1 Yn hnguva, Sawluh ce Mawhpaw hngulawnglyktih ha tuk kyy y lung thoo theila Jahhenpaw Lian cenga y zet. 2 Damascus luh a myitih sinakok ka shin caw ha bei theila Nuatpaw lawnglyktih putaw sikawvyngcee hngutaw ha lyam myng nym hnguh khyang tomti muan zawla Jerusalem ma kuːh phehimm myng kyak ky y shin.

3 Sawluh ce Damascus luh cengga y lawijei lu hnguva, ynih cenga cacatnawva huankhu kuːh a angtih daw lu. 4 Yn ce dek kyng hngyng kyng theila athaii pahuat ynih eyng, "Sawluh, Sawluh, kei ibawthawnnyng ny phehphaei ma?" y tinyak.

5 Ynhnguva, Sawluh na, "Mawhpaw aw, Nyang u ma?" tinyak hnguva,

"Nyang phehphaei khyang kei Jesuh ky si. 6 Tuh a thoo tila luh dukka voang ngeih, pynnyng nyang i cai lawh ey khyang nyang ngyng ky hyau vy," y tinyak.

7 Sawluh dy zet hah tih khyang ha na thaii ce ym jyak tya, ynbawlakhy yn ha na u khy hngu joaw. 8 Sawluh dek kyng kuːh thoo theila y mik dei hnguva, yn na ikhy hngu nyn ti jo. Yn khiannyng yn ha na Damascus luh lyaamma ym khut tyng hyijei awla ym zeh. 9 Khuhnguːp hnguːp thum y mik hung theila ikhy ei sikawvyngcee ou kawva myi jei.

10 Damascus luh dukka Ananias mingnawtih hngulawnglyktih pahuat y myi. Mawhpaw na ynih eyng lunghnguːn ngyng, "Ananias!" tila y pannei.

"Yih, Mawhpaw aw, kei mynija," y tinyak.

11 Mawhpaw na ynih eyng, "Lyam puːntih lyam tyng zet tila Judah imm ma Tarsus luh a kuːh khyang pahuat Sawluh mingnawtih shuijei byih, yn ce hngihminnei nyak y cai jei. 12 Ananias mingnaw tih khyang pahuat ce lu theila mik hnguh nyn bya haija yn huanna kut tyng ngy khyang lunghnguːn nyng y hnguh pyn," y tinyak.

13 Ananias na khy, "Mawhpaw vo, yn khyang na Jerusalem ma kuːh nyang khyang cim ha eyng a kyng tih kaw i hawh cai hnguːt tinyak khyang, khyang panukung cenga y jyak. 14 Yn khiannyng nyang ming biattih ha tomti muan haija jahenpaw lian cenga uːtyang y lawh," y tinyak.

15 Ynbawlakhy Mawhpaw na Ananias tyng, "Zet, Ni khyang ce Isreal khyang ha, yn ha syamphalyang ha la, khyang juː cya ha eyng kei ming ngyng susaih haija ky hngyahei khyang lawkla y si. 16 Kei ming tawk i hawh cyhei khyam lawh tinyak khyang kei na yn nyng ky duan ny," y tinyak.

17 Yn khiannyng Ananias ce imm ma zet theila y voang. Sawluh huanna y khut tyang theila, "Ky nau Sawluh aw, mynija ny lu hnguva lyaamma nyang cenga polu tih Mawhpaw Jesuh na nyang mik hngu bya nyak khy la Muikhaw Cim myng ny kuːm my tawk kei nyang cenga y tuhlu," y tinyak. 18 Saisikung, juːhuat byang ce Sawluh mik kyng kuːh ngawlip byang hlaijei lu theila atha y hnguh nyn bya. Yn ce thoo theila baptisma y khyammei. 19 Ynpynnyng eiou bya theila y tha luih lu bya.

Sawluh ce Damascus luh a hngulawnglyktih ha dy hnguːp syh y myi hah.

20 Mawk huat pyttyng Sawluh na Jesuh ce Nuatpaw Zawpaw y si tinyak khyang sinakok ka y susaih.

21 Y susaih khyang jaw tih tomti na muːnaw awla, "Ni khyang ce Jerusalem luh a yn ming biattih ha phehphaei tih si jo vei? Jahenpaw lian ha na thawng nga khaw haija zeh ey luːtih si jo vei," ym tii.

22 Ynbawlakhy Sawluh ce tha lawhei theila Jesuh ce Khrist tinyak khyang Damascus ta myitih Judah ha na muːnnyak kakai.

23 ✝Khuhnguːp diev pynnyng Judah ha na yn ym tuk ky ym khiangvoi, 24 Ynbawlakhy Sawluh na yn ha cijang khyang y hnguat. Hnguːp la juan yn ha na khy Sawluh ym tuk nyn ny tawk luh kyt ha cenga ym zong. 25 Ynbawlakhy yn hngulawnglyktih ha na amuː a ynih lyangok dukka shan theila hngawngei tih luh vong tyng ym hawn.

26 Jerusalem luh a y lu hnguva, hngulawnglyktih ha dy bawngei jy y cai, ynbawlakhy yn ha tomti na ynih ym kyh giah, yn khyang hngulawnglyktih pahuat y simu tinyak khyang u na khy jum joaw. 27 Ynbawlakhy Barnabas na ynih zeh theila ceepaw ha cenga y lu. Yn ha eyng y saih Sawluh na lyaam ma y lu hnguva Mawhpaw y hnguh hnguːt khyang, Mawhpaw na ynih eyng khyau hyau hnguːt khyang la Damascus luh a khy Jesuh ming ngyng kyh kawva y susaih hnguːt khyang y saih. 28 Yn hnguva Sawluh ce yn ha dy myi hah theila Jerusalem ma y luː bawva zet jok theila, Mawhpaw ming ngyng kyh kawva y susaih. 29 Yn ce Griik be hyautih Judah ha dy ym sumsa, ynbawlakhy yn ha na ynih tuk ky ym cijang. 30 Yn hnguva yn bawng jummeitih ha na ym jyak hnguva, Sawluh Caesarea luh a zeh awla Tarsus lyamma ym thuh.

31 Yn hnguva Judah pe, Galilee pe la Samaria pe tom myng jummeitihpuːpaw ha ce jadyam theila ym cihngia lu. Mawhpaw kyh nyak kyng shyak hyang awla, Muikhaw Cim buibem nyak kyng shyak hyang theila jummeitih ha khy ym kong lu.

32 Pitar ce pe ha a y zet jok theila, Lydda luh a myitih Mawhpaw khyang cim ha cenga y zet. 33 Ynija khukum kum shat ipnyak duːn nyng kutkhu byttih Aeneas mingnaw tih khyang pahuat y hnguh. 34 Pitar na, "Aeneas, Jesuh Khrist na nyang y kaangsa shyak pyn. Thoo tila ny phawhiih toom," y tinyak hnguva Aeneas ce saisikung y thoo hlyi. 35 Lydda luh la Sharon doo va myitih tomti na Aeneas hngu awla Mawhpaw cenga ym hlaijei lu giah.

36 Joppa luh a Thapitha mingnawtih hngulawnglyk pahuat y myi. (Griik ming nga ce Dorkas y ming nyak. Dorkas tinyak khyang ce "sawhug" a si). Yn ce sanglaitih ha phui theila y khyngtih caitih y si. 37 Yn hnguːp pyng yn ce kua theila y byt, y pum ce tuii hluh awla a huan khyn na ym tyak. 38 Lydda luh ce Joppa luh eyng lawijei; yn khiannyng Pitar ce Lydda luh a phawlu khyang jummeitih ha na ym jyak hnguva, yn cenga khyang pahngih thuh awla, "Keimi cenga y jyanga lu piatmawh," tila ym kawhei. 39 Yn khiannyng Pitar ce yn ha dy y zet hah. Imm y phawlu hnguva a huan khyn na ym zehpui nyak. Hngeinu tomti ce yn ka tung awla ym gap. Yn dy huattyng ym myi khyang la Dorkas na y tawh piat khyang suishyak ha ym duan. 40 Pitar na a kyn dukkuːh khyang ha tomti y lyt shyak; ynpynnyng y pumhngaw ce khukdya theila hngihminnei. Pitar ce hngutaw jawk cenga tannei theila, "Tabitha, thoo," y tinyak. Tabitha ce y mik dei hnguva Pitar ngoaei khyang y hnguh, ynih khy thoo theila y ngoa. 41 Pitar na y kut tyng do theila yn y thooh. Ynpynnyng jummeitih la hngeinu ha pan theila yn ha eyng syak hiyang byatih yn hngutaw y yap. 42 Yn sityang ce Joppa luh tomti ja pau jok giah theila, khyang panukung na Mawhpaw ym jummei lu. 43 Pitar ce Joppa luh shaw hlawhpa caitih Simon mingnawtih cenga khuhnguːp byang veih y myijei.