Marcos 5

Jesuh naa Tusee Bynnei Khyang Pahuat Kaansyak

1 Ynpynnyng yn haa cee Gerasenes pee tuiili jaalyam ym phawluu. 2 Jesuh cee lawng dukkuːh y lytluu hnguva, ynih khawmmei haijaa zu va kuːh muikhaw see bynnei khyang, khyang pahuat luu. 3 Yn khyang cee zu va y myi, u naa khy ynih thiijoii jyng khawn nyn jo. 4 Ibawthonnyngmaa tijyngcee yn cee kut laa khu thiijoii jyng khawn soi, y thaa myi khiannyng thiijoii hakhy khuvyng kuːh y saah nyn. Ynih joi haija u naa khy muan nyn jo. 5 Hnguːp laa juan n zu laa cungkhuva pang theila y pumhngaw luung ngyng syapei.

6 Jesuh paan nawva kuːhthuh y hnguh hnguva, zawenlue theilaa ynih hngoai mawva y khukdyaa lu. 7 Ynpynnyngcee, "hluːngduː tih Nuatpaw zawaw Jesuh! keei jyng ibawva ny luː maa? Keei caaipiat kawh tijyng Nuatpaw ming nyng ky khawhei," tilaa thaii jyauva y pang. 8 Yn nyng Jesuh naa, "Muikhaw see vo, yn khyang dukkuːh lytlue!" y tinyak.

9 Ynkhianyng Jesuh naa yn khyang nyng y hngi, "Nyang ming u maa?"

Ynih naa "Keei ming cee Legion asi, panuekung kym myi," y tinyak. 10 Ynpynnyng Jesuh eyng yn pee jaakuːh shyt kawhaijaa ym khawhei soi.

11 Yn duːn cungkhu va cawawlyakkeitih vok bawng haa ym myi. 12 Tusee haa naa Jesuh eyng, "Keeimi vok haa dukka voang syak piatmawh," tilaa ym khawhei. 13 Jesuh naa yn haa kuːmsyak bei, muikhaw see haa cee lytkiah awla vok dukka ym voang. Aluva cee thawng hngih byang ym myi, tuiili duːkka shoigiah awla ym byt kiah.

14 Ynhaa zongtih haacee zawn theiawla luh duːkka laa nyaampung haa yn ym saihjok, ibawthawn maa tijyng hnguh haijaa khyang haa ym zet.