1 Judah pee kuːh Antiawk lyamma lu tih khyang ciya ha na jummeitih khyang ha eyng: "Nyangmi ce Mosee Thumcian nyng cawk bawva, vuːnnmonghleih khyamtih kaw ce lilovei nyak lawh jo," tila ym cawk. 2 Yn khiannyng Pawluh la Barnabas cee yn ha dy tha eyng ym cahei thong. Yn hnguva aciya jummeitih ha na ym cahei thong khyang sumsa haija Pawluh la Barnabas tyng yn ha dukkuːh khyang cya ha dy Jerusalem luh a myi tih ceepaw la khyanglian ha cenga zet haija ym cijang.

3 Jummeitihpuːpaw na yn ha luh tua cyp ym thyaakkei pynnyng, Phoenicia pee la Samaria pee lyamma ym zet hnguva, khyang juː cya ha ibawva ym jummei lu tinyak khyang ym saih. Yn sityang ce jummeitih ha tomti ym jyak hnguva a hlyi jaa jyjo shyak. 4 Yn ha Jerusalem ma ym lu hnguva, yn ha na jummeitihpuːpaw, ceepaw ha la khyanglian ha ym dovei. Yn ha na ym pumhngaw eyng Nuatpaw na cai hnguːt khyang tomti ym saihjei. 5 Ynbawlakhy Pharisee bawng jummeitih ha aciya cee thoo theila, "Khyang juː cya ha khy Mosee tala lyklyam theila vuːnmonghleih ym khyammei lawh ey," ym tii.

6 Yn hnguva ceepaw ha la khyanglian ha kommei theila yn bawng sumsa ey ym dynnei. 7 ✝Yn sumsa pynnyng, Pitar cee thoo theila, "Benau tih aw, Kei mong ngyng sityang poai khyaukhaw khyang ciya ha na jaw theila jum nynny tawk Nuatpaw na acuːk kyng nyangmi duk kuːh kei y hngyahei hnguːt khyang nyangmi na ym hnguat. 8 ✝Khyang lungbawng hnguat tih Nuatpaw ce Muikhaw Cim mymi jyng saksi jyng bei hnguːt bawva, yn ha eyng bei theila yn ha Nuatpaw na dynnei hnguːt. 9 Mymi la yn ha kikawvyng jummeinyak kyng lungbawng cimcyang shyak theila yn ha khoihkha hnguːt jo. 10 Yn khiannyng tuh a, nyangmi cee mymi shyakai ha la mymi pumhngaw na my kyyt nyn kaw khyang vuhjyh ha jummeitih khyang juː ciya ha hngya huanna tyang theila ibawthawnnyng Nuatpaw nym cyam ma? 11 Ynbawlaakhy mymi khycee yn ha bawva, Mawhpaw Jesuh khunkhyi khiannyng lilovei khyam lawh tijyng my jummei," tila y hyau.

12 Yn hnguva Barnabas la Pawluh ce mymi khiannyng Khyang juː ciya dukka Nuatpaw cai khyang mikhnguh nyak la muːnnawseetih ha bawng yn ha eyng saih hnguva, khyang tomti ce ikhy ti kawva ym ngei. 13 Ym saih cyng hnguva, James na, "Benau tih vo, kei khyau khyang ngei jyt. 14 Nuatpaw na y pumhngaw ming ngy tawk Khyang juː ciya duk kuːh khyang ha hngyah ey tawkka yn ha cenga acuːk hnguva kuːhthuh y do tawh lu hnguːt khyang, Simon na saih hnguːt. 15 Hngawpaw ha khyaukhaw cee ceepaw ha susaih khyang dy a cyppei, yn ce jokkei hnguːt bawva:

16 " ‘Yn ha cyng ngyng cee kei ky lu bua ey,

ynpynnyng cimpak tih David pee la imm khy ky thooh bya ey,

kei na cimpak khyam lawh tih yn pee khy thoo bya theila,

yn khy cee ky cihngia shyak bya ey,

17 yn bawva gian tih ha dy kei ming ngyng pannei khyam lawh tih

Khyang juː ciya cee Mawhpaw ym sui jy,

18 Yn ha bawng pyam ma kuːhthuh hnguat tih Mawhpaw na y hyau hnguːt,’ y tii.

19 "Ni ce hnguːn khyang, Nuatpaw cenga hleilu bua tih Khyang juː cya ha tawk kaei tih mymi na cijang lawh jo. 20 Tala eyng cyppeitih kaw luːpzaw vyng bei khyang eiawk haa, byiunyak, hngyaa ik theila tuk khyang hiyangsei ssaw ei khyang la thii ei khyang ha tuan tila caw shan tuan tijyng ky taw. 21 Ibawthawnnyngma tijyngcee acuːk hngu kuːhthuh luh tyng ngyng Mosee tala susaih khyang myi khiannyng Judah ha sinakok ha a Jah hnguːp tyng ngyng ym phuat," tila y hyau.

22 Yn pynnyng ceepaw haa, khyanglian ha dy jummeitihpuːpaw tomti cee yn ha dukkuːh y cya khyang ha hngya awla Pawluh la Barnabas dy Antiawk luh a thuːh ey ym cijang. Yn ha na jummeitih dukkuːh khyang lian na thawntih khyang Barsabbas tinyak khyang Judah la Silas hyih ym hngyah. 23 Yn ha dy ym shan khyang caw vyng cee:

"Nym benau va thawn tih, ceepaw ha la khyang lianzang ha ce Antiawk luh, Syria luh la Cilicia pee jaa myi tih jummeitih ha eyng kym khin tijyng caw kym shan lu ym tinyak. 24 Keimi cenga kuːh zettih ha ce keimi na yn bawva cai byih tinaw kawva nyangmi jyng khyaukhaw vyng sawso naw shyak theila nyangmi lung sanglai khyang kym jyak lawh. 25 Yn khiannyng keimi tomti na acya khyang ha hngya theila keimi khiat khyang Pawluh la Barnabas dy huattyng nyangmi cenga thuːhlu haija lung cyppei nyak kyng ym cijang. 26 Yn hyih syak hiyang khyang ce mymi Mawhpaw Jesuh Khrist ming tawk syak hiyang tih ha ym thawn. 27 Yn khiannyng keimi i kym jok tinyak khyang khyaukhaw ha a si tijyng hyau haija Judah la Silas keimi na kym thuːh. 28 Yn ce Muikhaw Cim dy mymi ce adyang nga kuːh pui tih tua acya jyhju tih ha nyangmi huanna tyang kaw khyang kyng ngy tijyng shawphaw ym tu. 29 Nyangmi cee luːpzaw ha eyng ym hluhbon khyang eiawk, a thii ei khyang, hngya hak theila tuk khyang hyangsei ssaw ei khyang la tala eyng cyppei tih kaw byiunyak khyang ha cai lawh jo. Nyangmi ce yn ha tomti jyng nym cimcyang ngyng ce a khyng. Kaangsa byih jyt," tila jokkei hnguːt.

30 Yn khiannyng yn ha ym tuːh hnguva, yn ha cee Antiawk luh lyamma zet awla jummeitih ha dynnei shyak theila caw ym bei. 31 Khyang ha na yn phuat theiawla yn thabei khyaukhaw vyng ahlyi ja lungjy nyak kyng ym kuːm. 32 Hngawpaw a thawntih Judah la Silas na jummeitih ha eyng thabei khyaukhaw hyau panu hyau awla ym cihngia shyak. 33 Yn hyih cee acuːn meihzaw myi pynnyng, jummeitih ha na tuhlu tih ha cenga jadyam tih a ym tuːh bya. 34 *

35 Ynbawlakhy Pawluh la Barnabas cee Antiawk luh a myi hnguːt thei hngih la, khyang aciya ha panukung ngyng Mawhpaw sityang poai susaih awla ym cawk.

36 Khuhnguːp div hnguva Pawluh na Barnabas tyng, "Mawhpaw khyaukhaw my hngih susaih hnguːt nyak sai luh ha myitih jummeitih ha cenga zet theila lyngei pawla ibawva ym myicuh tinyak khyang tovei pii," y tinyak. 37 Yn hnguva Marka tijyang ym hyau khyang Jawhan ce Barnabas na zehpui nyak khy y luː. 38 ✝Ynbawlakhy Pawluh na yn zehpui nyak khy khindang hnguːt jo, ibawthawnnyngma tijyngcee Pamphylia pee ja kuːhthuh yn ha cengkuːh hlei bya theila khuːtbi nyak nawva lyk tih kaw pan tuan jo y tii. 39 Yn bawva khongkauvei khyang myi lu khiannyng, yn ha cee ym galak. Barnabas na Marka zehpui naw theila Cyprus khong phai lyamma y thuːh. 40 Ynbawlakhy Pawluh na Silas hngya theila y zet, jummeitih ha na Mawhpaw khunkhyi dukka yap khyammei theila ym zet. 41 Pawluh cee Syria pee la Cilicia pee tyng zet theila jummeitihpuːpaw ha y ciatmuat shyak.