1 आरामोअ दिहोअ फासाड़ी दितवारोअ दिही वेगऱ्यीइजे मग्दालिनी मरिया आन बिहीरी मरिया माहणोअहीं पाली आयी. 2 ताहां एक वोडो भुकंप ओवो; काहाके प्रभुउ एक दुत होरगामेहें रोत उतर्‍यू, आन आहने आवित तिये डोणोहों होरकावी देदू, आन तियापोअ बोहीत गोयू. 3 तियाआ रुप विजेए होस आन तियाआ आंगड़े बर्फाआ होस पांढे-पांढेज ओते. 4 तियाआ बिके वाअहीं जागल्या थुर थुर थोतरा वोल्या आन मोल्याआ होस ओत गोया.

5 देवदुत तियीं बायींहीं कोयो, "मा बिहा, माहूं मुंदू होये, के तुमू ईसुहू जो क्रुस खांबोपोअ सोड़वाअयुतो तियाहा होदतिही. 6 तो इंहीं कायनाहां, पोन तो तियाआ वसनोअ अनुसार जिवीत उठ्युहू; आवा, ओ जागू पाला, जिहीं प्रभु लोटीत रोयुतो. 7 आन मामार जात कोइत तियाआ सेलाहा कोवा, के तो मोतोमेहें रोत जिवीत उठ्युहू; आन तो तुमारोत पेल गालीलोमेहें जाहे, तिहीं तियाआ दर्शन जोड़े, पाला आंय तुमुहूं कोत देदो."

8 आन ते बिक आन वोडी खुसी वाअहीं माहणोअहीं रोत मामार वोलीत तियाआ सेलाहां खबर कोअलोअ काजे गुगदी वोल्यी.

9 उसकाहीज ईसु तियांहां मिल्यू आन कोयो, "सलाम" आन तें तियाआ जागे आवित तियाआ पागे पोड़ीत तियाआ भक्ती कोअयी. 10 ताहां ईसु तियांहां कोयो, "मा बिहा; माआं पायहोहों जात कोइत कोवा, के गालीलोमेहें जाये आन तिहीं ते माहूं देखे."

11 ते बोईं तियींइं वाटे लागी, ताहां जागल्यामेहें रोत थोड़ाक जोआं होयरोम आवित कोइत पुरी हालत मुख्य पुंजाराहां कोत देदी. 12 ताहां मुख्य पुंजारा पुढार्‍योंअरी एकठा ओत कोइत योजना बोणायी, आन सिपायड़ाहां जाअखीलाहां पोशा आप्या 13 आन कोयो, "तुमू एहें कोजा के आमू राती हुवत्ला तेहेलाम तियाआ सेलां आवित कोइत तियाआ तोड़ सोइत लेत जाता रोल्या. 14 आन जर ए गोठ राज्यपालोअ कानोपोअ जाआं गोयी, ताहां आमू तियाहा पोटावीत कोहूं के तुमू निर्दुस होये, आन तुमुहूं फिकर कोइलोअ कीज गरज कायनाहां."

15 ताहां जागल्या पोशा लेत कोइत तियां जेहलोहो कोअहूं लागाड़्यो तेहेंज कोइत कोअयो; आन ए गोठ आज बी यहुदी माहें मानतेहे.

16 ईग्यार सेला गालीलोमेहें तिया डोगोपोअ गोया, जिहीं ईसु तियांहां जाय तेहें कोयोतो. 17 तियां ईसुहू देख्यू आन तियाआ पागे पोड़्या, पोन थोडहाहा ते सौंसू आयू. 18 ईसु तियांआं जागे आवित कोयो, "होरगाआ आन धरतीइ आखु आधिकार माहूं आप्युहू. 19 तियाहा काजे तुमू जावा आन आखा देसोअ माअहुंहूं सेला बोणावा; आन तियांहां बाह्हाअ, आन बेटाह्हाआ, आन पवित्र आत्माआं नावसे बाप्तिस्मा आपा, 20 आन तियांहां आखी गोठी जे आंय तुमुहूं आदेश आप्युहू, ते मानिइलोअ सिकाड़ा: आन पाला, आंय दुन्या सेलाय ताअहूं जाआं तुमाअरी होंवे."