1 तिहीं रोत पौलुस दिरबे आन लुस्रामेहें बी गोयू, तिहीं तिमथ्या नावोअ एक सेलू ओतू, तियाआ आयही यहुदीया वाली ओती जे विश्वासी ओती, पोन तियाआ आब्हू युनानी ओतू. 2 तो लुस्रा आन इकुनियुमोमेर्‍याअ विश्वासी पायहोंमेहें हाजू नावलात ओतू. 3 पौलुसोअ इश्शा ओती के तिमथ्य तियारी आवुहूं जोवे; आन जें यहुदी माअहें तियी जागे ओते, तियांआं वोजेसे तियाआ खतना कोअयू, काहाके तियां आखाहा मुंदू ओतू के तियाआ आब्हू युनानी ओतू. 4 आन गांवों गांवों जात कोइत माअहोंअ जागे तियां नियम पोताड्यू, जो येरुसालेमोअ मंडड़ीइ प्रेशितहों आन डायहां ठरव्युतो, के तें माअहें तियाआ पालन कोअहूं जोवे. 5 एहेंकोइत मंडड़ी विश्वासोमेहें मजबुत ओवती गोयी आन माअहोंअ गणती रोद्दीही वादती गोयी.

6 ते फ्रूगिया आन गलातिया भागोमेहें फिरताज गोया, काहाके पवित्र आत्मे तियांहां आसियामेहें वसन परसार ने कोअहूं जोवे कोत रुक्या. 7 तियां मुसियाअ गावोंअ हाद्दीइ आहने पोतीत कोइत, बिथुनियामेहें जाअलोअ ईतव्यो; पोन ईसुउ आत्मा तियांहां परवानगी ने आप्यी. 8 तियाहा काजे ते मुसियामेहें फिरताज त्रोआसोमेहें आया. 9 तिहीं पौलुसे राती एक दर्शन देख्यो के एक मकिदुनियावालू माटी तियाआ सामने उबू रोत रावण्या कोइत कोहे, "उतरीत कोइत मकिदुनियामेहें आव, आन आमाआं मदत कोअ!" 10 तियाआ ओं दर्शन हेएताज वाआ आमू ताअहांज मकिदुनिया जाअलो तियारी कोअयी, ओं समजीत कोइत के देव आमुहूं तियांहां हाजी बातमी कोतापीइलाअ काजे हाद्याहा.

11 तियाहा काजे त्रोआसोम रोत जाहाज तोइत आमू पादराज सुमात्राकेमेहें आन बिहीरे दिही नियापुलिसोमेहें आया. 12 तिहीं रोत आमू फिलीप्पी पोत्या, जो मकिदुनिया इलाखाअ मुख्य सेहर आन रोमवालाअ वोहती होये; आन आमू तिया सेहरोमेहें थोड़ाक दिही जाआं रोया. 13 आरामोअ दिही आमू सेहरोअ बारथे नोयीइ तोड़े ओं समजीत कोइत गोया के तिहीं प्रार्थना कोइलाअ जागू ओये, आन बोहीत कोइत तिहीं टिग वोलीत रोल्यी बोईंइरी गोठी कोआ वोल्या. 14 लुदिया नावोअ थुवतीरा होयरोअ जामण्ये साअके वेसनारी एक भक्तण बाय उनाअया कोअतीते. प्रभु तियीइ मोन उगाड़्यो के ते पौलुसोअ गोठीपोअ मोन लागाडे. 15 जेहेलाम लुदिया तियीइ कुटूंबाअरी बाप्तिस्मा लेदो, ताहां तियी आमुहूं रावणी कोअयी के, "तुमू जर माहूं प्रभुउ खरी विश्वासी समजीइतेय, ताहां साला आन माआं कोअमेहें रोवा," आन ते बाय आमुहूं मानाड़ीत कोइत लेत गोयी.

16 एक दिही आमू जेहेलाम प्रार्थना कोइलाअ जागे जाताते, तेहेलाम एक पुतवाअली बोयोंअ मिल्यी, जियीमेहें भविश्य कोनारी पुतोअ आत्मा ओती. ते भविश्य कोत कोइत तियीइ मालख्योहो जाअखीलाहा पोशा कामावित आपतीते. 17 ते पौलुसोअ आन आमाआं फासाड़ी आवित कोइत आअड़ी वोल्यी, "एं माअहें आखाम रोत वोडा देवोअ सेवक होये, जें तुमुहूं सुटकाअ वाटेए काईं कोतापतेहे." 18 ते बोयोंअ जाअखीलाहा दिही जाआं एहेंज कोअती रोयी; पोन पौलुस जुदू ओसवाअयू, आन वोलीत कोइत तियी आत्माहां कोयो, "आंय ताहूं ईसु ख्रिस्ताआ नावसे आदेश आपोहो के यी बोईंमेहें रोत निहीत जा!" तेताजमेहें ते आत्मा तियीम रोत निहीत गोयी.

19 जेहेलाम तियी बोड़वीइ मालख्योहों मुंदू गोयू के आमाआं कामायीइ आशाज जाती रोयी, ताहां पौलुस आन सिलासोहो तोइत कोइत सौकडीमेहें आधिकार्‍योंअ जागे गोसाट्टाज लेत गोया; 20 ते तियांहां रोमन आधिकार्‍योंअ जागे लेत गोया आन कोयो, "एं माअहें जे यहुदी होये, एं आपाअ गांवोंमेहें दोंगू माताड़तेहें; 21 आन एहेलिही रिती कोतापतेहे, जियींहीं स्विकार कोइलोअ नेत मानीइलो आपाअ रोमनवाला माअहोंअ काजे कायदाअ पुरमाणे बोराबर कायनाहां."

22 ताहरीइ माअहोंअ गर्दी बी तियांआं विरुद्धामेहें टोलू वोलीत कोइत पौलुस आन सीलासोअहें गुगदीत आयी, तेहेलाम आधिकारी तियांआं आंगड़े फाडीत कोइत काडीत टाक्ये, आन तियांहां सापका देअलोअ आदेश आप्यू. 23 ताहराआ जाअखीलाहा सापका देत कोइत तियां सिलास आन पौलुसोहो जेलेमेहें टाकी देदा, सिपायडाअ मुख्याहा आदेश आप्यू के तो तियांहां वारुहूं केंडीत मिके. 24 तिये ओ आदेश उनात कोइत तियांहां मायतेए खुलीमेहें मिक्या आन तियांआं गुडा लाकडामेहें सिपड़ी देदा.

25 आरदी राती पौलुस आन सिलास प्रार्थना कोअता जात देवोअ भजन गावया कोअताते, आन जेलीमेर्‍येए बाकी माअहें कान देत उनाअया कोअतेते. 26 तेताजमेहें एक वोडो भुकंप ओयो, जेलेए पायू जाआं आलित गोयू, आन ताब्बुड़ आखे बाअणे उगड़ीत गोये; आन जेलेमेर्‍याआ आखाआ बेड़ी टुटीत गोयी. 27 जेलेए राखवाली निंदेम रोत जाग्यू, आन जेलेए बाअणे उगडाअले देखीत कोइत समज्यो के जेलेमेर्‍येए माअहें नाहींत गोयेहे, तियाहा काजे तिये तलवार काडीत कोइत सोताहाज मोइत जाअलो इतव्यो. 28 पोन पौलुस वोडा आवाजोमेहें आअड़ीत कोइत कोयो, "सोताआ काविंहीं नुकसान मा कोइत लेही, काहाके आमू आखा इहींज होये."

29 ताहरुउ जेलेए राखवाली कोअनारे एक कोंदील मागाड्यू आन ताब्बुड़ मायते गुगद्यू, आन कापतू कापतू पौलुस आन सिलासोअ पागे पोड़्यू; 30 आन तियांहां बारथे काडीत कोइत फुशो, "महाराज, वासाइलोअ काजे आंय की कोओ?"

31 पौलुस आन सीलासे कोयो, "प्रभु ईसु पोअ विश्वास कोअ, ताहां तू आन ताआ कुटूंबो वासाइत जाये." 32 आन पौलुस आन सिलास तियाहा आन तियाआ कोअमेर्‍याआ आखा माअहुंहूं प्रभुउ वसन कोताप्य. 33 तियी वेले रातीज तिये जेलेए राखवाल्ये तियांहां लेत जात कोइत तियांआं जखम तुवयी, आन तिये आन तियाआ आखा माअहूं तुरतुज बाप्तिस्मा लेदो. 34 ताहरोअ तिये तियांहां तियाआ कोअमेहें लेत जात कोइत रोटू खावाड़्यू, आन आखा कोअबार्‍याअरी देवोपोअ विश्वास मिकीत खुशी कोअयी.

35 जेहेलाम दिही उगु ताहराअ रोमन आधिकार्‍यों सिपायडाअ मुख्याहा कोत मोकल्यो, के तियां माअहुंहूं सोड़ी द्या.

36 जेलेए राखवाल्ये ए गोठी पौलुसोहो कोयी, "आधिकार्‍ये तुमुहूं सोड़ी देअलोअ आदेश मोकल्युहू. तियाहा काजे ओमे निहीत कोइत होकेहे जाता रोवा."

37 पोन पौलुस सिपायडाअ आधिकार्‍योहो कोयो, "आमू जे रोमन माटी होय, बिगर गुनेज माअहोंअ सामने देदा आन जेलेम टाक्या. ओमे काहा आमुहूं ठावकाज काडताहा? एहेलोहो ने जोवे; पोन रोमवाला आधिकारी सोताहा आवित कोइत आमुहूं बारथे काडुहूं जोवे."

38 सिपायडाअ आधिकार्‍यों ए गोठी रोमन आधिकार्‍योहों कोयी, आन ते ओं उनाइत कोइत बित गोया, के ते रोमी होय. 39 आन आवित कोइत तियांहां पोटावया, आन बारथे लेत जात कोइत रावणी कोअयी के गावोंम रोत जाता रोवा. 40 ते जेलेम रोत निहीत कोइत लुदियाअ कोअ गोया, आन विश्वासी पायहोहों मिलीत कोइत तियांहां धिर आपीत कोइत जाता रोया.