1 ताहां डाये पुंजारके स्तिफनोह फुशो, "केहें ए गोठी खोरीज होय के?"

2 स्तिफने उत्तर आप्यो, "ए आखा पाही आन डाया उनाआ! आपाआ आब्हू अब्राहाम हारान देसोमेहें वोहती कोइलाअ पेल जेहेलाम मेसोपोटामिया मेहें ओतू; तेहेलाम महिमावाले देवे तियाहा दर्शन आप्यो. 3 आन तिये अब्राहामोहो कोयो, ‘तू ताआ कुटूंबाम रोत आन देसोम रोत निहींत कोइते आंय ताहूं देखाड़ीहीं तिया देसोम जा.’ 4 ताहरुउ तो कसदीइ देसोमेहें रोत निहीत कोइत हारान देसोमेहें जात वोहती कोअयी. तियाआ आब्हू मोयू तिहींइं फाटी देव तियाहा तिहीं रोत या देसोमेहें लेतावीत कोइत बोहाड़्यू, जिहींम ओमे तुमू वोहती कोइत रोताहा. 5 आन या देसोमेहें देवे अब्राहामोहो तियाआ हक्काआ किज ने आप्यो, तेतोज नाहां पोन तियाहा गुडू मिकीइलाअ जागू बी ने आप्यू, पोन देवे शप्पत खादी के आंय ओ देस ताहूं आन ताआ फासाड़ी ताआ पारवाड़ीही हक्काआ कोत आपी देहीं; पोन तिया गालाहा अब्राहामोअ कोड्लोज पोर्‍य ने ओतो. 6 आन देवे ओं कोयो, ‘ताआ पोऱ्ये पारका देसोमेहें पारके ओवे, आन ते तियांहां वेठाऱ्ये बोणावीत लेये, आन शार होव वोरह्ये जाआं तारास देये.’

7 "फाशोअ देवे कोयो, ‘जिया देसोअ ते साकरी कोए, तियाहा आंय डोंड आपीहीं, आन याअ फासाड़ी ते निहींत कोइते यीज जागे माआं सेवा कोए.’ 8 आन देवे तियाअरी खतनाआ शप्पत खादी; आन यीज होमसे अब्राहामोहो इसाहाक ओवू, आन आँठ दिहोमेहें तियाआ खतना कोअयू; आन इसहाकोअ याकोब ओवू आन याकोबोअ बारा पोर्‍या ओवा, जे आपाआ कुलपती बोण्या.

9 "वेगाअ डायहां योसेफोअरी आद्राय कोइत तियाहा मिसर देसोम जानाराहां वेसीत खात गोया, पोन देव तियाअरी ओतू, 10 आन योसेफोहो तियाआ आखा तारासोमेहें रोत सोड़वीत कोइत मिसर देसोअ राजा फारोअ नजरेमेहें मेरवानी आन बुद्दी आप्यी, आन फारो राजा तियाहा मिसर देसोपोअ आन तियाआ आखा कोअमेहें आधिकारी नेम्यू. 11 ताहरोअ मिसर आन कनानोअ आखा देसोमेहें काल पोड़्यू; जिया वाअहीं खुब वोडु हाल ओवू, आन आपाअ वेगाअ डायहांहां दाणा ने जोड़ताते.✝7:11 उत्प 42:1,2 12 पोन याकोबे ओं उनाइत कोइत के मिसर देसोमेहें दाणा होये, आपाअ वेगाआ डायहांहां पेल्लीज वारी मोकल्या. 13 बिहीरी खेपे योसेफे तियाआ पायहोहो तियाआ बाप्तिम कोताप्य आन फारोहो योसेफोअ कुटूंबाआ मुंदू जोड़्यू. 14 ताहरुउ योसेफ तियाआ आब्हा याकोबोहो आन तियाआ पुरा कुटूंबाहा, जें पोन्शात्तर माअहें ओते, तियांहां हादे मोकल्ये. 15 ताहरुउ याकोब मिसर देसोमेहें गोयू; आन जिहीं तो आन आपाआ वेगाआ डायहां मोइत गोया. 16 तियांआं तोड़ शेखेमोमेहें लेतावीत कोइत तिया माहणोमेहें ओजी देदे, जियाहा अब्राहामे सांदी आपीत कोइत हमोरोअ पोर्‍यापोअ वेसात लेदोत.

17 "पोन जेहेलाम तियी शप्पतेए पुरो ओवीइलाआ वेल आहने आयी जे देवे अब्राहामोअरी खादीते, ताहरेए मिसर देसोमेहें तें माअहें जाअखीलेहे वादीत गोये आन गणतीमेहें जाअखे ओत गोये. 18 ताहरुउ मिसर देसोमेहें बिहीरु राजा आयू जो योसेफोह ने ओलखीइतुतो. 19 राजा आपाआ घराणाअरी हुशारी कोइत आपाअ वेगाअ डायहांअरी एतुहू खाराब साल्यू, के तियांहां सोताआ पोर्‍ये टाकी देअलो पोड़्यो के तें जिवते ने रोअहूं जोवे. 20 तिया गालाहा मोशेए जल्म ओवो. तो देवोअ नजरेमेहें खुब हाजू ओतू. तो तीन मोयना जाआं तियाआ आब्हाअ कोअमेहें वोडु ओवू. 21 पोन जेहेलाम टाकी देदू ताहां फारोअ राजाअ बेटिह्ही तियाहा बारथे काड्यू, आन सोताआ पोर्‍यू कोत पोहयू. 22 मोशेहे मिसरवालाआं आखी विद्या सिकाड़्यी, आन तो वसन आन काम बेनुमेहें ताकतवान ओतू.

23 "जेहेलाम तो सालिही वोरह्योअ ओवू, ताहां तियाआ मोनोम लागो के आंय माआं इस्राएलवाला पायहोंहों मिलो. 24 तिये एका पायहोहो तारास कोआड़त्ले देखीत कोइत तियाहा वासाड़्यू, आन मिसरवालाहा माईंत देत तिया तारास कोआडल्याआ बोदलू लेदू. 25 मोशेए विसार ओ ओतू के देव माआं आथोवाअहीं तियांआं सुटका कोए; पोन तियां एहेलोह ने समज्यो. 26 बिहीरे दिही जेहेलाम ते तियां तियांआं सुलाअया कोअताते, तेहेलाम मोशे तिहीं आयू; आन ओं कोत कोइत तियांहां होमजोण काडीइलोअ कोशित कोअयी, ‘उनाआ पाही, तुमू तोम पाही पाहीज होयेन बेनू एकमेकाअरी काहा सुलाअताहा?’ 27 पोन जो जागर्‍याहा तारास देतुतो, तिये मोशेहे ठेपलीत देत कोयो, ‘ताहूं कोडे आमापोअ आधिकारी आन न्याय कोअनारु ठरव्युहू? 28 केहें तू काल मिसरवालाहा माअल्यू तेहेंज कोइत माहूं बी माऊ आयुहू के?’ 29 ए गोठ उनाइत कोइत मोशे नाठू आन मिद्यान देसोमेहें वोहत्यू बोणीत रोनु वोल्यू, आन तिहीं तियाहा बेन पोर्‍या ओवा.

30 "जेहेलाम पुरे सालिही वोरह्ये ओत गोये, ताहां एक देवदुत सिनाय डोगोप जंगलोमेहें मोशेहे पेटाअत्ला साटवामेहें दर्शन आप्यो. 31 मोशे ओं दर्शन देखीत कोइत बोगलाइत गोयू, आन जेहेलाम पालीइलाअ कोअते आहने गोयू, तेहेलाम प्रभुउ ओ आवाज उनाअयू: 32 ‘आंय ताआ डायहांआं देव, अब्राहाम, इसाहाक आन याकोबोअ देव होय,’ तेहेलाम मोशे कापित रोयू, एतीही बिक लागी के तियाहा पालुहूं हिम्मत ने रोयी. 33 ताहां प्रभु मोशेहे कोयो, ‘ताआ गुडामेएं खाहड़े काडी दे, काहाके जिया जागापोअ तू उबू रोयुहू तो पवित्र जागू होये. 34 आंय मिसर देसोमेहें रोनारा माआं माअहूं पोअ ओवनारा तारासोहो देख्युहू; आन तियांआं रोड़ीइलो होंबल्योहो. आंय तियांआं सुटका कोअहूं काजे उतर्‍युहू. ओमे तियार ओव! आंय ताहूं मिसर देसोम मोकलिहीं.’

35 "जिया मोशेहे तियां ओं कोत कोइत नाकार्‍यू, ‘ताहूं कोडे आमापोअ आधिकारी आन न्याय कोअनारु कोत नेम्युहूं?’ तियाहाज जिये देवदुते तियाहा साटवामेहें दर्शन आप्यो तिया वाअहीं देवे आधिकारी आन सुटका कोअनारु कोत नेमीत कोइत मोकल्यू. 36 ओज मोशे मिसर देसोम आन लाल दोर्‍या आन जंगलोमेहें सालीही वोरह्ये जाआं वोडे वोडे कामे आन समत्कार देखाड़ी देखाड़ीइ तियांहां काडीत लेतायू. 37 ओ तोज मोशे होय, जिये इस्राएल वालाहां कोयो, ‘देव तुमाआं पायहोंमेहें रोतीज तुमाआं काजे माआं सारकू एक भविश्यवक्ता उबू कोए.’ 38 ओ तोज होय, जिये जंगलोमेहें मंडड़ीइ विसमेहें तिया देवदुतोअरी सिनाय डोगोपोअ तियांअरी गोठी कोअयीते आन आपाअ वेगाअ डायहांअरी तो ओतू, तियाहाज जिवते वसने जोड़्ये मोन्ज्ये तो आपाअ जागे जाआं पोताडीत सेके.

39 "पोन आपाअ डायहां तियाआ गोठी ने मान्या, गाठ्याअ तियाहा ओनखे कोइत तियांआं मोन मिसर देसोअहें फिरव्यो, 40 आन आरोनोहो कोयो, ‘आमाआं काजे एहेलेहे देवें बोणाव जें आमाआं आगाड़ी आगाड़ी साले, काहाके ओ मोशे जो आमुहूं मिसर देसोमेहें रोत काडीत लेतायू, आमुहूं ने मुंदू के तियाहा की ओवो?’✝7:40 निर्ग 32:1 41 तियां दिहोमेहें तियां एका वासडीइ बासाअ मुर्ती बोणावीत कोइत तियीइ आगाड़ी गाराहा आप्यू, आन तियांआं आथीवल्या कामोवाअहीं मोज्या कोअयी. 42 तियाहा काजे देवे तियांआं वोगेहे रोत सोब मुअडीत लेदी आन तियांहां जुगोमेएं ताराआं पुंजन कोए तेहें सोड़ी देदे, जेहलोहो भविश्यवक्ताआं पुस्तकोमेहें लेख्योहो:

"‘ए इस्राएलोअ माअहूं,

केहें तुमू जंगलोमेहें सालीही वोरह्ये जाआं मेडा-बोकड़ाआं गाराहा

आन ओनोअ भेट माहूंज आपतेते के?

43 तुमू मोलेकोअ तंबू आन रिफान देवताराहा तोइत कोइत फिरतेते,

गाठ्येए तियीं मुर्तीहीं जियींहीं तुमू पुंजन कोइलोअ काजे बोणायींते.

तियाहा काजे आंय तुमुहूं बाबेलोअ आहने लेत जात कोइत वोहती कोआड़ीहीं.’

44 "साक्शीइ तंबू जंगलोमेहें आपाअ डायहांअ विसमेहें ओतू, जेहें कोइत तिये मोशेहे कोयोतो के, ‘जों माप तुमे देख्योहो, तियाज मापोवाअहीं याहा बोणाव.’ 45 तियाज तंबाहा जो तिया वाडोमेहें आपाआ डायहांअ आथे लागुतो, ताहां यहोशवाअरी इंहीं लेताया; तियी होमसे तियां बिगर यहुदीइ जागू ताबाम लेत लेदू, जियांहां देवे आपाअ डायहांअ सामने रोत काडी देदे, आन तो तंबू दाविदोअ वाडोमेहें जाआं रोयू. 46 तियापोअ देवे मेरवानी कोअयी, तियाहा काजे तिये विनंती कोअयी के तो याकोबोअ देवोअ काजे रोअलाअ तंबु बोणावीत सेके. 47 पोन शलमोने तियाआ काजे कोअ बोणायो.✝7:47 1 राजां 6:1-38; 2 इति 3:1-17

48 "पोने आखाम रोत वोडु देव आथोवाअहीं बोणावल्या कोअमेहें नाहां रोतू, जेहेंकोइत भविश्यवक्ता कोयो,

49 "‘प्रभु कोहे, होरगो माआं राजगादी

आन धरती माआं गुडाअ निसेए पाट्लू होये,

माआं काजे तुमू केहेलोह कोअ बोणावहा?

आन माआं आरामोअ कोड्लू जागू रोये?

50 केहें ए बादी वस्तू माआं आथोवाअहीं बोणायी के?’✝7:50 यश 66:1,2

51 "ए जिद्दी आन कानोअ विणखतनावाला माअहूं, तुमू सादाज पवित्र आत्माआं विरोध कोअतेहें. जेहेंकोइत तुमाआं वेगेए डाये कोअतेते, तेहेंज कोइत तुमू बी कोअतेहें. 52 जियाहा तुमाआं डायहां तारास ने कोआड्युये एहेलुहू भविश्यवक्तामेएं एखू सुटुहू के? तियां तिया धर्मी सेवकोअ आविइलाअ बाप्तिम आगी खबर आपनाराहां माईंत टाक्या; ओमे तुमू तिया धर्मी सेवकोह बी तोअनारे आन माअनारे बोण्ये. 53 तुमुहूं देवोअ नियम देवदुतोंअ ठरिवल्या वाअहीं ते जोड़्यू, पोन तियाआ पालन ने कोअयो."

54 ए गोठ्यी उनाइत कोइत तें खिजवात गोये आन तियापोअ दात निसके वोल्ये. 55 पोन तिये पवित्र आत्माम पोआइत कोइते होरगाअहें पाल्यो आन देवोअ महिमाहा आन ईसुहू देवोअ हाजाड्यीइ वोल उबू रोल्यू देखीत कोइत कोयो, 56 "पाला, आंय होरगाआ बाआ उगडाअलो आन माहुंउं बेटाह्हाहा देवोअ हाजाड्यीइ वोल उबू रोत रोल्यू देखोहो."

57 ताहरेए तियां आअड़ीत कोइत कान बोंद कोइत लेदा, आन एकवार्‍येज तियापोअ टुटीत पोड़्ये; 58 आन स्तिफनह सेहरोअ बारथे काडीत कोइत तियाहा डोणाटे वोल्ये, साक्शीदारों तियांआं आंगड़े शाऊल नावोअ एका जुवानोअ गुडाअहीं काडीत कोइत मिकी देदे. 59 ते स्तिफनोपोअ डोणाट्याज कोअतेते, आन स्तिफन एहें कोत कोइत प्रार्थना कोअतू रोयू, "ए प्रभु ईसु माआं आत्माहां स्विकार कोअ." 60 ताहरुउ तिये मांड्या पोड़ीत आअड़ीत कोयो, "प्रभु, ओ पाप यांपोअ मा मोजही," आन एहें कोत कोइत तिये जिव सोड़ी देदू.