Atos 15

येरुसालेमोअ सभा

1 ताहराआ थोड़ाक माटी यहुदीया रोत अंताकिया आवित कोइत विश्वासी माअहोंहों सिकाड़ा वोल्या: "जर मोशेए रिती पोअ तुमाआं खतना✝15:1 लेवी 12:3 ने ओवे ताहां तुमुहूं तारण ने जोड़ीत सेकनारो." 2 जेहेलाम पौलुस आन बरनबासोअ तियांअरी खुब भान्गड़ आन सोबासोबी ओवा ताहां ओं ठरवाअयो के पौलुस आन बरनबास आन तियांमेर्‍येए थोड़ेक माअहें यी गोठीइ बाप्तिमेहें की मत पोड़ेहे तियाआ काजे प्रेशितोंअ आन डायहांअ जागे येरुसालेमोमेहें जाये.

3 ताहां मंडड़ी तियांहां थोड़ीक सेटे जाआं पोताड़्या; आन ते फिनीके आन शोमरोनोअहें फिरताज माहुंहूं कोता गोया, के बिगर यहुदी केहें कोइत देवोअहें फिऱ्ये: आन यी खबरे वाअहीं विश्वासी माअहें खुब खुस ओवे. 4 जाहां ते येरुसालेमोमेहें पोत्या, ताहां मंडड़ी आन प्रेशित आन डायहां तियांहां खुसी वाअहीं मिल्या, आन देवे तियांअरी रोत कोइत केहले-केहलेहे कामे कोअयेते तें तियां कोत देखाड़्यो. 5 पोन फरिसीइ पंथामेर्‍याआ जियां विश्वास मिक्युतो, तियांमेर्‍याआ थोड़ाक जोओं उठीत कोइत कोयो, "तियांहां खतना कोआड़ीइलो आन मोशेए नियमोहों मानीइलाअ आदेश आपुहूं जोवे."

6 ताहराअ प्रेशित आन डायहां यी गोठीइ बाप्तिमेहें विसार कोइलाअ काजे टोलू वोल्या. 7 ताहरुउ पेत्र वारुज सोबासोबी ओवीइलाआ फासाड़ी उबू रोत कोइत तियांहां कोयो, "माआं पाव्हीइला, तुमुहूं मुंदू होय के वारुज दिही ओवा देवे तुमामेहें रोत माहूं निवड़ीत लेदू के माआं मुखोवाअहीं बिगर यहुदी माहें हाजी बातमीइ वसन उनाइत कोइत विश्वास कोए.✝15:7 प्रेशित 10:1-43 8 मोनोअ जांअनारे देवे तियांहां बी आपाअ होस पवित्र आत्मा आपीत कोइत तियाआ साक्शी आप्यी;✝15:8 प्रेशित 2:4; 10:44 9 आन विश्वासो वाअहीं तियांआं पापोअ माफी कोइत आपामेहें आन तियांमेहें किज फरक ने मिक्यू. 10 ताहां ओमे तुमू काहा देवोअ परिक्शा लेताहा के, सेलाआं बोसीपोअ एहेलोहो जुहर मिकताहा, जियाहा आपाआ वेगाअ डायहां नाहां उसलीत सेक्या आन आपू बी नाहां उसलीत सेकता? 11 होव, आमाआं ओ भरिवसू होय के जेहें कोइत तें प्रभु ईसुउ मेरवानी वाअहीं वासाअतेहे; तेहेंज कोइत आपू बी वासाअतेहे."

12 ताहरीइ आखी सभा ठावकीज बरनबासोअ आन पौलुसोअ उनाइ वोल्यी, के देवे तियां वाअहीं बिगर यहुदीमेहें केहेलाहा वोडा-वोडा समत्कार आन जबरदस्त कामे देखाड़्ये. 13 जेहेलाम ते गोगीइलोअ आलहाअया तेहेलाम याकोब कोनु वोल्यू, "पाव्हीइला, माआं उनाआ. 14 शिमोने कोताप्यो के देवे पेलपेल बिगर यहुदी पोअ केहेलिही मेरवानीइं नजर कोअयी के तियांमेर्‍येए तियाआ नावोअ काजे थोड़ेक माअहें काडीत लेदे. 15 याअरी भविश्यवक्ताआं गोठी बी जुड़ाअतीही, जेहलोहो लेख्योहो के,

16 "याआ फासाड़ी आंय फाशुउ आवित कोइत

दाविदोअ पोड़ल्यो राज्य फाशोअ उबो कोअहीं,

आन तियाआ डुसा बुजीत फाशोअ हुदारिहीं,

आन तियाहा मजबुत कोअहीं,

17 याअकाजे के बाकी रोल्ये माअहें, मोन्ज्ये आखे

बिगर यहुदी जियांहां माआं नावोअ काजे हाद्येहे, प्रभुहू होदुहूं जोवे,

18 ओ तोज प्रभु कोहे के जो दुन्याअ उत्पत्ती रोत यीं गोठीइ खबर कोअतू आयू."✝15:18 आमोस 9:11,12

19 "तियाहा काजे माआं विसार ओ होय के बिगर यहुदीमेहें रोत जे माअहें देवोअहें फिरतेहे, आपू तियांहां दुख ने देअहूं जोवे; 20 पोन तियांहां पत्र लेखीत मोकलुहूं जोवे के, तें मुर्तीइ सोगदाय आन सिनालो आन बोस दाबीत माअल्यो माहां आन रक्त यां रोत सेटे रोअहूं जोवे.✝15:20 निर्ग 34:15-17; लेवी 17:10-16; 18:6-23 21 काहाके जुना वाडोम रोत गांवों गांवोंम मोशेए नियमोअ परसार ओवतू आयुहू, आन तियाहा हारेक आरामोअ दिही आराधनालयोमेहें वासतेहे."

बिगर यहुदी विश्वासी माअहुंहूं सिट्टी

22 ताहरोअ प्रेशित आन डायहां पुरी मंडड़ीइरी ओं ठरव्यो के आपामेहें रोत थोड़ाक माअहुंहूं निवड़ीइलो, मोन्ज्ये यहुदा जियाहा बरसब्बास कोतेहे, आन सिलासोहो जो विश्वासी पायहोंमेहें मुख्य ओतू; आन तियांहां पौलुस आन बरनबासोअरी अंताकिया मोकल्या.

23 तियां बरनबास आन सीलासोअ आथे ए सिट्टी लेखीत मोकल्यी: "अंताकिया, सिरिया आन किलिकियामेहें रोनारा विश्वासी पायहोंहों जे बिगर यहुदीमेहें रोत होय, तुमाआं पाही प्रेशित आन डाया याआं वोगेहे रोत तुमुहूं सलाम. 24 आमू उनाअयाहा के आमामेर्‍याआ थोड़ाक जोंअ तिहीं जात कोइत, तुमुहूं तियांआं गोठी वाअहीं काबरावी देदा; आन तुमाआं मोने दुखाड़ी देदेहे, पोन आमू तियांहां तेहेली सुसना ने आप्यीते. 25 तियाहा काजे आमू आखाहाज मिलीत ठीक लागो के आमामेर्‍याआ थोड़ाक निवड़ीइल्या माट्योहों आपाअ मेराला पाही बरनबास आन पौलुसोअरी तुमाआं जागे मोकलो. 26 ए माटी एहेलाहा होय जियां आपाअ प्रभु ईसु ख्रिस्ताआ कामोअ काजे सोताआ जिव धोकाम टाक्यु. 27 तियाहा काजे आमू यहुदा आन सिलासोहो मोकल्याहा, जे गोठी आमू लेखताहा ते सोताहा तुमुहूं कोत देये. 28 आन यीं गरजेए गोठीही सोड़ीत, तुमापोअ फाशुउ बिहीरु वोजू ने टाको एहेलोह पवित्र आत्माहां आन आमुहूं ठीक लागो; 29 ते गोठी ए के तुमू मुर्तीही आपल्य गाराहा, रक्त, गोलू दाबीत माअल्य माहांमासो, आन सिनालो यांरोत सेटे रोवा. यांपरोत सेटे रोहा ताहां तुमाआं भलो ओवे. आगाड़ी तुमुहूं शांती."

30 ताहराअ तियांहां मोकल्या तिहीं रोत ते अंताकियामेहें पोत्या, आन आखा विश्वाशाहां टिग वालीत ते सिट्टी तियांहां आपी देदी. 31 ते सिट्टी वासीत कोइत तें जाअखीलेहे खुस ओवे. 32 यहुदा आन सिलास जे सोताहा बी भविश्यवक्ता ओता, डाहटी गोठी वाअहीं विश्वासी पाव्हीइलाहां शिक्शण आपीत कोइत मजबुत कोअये. 33 ते थोड़ाक दिही रोत कोइत, विश्वासी पाव्हीइलाआं जागे रोत तियांआं मोकलीइनाराआं जागे होकेहे वाट लागीत पोड़्या. 34 पोन सिलासोहो तिहींज रोअलोअ पोट्य.*15:34 थोड़ाक जुना लेख्यामेहें ओं वसन नाहां जोड़तो.

35 पोन पौलुस आन बरनबास अंताकियामेहें रुकाइत गोया: आन बिहीरा डाहटा माअहोंअरी प्रभुउ वसनोअ हाजी बातमीइ परसार कोअता आन सिकाड़ता रोया.

पौलुस आन बरनबासोअ वाटाइलोअ

36 थोड़ाक दिहोअ फासाड़ी पौलुसे बरनबासोहो कोयो, "जिया जिया सेहरोम आपू प्रभुउ वसन कोताप्योतो, साला, फाशाआ तियांमेहें फिरीत कोइत आपाअ विश्वासी पाव्हीइले केहेलेहे होय ते पालुहूं." 37 बरनबासोअ इश्शा ओती के योहान जियाहा मार्क कोतेहे, तियाहा आरी लेअलाअ विसार कोअयू. 38 पोन पौलुसोह तियाहा आरी लेत जाअलोअ ने पोट्य, काहाके योहान जो पंफूलियामेहें रोत वोलीत आवतु रोयुतो, आन सेवाआ कामोपोअ तियांअरी आखरी जाआं ने रोयुतो. 39 यी गोठी पोअ बेनुमेहें एतीही सोबासोबी ओत गोयी के बेनू आंगे आंगेज ओत गोया; आन बरनबास मार्काहा आरी लेत कोइत जाहाजीम बोहीत कोइत सायपरसोमेहें जातू रोयू. 40 पोन पौलुस सिलासोहो निवड़ीत लेदू, आन विश्वासी पाव्हीइला वाअहीं प्रभुउ मेरवानीम होपाइत कोइत तिहीं रोत जातू रोयू. 41 आन तो मंडड़ीही मजबुत कोअतूज सिरिया आन किलिकियामेहें ओवतुज गोयू.