1 ताहां सैतानो वाअहीं परिक्शा ओवुहूं जोवे कोत आत्मा ईसुहू जंगलोमेहें लेत गोयू. 2 आन तिये सालीही दिही आन सालीही रात उपास कोअयू, तिहींइं फासाड़ी तियाहा फुक लागी. 3 ताहरुउ परिक्शा लेनारे आहने आवित कोइत कोयो, "तू जर देवोअ बेटुह्हू ओय, ताहां यां डोणोहों रोटू ओवे तेहें आदेश आप."

4 पोन ईसु उत्तर आपीत कोयो, "देवोअ वसनोमेहें एहें कोइत लेख्योहो के, माअहुंउं निस्त रोटा वाअहीं एतोज नाहां, पोन देवोअ सोबीमेहें रोत निहींनारा हारेक वसनो वाअहीं जिवे."

5 ताहां सैतान ईसुहू पवित्र होयरोमेहें लेत आयू, आन मंदिरोअ सुटीपोअ उबू कोअयू. 6 आन तियाहा कोयो, "जर तू देवोअ बेटुह्हू ओय, ताहां निसे उडीत पोड़;" काहाके एहेलोह लेखाअयोहो के,

"‘तो तियाआ दुतोंहों ताआ काजे आदेश आपे,

आन ताआ गुडा डोणोहों ठोकाअहूं ने जोवे काजे

ते ताहूं उसाअ उसेज सेलवीत लेये.’"

7 ईसु तियाहा कोयो, "वसनोमेहें ओं बी लेख्योहो के, ‘तू, ताआ देव प्रभु याआ परिक्शा मा लेही.’"

8 फाशुउ सैतान ईसुहू जाअखीला उसा डोगोपोअ लेत गोयू, आन दुन्यामेर्‍योअ आखो राज आन तियाआ वोडी वोडी गोठी तियाहा देखाड़्यी. 9 आन सैताने तियाहा कोयो, "जर तू माआं पागे पोड़ीत भक्ती कोअही, ताहां आंय ओं आखो बादो ताहूं आपी देहीं."

10 ताहां ईसु तियाहा कोयो, "ए सैतान! माआं जागेहे रोत निहींत जा, काहाके लेख्योहो, ‘तू, ताआ देव प्रभु याआ पागे पोड़, आन निस्तु तियाआज भक्ती कोअ!’"

11 ताहां सैतान ईसुहू सोड़ीत निहींत गोयू: आन पाला, देवोअ दुत आवित ईसुउ सेवा कोआ वोल्या.

12 जेहेलाम ईसु उनाअयू के योहानोहो जेलेम केंड्युहू, तेहेलाम तो गालीलोमेहें जातु रोयू. 13 आन नासरेथ सोड़ीत तो जबुलुन आन नफताली यां मुलखोमेर्‍याआ दोर्‍याआ मेरे कफर्णहुम होयरोम आवित रोनु वोल्यू. 14 ओं याआ काजे ओवो के, यशया भविश्यवक्ते जों कोयोतो, तों पुरो ओवुहूं जोवे, तों एहेलोहो होये:

15 "दोऱ्याआ वाटेएहें जबुलुन आन नफतालीइ मुलख,

यारदेन खाडीइ तियी वोगर्‍याआ,

बिगर यहुदी माअहुंउं गालील मुलख!

16 जे माअहें आंदारामेहें जिवतेहे,

तियां वोडो उजालो देख्यो;

आन जें मोतोअ देसोम आन सावलामेहें रोतेहे,

तियांपोअ उजालो सोमक्यो."

17 तेहेलाम रोत ईसु संदेश कोनु वोल्यू के, "तुमाआं पापोअहें रोत फिरा, काहाके होरगाआ राज आहने आयोहो!"

18 ईसु गालीलोअ दोऱ्याआ टेकोपोअ रोत जानु वोल्यू; ताहां तिये बेनू पायहोहो मोन्ज्ये पेत्र कोतेहे तिया शिमोनोहो, आन तियाआ पाही आंद्रिया यांहां दोर्‍यामेहें जाल टाकत्लाहा देख्या; काहाके ते मासारा ओता. 19 ईसु तियांहां कोयो, "तुमू माआं फासाड़ी आवा, ताहां आंय तुमुहूं देवोअ राजोमेहें माहें तोअनारा बोणाविहीं." 20 ते ताबुड़तुड़ जालीही सोड़ीत देत ईसुउ फासाड़ी गोया.

21 आन तिहीं रोत आगाड़ी जात ईसु बिहीरा बेन पायहोहो देख्या, ते जब्दीइ पोर्‍या याकोब आन तियाआ पाही योहान, यांहां तियांआं आब्हू जब्दी याअरी नावड़ामेहें तियांआं जाल हुदारत्लाहा देख्या आन ईसु तियांहां हाद्या. 22 ताहां ते ताबुड़तुड़ नावड़ाहा आन तियांआं आब्हाहा टाकी देत ईसुउ फासाड़ी गोया.

23 ईसु पुरा गालीलो मेहें फिरतुज यहुदीइ आराधनालयो मेहें सिकाडतु आन राज्याआ हाजी बातमीइ परसार कोअतू, आन माअहुंउं हारेक जातीइ बिमारी आन आखी जातीइ कमजोरी हुदारतु फिर्‍यू. 24 आन पुरा सिरिया देसोमेहें तियाआ बातमी पसरीत गोयी; आन माअहें आखा बिमारी वालाहां, जे जुदी जुदी बिमारी आन कमजोरी मेहें दाबाइत रोयेते, आन जियां मेहें पुतोअ आत्मा ओती, आन फेपरा वाले आन लखवाआ बिमारी वालाहां, तियाआ जागे लेतावये आन तिये आखाहा हाजे कोअये. 25 ताहां गालील आन दकापलीस*4:25 दोहो गावोंअ मुलोख; मार्क 5:20; 7:31, येरुसालेम, यहुदीया, आन यारदेन खाडीइ तियी मेरेए मुलखो मेर्‍येए गोवारान गोवारा माअहें ईसुउ फासाड़ी जाने वोल्ये.