Ester 7

1 ताहां राजा आन हामान एस्तेर राणीइ पावणायीमेहें आया. 2 राजा बिहीरे दिही होरु पिता-पितामेहें एस्तेरोहो फाशोअ फुशो, "ए एस्तेर राणी! ताआ कि मागणी होय? तो पुरो कोइलाम आवे. तु कि मागेहे? माग, आरदो राज्य जाआं ताहूं आपिहीं."

3 एस्तेर राणी कोयो, "राजा साहीब! जर तु मापोअ खुस ओय, आन ताआ मोर्जी ओय, ताहां माआ नम्र विनंती स्विकार कोअहूं जोवे, आन माआ माअहोंहों जिवदान आपुहूं जोवे ए माआ मागणी होय. 4 काहाके माहूं आन माआ माअहोंहों माइत आरवीइलोअ काजे वेसी देदेहे; जर आमू गुलाम कोत वेसाअते तेबी आंय ठावकी रोती; तेबी तियी दशामेहें तिया दुस्मोनोहों राजाआ नुकसानोअ भरपाइ ने कोअता आवती."

5 ताहां राजा अश्वेरोशे एस्तेर राणीहीं फुशो, "एहलोहो कोइलोअ हिम्मत कोअनारु कोडू होय आन तो का होय?"

6 एस्तेर कोयो, "तो विरोधी आन दुस्मोन ओ हामानुज होय!"

ताहां ए गोठ उनात कोइत हामान राजा-राणीइ सामने बित गोयु. 7 राजा खोतेए बाल्लायी रोटू खातुखातुज राजवाड़ाआ बोगिसामेहें जातु रोयु; ताहां हामाने ओं पालीत लेदो के, राजा ओमे माहूं माइलाआ विसार कोइत लेदुहू, तियाहा काजे तो एस्तेर राणीइ सामने जात जिवदान मागू वोल्यू. 8 ताहरुउ राजा राजवाड़ाआ बोगिसाम रोत वापिस खाअला-पीइलाआ जागे आयु, ताहां तिये हामानोहो एस्तेरोअ सामने सोवकड़ीपोअ आड्लात रोल्यू देख्यू, ताहां राजा बावराअयू, "तु या कोअमेहें आन माआ सामनेज राणीही उदाबादीज आथे तोअहूं होदेहे के?"

राजा एहें कोताज वाआ सेवक मायते आया आन हामानोअ सोब टापी देदी. 9 ताहां राजाआ आगाड़ी हजर रोनारा सेवकोमेहें रोत हार्बोना नावोअ एके जोएं राजाहा कोयो, "जिये राजाआ जिव वासाड़्यू तिया मोर्देखायोअ कोअते हामाने पोन्नास आथ उसु फासीइ खांब उबु कोअयुहू."

राजा कोयो, "तियाहा हिद्लाआ खांबोपोअ टांगी द्या."

10 ताहां जो खांब तिये मोर्देखायोअ कोअते तियार कोअयुतो तिया हिद्लाआ खांबोपोअ हामानोहों फासी आपी देदी. ताहां राजाआ खोत उलाअयी.