5 जेलेमेहें पेत्र बोंद ओतू; पोन तियाआ काजे मंडड़ी मोन लागाड़ीत देवोहो प्रार्थना कोअतीते.
जेलेम रोत पेत्राआ सुटका
6 जेहेलाम हेरोद तियाहा माअहुंउं सामने लेतावनारु ओतू, एकी रातीइ आगाड़ी पेत्राहा बेन हाकले वाअहीं बांद्युतो, आन तो बांदाअलुज बेन सिपायड़ाअ विसमेहें हुवतूतो; आन सिपायडां जेलेए बाअणाअहीं राखवाली कोअताते. 7 ताहां पाला, प्रभुउ एक देवदुत आयू आन तियी खुलीमेहें उजेड़ समक्यू, आन पेत्राहा आथ लागाड़ीत जागाड्यू आन कोयो, "मामार उठे." आन पेत्राअ आथोमेएं हाकली निंगलीत पोड़्यी. 8 ताहरुउ देवदुत पेत्राहा कोयो, "कंबर बांद, आन ताआ खाहड़े पोवित ले." पेत्रे तेहेंज कोअयो. ताहरुउ देवदुते तियाहा कोयो, "ताआ आंगड़ो पोवित लेन माआं फासाड़ी आव." 9 पेत्र निहीत कोइत तियाआ फासाड़ी जानु वोल्यू; पोन ने मुंदू ओतू के जो देवदुत कोअहे ओं खोरीज होये, पोन एहेलोह समज्यो के आंय दर्शन पालोहो. 10 ताहराअ ते पेल्लीइ टोली आन दुसरी सिपायड़ाआ टोलीही टाकीत कोइत तिया लोड़ाअ बाअणापोअ पोत्या, जिहीं रोत होयरोमेहें सड़क जाहे. तों बाअणो तियांआं काजे तिया तियाआज उगड़ीत गोयो, आन ते निहींत कोइत एक्कीज गेल्लीम रोत गोया, आन तेत्ताजमेहें देवदुत पेत्राहा सोड़ीत कोइत जातू रोयू.
11 ताहरुउ पेत्र सुद्दीपोअ आवित कोइत कोयो, "ओमे माहूं खोरीज समजात गोयो के, प्रभु तियाआ देवदुत मोकलीत माहूं हेरोदोअ आथोम रोत सोड़वीत लेदुहू, आन यहुद्याआं बादी आशा तोड़ी देदीही."
12 तियाहा मुंदू गोयू, तेहेलाम तो योहान मार्काआ आयही मरियाआ कोओ आयू. तिहीं डाहटे माहें टोलू वोलीत प्रार्थना कोअया कोअतेते.