewa mɛ̃ kɛn nkuul yi eyedziool mɛ̃ taal.» 60 Yeso bu alieel ndɛ bubu: «Yɔɔl b’ákwi-ákwi adziool ebiĩ*. Me b’otal yɛ, yi y’aliaal baal nsia yi Okwɛn o Nziã!»

61 Mbuul wukyɛ bvool olieel Yeso ndiri: «Mfam, mɛ̃ nzii k’enɔɔn a yɛ. Kɛn a ŋ’ɛ̃kwel, mewa mɛ̃ nkuul kwɛn mɛ̃ yendɛɛl baal a nzɔ a mɛ̃.» 62 Yeso obveel ndɛ bubu: «Mbuul wu obɛɛn k’asal nguun, bvool otal mbee, k’abvaan k’asal me ndɔɔ Okwɛn o Nziã wɛ.»