1 Lingso tih ha pyih pynnyng, Pawluh na hngulawnglyktih ha pannei theila thabei khyaukhaw hyau theila kutshyan pynnyng, Macedonia pee lyamma y zet. 2 Yn pe tomti ja zetjok theila jummeitih ha eyng thabei khyaukhaw hyau pynnyng, Achaia pe ja y zet. 3 Yn luh a kkhaw thum myi theila Syria pe lyamma kitawlawng ngyng zet ty piangsa jei hnguva, Judah khyang juː ha na tukky adukka ym cijang khyang Pawluh na y jyak lawh. Yn khiannyng Pawluh ce Macedonia pee zet theila zet bua ey tawk y cijang. 4 Berea luh shaw va thawntih Pyrrhus zawpaw Sopater, Thessalonica luh shaw ha thawntih Aristarchus la Secundus, Derbe luh shaw thawntih Gaius, Lystra luh shaw a thawntih Timawte, Asia pe shaw ha thawntih Tychicus la Trophimus ha cee Pawluh dy huattyng ym puijei. 5 Yn ha ce zet maw theila Troas luh a mymi ym zong. 6 Ynbawlakhy keimi na heenpui tih kaw pyi hnguːp cyng theila, khuhnguːp hnguːp pahngaw diev pynnyng, Philipi luh kuːh tuisyamphua dyang ngei theila, Troas luh a kym phaw. Yn luh a hnguːp syh kym myi.

7 Jin hnguːp* acuːk hnguːp pyng keimi ce phe iak haija huattyng kym lu. Pawluh ce atha hnguːp pyng yn luh kuːh zet bya ey khyang hnguːnnei khiannyng, khujuan diev cyp tala y susaih. 8 Keimi dynnei nyak a huanna khyn na meikuːp panukung myi. 9 Ynijaa Eutychus mingnaw tih compyang khyang pahuat y myi, yn ce Pawluh na a diev va susaih hnguva kyt tyng hngawngei theila y ipku pah. Yn ce ip theila shyyn pathum huan kuːh a dyanga khaw khiannyng, ym pyym hnguva byt khyang ym hnguat. 10 Yn hnguva Pawluh ce a dyanga kommei theila yn compyang byang theila y pym pynnyng, "Sawso kawh eyt, myn dikzaw y syak myi hyam," y tinyak. 11 Yn pynnyng Pawluh ce a huanna zet bua thuːh theila phe iak theila yn ha dy y ei hah. Yn ce yn ha eyng khuthuaih lyam cyp khyau theila, y zet bya. 12 Khyang ha na syak hiyang tih yn dikzaw zehpui naw theila ahlyi ja lungshyaksa nyak ym lawh.

13 Keimi ce tuisyamphua huanna khuai theila Pawluh dyangei nyak ky khyang Assos luh lyamma tuisyamphua eyng ym zet. Yn ce yn luh a kuːhthuh khoong lyam myng y zet dy tijyang y hnguːnnei khiannyng, yn bawva y cijang hnguːt. 14 Yn bawva keimi dy Pawluh ce Assos luh a khawmmei theila yn cee tuisyamphua huanna duːan awla Mitylene luh lyamma thathyiv kym zet. 15 Yn luh kuːh kitawlawng ngyng zet theila atha hnguːp pa Chios khongphai ja kym phawei. Yn nyng kuːh hnguːp huat ym zet pynnyng, Samos khongphai voang theila atha hnguːp pyng Miletus luh a kym phawei. 16 Yn hnguva Pawluh cee Asia pee ja acuːn pyih hluː kaw khiannyng Ephesus luh zehtaw awla kym cun ny hnguːnnei theiawnga, athawn nyn nyngcee Pentecost pyi hnguːp hlawn na Jerusalem luh a kym phaw ey tawk yn ce y lung soksak nawva y myi.

17 Yn khiannyng Pawluh ce Miletus luh a kuːhthuh Ephesus luh lyamma khyang tuːh theila jummeitihpuːpaw khyanglian ha na khawmmei lu haija y tuːh. 18 Yn ha ym phawlu hnguva, Pawluh na, "Kei ce Asia pee ja acuːk nyak ky phaw hnguːp pyng kuːhthuh, nyangmi dy my myih jok acuːn tyng ngyng ibaw ky myihcuh lupcap khyang ha nym hnguat giah. 19 Kei cee ahlyija lung hngiammei theila, ky mikki kyak hngyak kyng Judah ha na akhyng kawva ym tintaw khyang khyam lawh theinga, ym hlumhlik dukka, ky Mawhpaw khuːt ky bi hnguːt. 20 Ynbawva khyang puː mawva si seh imm huat kom imm huat khoi thawn seh ky cawkhyau hnguva, nyangmi tawk akhyng tih tawk susaih jy hngusup jonga. 21 Jubaijei awla Nuatpaw cenga nym lu bya ey la mymi na Mawhpaw Jesuh my jummei jy khyang Judah la Griik khyang juː ha eyng athukka ky susaih hnguːt. 22 Tuh a kei ce Muikhaw Cim na y susaih shyak tyng ngyng, Jerusalem luh a ky zet ty. Yn luh a kei jyang ibawva athawnny tijyang hnguat jonga. 23 Ynbawlakhy kei ce joii jyng khawnhiyan khyam lawh theila phehphaei khyam lawh ey khiannyng, Muikhaw Cim na luh tyng ngyng saksi eyng sathih y bei. 24 ✝Ynbaw hnguva Nuatpaw khunkhyi jyng behei tih sityang poai susaih jy tawk Mawhpaw Jesuh cengkuːh dyndyangei khyang cai jy khyang la khuːt cyng nynny hngucee, kei na ky syak kung khy pam jonga.

25 "Tuh a kei susaih khyang Nuatpaw teengpee bawng jaw lawh tih nyangmi myitih tomti na, atha mok huat kei hngoai hnguh lawh bya tuː hai si jo tinyak khyang kei na hnguat. 26 Yn khiannyng, kei na khyang tomti thii jyng behbyang jonga tinyak khyang tuhnguːp pa nyangmi jyng saksi ky khyammei. 27 Ibawthawnnyngma tijyngcee Nuatpaw luːnyak khyang myitih tomti nyangmi jyng ky susaih khyang, kei na hngusung taw hnguːt jonga. 28 Yn khiannyng nyangmi cee nym pumhngaw khy si seh hluzaw tomti khy si seh totawh lupan naw byih jyt. Nuatpaw zawpaw thii* jyng y luihngyah ei hnguːt khyang Nuatpaw jummeitihpuːpaw* ha lupan nyak khy tawk, yn hluzaw ha totawh tih ha Muikhaw Cim na nyangmi y yap hnguːt. 29 Kei zet bya pynnyng, hluzaw ha pawng mansei kawva ei tih hngee bawng ha nyangmi dukka ym kuːm lu vy ky cyh nyak. 30 Yn hnguva nyangmi duk kyng khy hngulawnglyktih ha ym pumhngaw lyamma hlawihliang ngei theila lyammau lu haija hyautih aciya ha khy ym myi lu vy. 31 Yn khiannyng sathih eyng myi byih jyt! Kei dy khukum kumthum my myih, a hnguːp a juan mikki kyak jyak kyng nyangmi jyang thuːkthawn khyaukhaw ky shin hnguːt khyang khindyang byih jyt.

32 "Yn nyng tuh a kei na nyangmi jyang Nuatpaw ceng cyp si seh, Mawhpaw khunkhyi jyng ky khyaukhaw lyamma khy si seh ky beh hnguːt. Yn tala na ce nyangmi ciciat nyak la cimcyang khyam lawh tih khyang ha dy huattyng nyangmi jyang hngei y bei nyn. 33 Kei na ce u hyaan, hngaa sikawvyngcee suishyak khy na hnguːt jonga. 34 Kei dy khuːt bi pui ha luːvei tomti tawkka ky pumhngaw na khuːtlup theinga puːhpum hnguːt khyang nyangmi na nym hnguat. 35 Ni ha tomti dukka khuːt poaija lupcap hnguːt theinga sanglai ngawgah ha eyng bei jy khyang kei na ky suduan hnguːt. Yn khiannyng Mawhpaw Jesuh kung na y shin hnguːt khyang ce ‘Ny bei thei khyang ce ny lawhei thyaak kyng khunkyi myi,’ tinyak khyang khyaukhaw hnguat thei byih jyt y tii hnguːt."

36 Yn ha tomti susaih pynnyng, Pawluh ce khukdya theila yn ha tomti dy y hngihminnei. 37 Yn hnguva yn ha cee gap awla Pawluh pyang theila cimtih uthyiam khyang cai pynnyng ym ka. 38 Atha mok huat ynih hngoai hngu lawh ti jozaw tinyak khyang Pawluh khyaukhaw khiannyng, ym ngiamiang kyih. Yn pynnyng Pawluh tuisyamphua cyp ym thyaakei.