1 एक दिही पेत्र आन योहान दिहे तीन वाजता प्रार्थनाअ वेले मंदिरोम गोया. 2 आन माअहें एका जल्मार्‍याआ लेंगड़ाहा लेतावीत दाड़ख्येए मंदीरोअहीं "बाहरी" नावोअ बाअपुरे मंदिरोमेहें जानारा पोअ बिख मागे तेहें बोहाड़ी देतेते. 3 जेहेलाम तिये पेत्राहा आन योहानोहो मंदिरोमेहें जात्लाहा देख्या, ताहां तिये तियांपोअ बिख माग्यी. 4 पेत्रे योहानोअरी तियाआ वोलेहे ध्यान लागाड़ीत पाल्योन कोयो, "आमाअहें पाल!" 5 याअकाजे तो की तेबी मिले एहेलिही आशा मिकीत तियांआं वोग पालु वोल्यू.

6 ताहरुउ पेत्रे कोयो, "मापोअ नाहां सांदी आन नाहां होनो, पोन जो मापोअ होय तों ताहूं आपोहो; नासरेथवाला ईसु ख्रिस्ताआ नावसे सालु वोल." 7 आन पेत्रे तियाहा हाजाड़्यू आथ तोइत कोइत उठाड़्यु; आन ताब्बुड़ तियाआ गुडाम आन टोसणोम सेक्ती आवित लागी. 8 तो उसलीइतुज उबू रोत गोयू, आन सालु-फिरु वोल्यू; आन सालतू, नासतू, आन देवोअ स्तुती कोअतूज तियांअरी मंदिरोम गोयू. 9 आखे माअहें तियाहा सालत्लू फिरत्लू आन देवोअ स्तुती कोअत्लू पालित कोइते, 10 तियाहा ओलखीत लेदू के ओ तोज भिखारी होय जो मंदिरोअ "बाहरी" नावोअ बाओ पोअ बोहीत कोइत बिख माग्या कोअतुतो; आन ते घटना जे तियाअरी ओवीते, तों देखीत कोइत आखे जुदे बोगलाइत गोये.

11 जेहेलाम तो पेत्र आन योहानोअ आरी ओतू, ताहां आखे माअहें जाअखीलेहे बोगलाअतेज शलमोनोअ ओटू कोतेहे तियी जागे गुगदीइतेज आये. 12 ओं पालित कोइत पेत्रे माअहुंहूं कोयो, "ए इस्राएलवाला, तुमू या माहुंहूं देखीत काहा बोगलाअतेहे? आन आमाआं वोलेहे एहें कोइत काहा पालतेहे? तुमुहूं लागतोय के आमाआं सोताआ सेक्ती भक्ती वाअहीं याहा आमू सालतू फिरतू कोई देदू. 13 अब्राहाम, इसाहाक आन याकोबोअ देव, आपाअ डायहांआं देवे तियाआ सेवक ईसुउ महिमा कोअयी, जियाहा तुमू तोइत आपी देदू, आन जेहेलाम पिलाते तियाहा सोड़ी देअलोअ विसार कोअयू, तेहेलाम तुमू पिलातोअ हुंबर तियाआ नाकार कोअयू. 14 तुमू तिया पवित्र आन धर्मीइ नाकार कोअयू, आना विनंती कोअयी के एका माहोंण माराहा तुमाआं काजे सोड़ी देअहूं जोवे;✝3:14 मत्तय 27:15-23; मार्क 15:6-14; लुक 23:13-23; योहान 19:12-15 15 आन तुमू जिवनोअ उकलाहा माईंत टाक्यु, जियाहा देवे मोल्याम रोत जिवतु कोअयू; आन यी गोठीइ आमू साक्शीदार होय. 16 आन तियाआज नावम, तिया विश्वासो वाअहीं जो तियाआ नावोपोअ होय या माहुंहूं ताकत जोड़्यीही; जियाहा तुमू पालतेहे आन जांअतेहे बी, तियेज विश्वासे जो तियाआ नावो वाअहीं होय, याहा तुमा आखाआ हुंबर मोस्तेए हुदारी देदुहू.

17 "ओमे ए पाव्हीइला, माहूं मुंदू होय, के ओं काम तुमू विण जांअयेंज कोअयो, आन एहेंज कोइत तुमाआं पुढाऱ्यों बी कोअयो. 18 पोन जियीं गोठीही देवे आखा भविश्यवक्ताआं जिबानी वाअहीं पेलुज कोत देदीते, के तियाआ ख्रिस्त दुख वेठे, तियीं गोठीही तिये एहें कोइत पुरी कोअयी. 19 तिहीं वाअहीं, पापोअहें रोत मोन फिरवा आन वोलीत आवा मोन्ज्ये तुमाआं पाप माफ ओत सेके, 20 आरामोअ दिही प्रभुउ तरफ से आवुहूं जोवे आन तो ईसुहू मोकले जो तुमाआं काजे पेलुज रोत ख्रिस्त कोत ठरवाअयुहू. 21 तो आखी गोठीइ सुदार कोइत लेय, जियींइं बाप्तिमेहें जुना वाडोम रोत देवे तियाआ पवित्र भविश्यवक्ताआं जिबानी वाअहीं वसन आप्योतो, ताअहूं जाआं तियाआ होरगामेहें रोअलोअ जरुरी होये. 22 जेहें कोइत मोशे कोयो, के ‘प्रभु देव तुमाआं पायहोम रोत तुमाआं काजे माआं हारकू एक भविश्यवक्तू उबू कोए, आन जो किबी तो तुमुहूं कोये, तियाआ तुमू उनाअजा.✝3:22 कायदा 18:15,18 23 पोन जों माहुंउं तियां भविश्यवक्ताआ गोठ ने उनाये, तों माअहूंम रोत आरवी देवाय.’ 24 आन शमुवेलोअ जागे रोत तियाआ फासाड़ी वालाआ जागे जाआं जेत्ता भविश्यवक्ताहां कोल्यो, तियां आक्खा यां दिहोअ खबर कोत आप्यीही. 25 तुमू भविश्यवक्ताआं वारीस आन तिया शप्पतेए भागीदार होये, जे देवे तुमाआं डायहांअरी खादीते, जेहेलाम तिये अब्राहामोहो कोयो, ‘ताआ पारवाडीम रोत धरतीइ बादे माअहें आशिर्वादीत ओवे.’ 26 देवे तियाआ सेवकोहो उठाड़ीत कोइत पेल तुमाआं जागे मोकल्यू, के तुमामेहें रोत हारेक जोओं तुमाआं खाराब गोठीम रोत मोन फिरवे, ताहां तुमुहूं आशिर्वाद आपीत सेके."