1 Apollos ce Korin nga myi jei hnguva, Pawluh ce khoong lyaam zehtaw theila Ephesus luh a y komlu. Yn luh a yciya hngulawnglyktih ha y hnguh hnguva, 2 Pawluh na, "Nyangmi ce jummeitih a nym thawnlu hnguva, Muikhaw Cim nym dynnei lawh ei?" tila y hngii.

Yn ha na, "Keimi na lawh jo awnga, Muikhaw Cim myi tinyak khyang kung keimi na jaw saijo awnga," tila ym shyakkei bya.

3 Pawluh na, "Ynbaw hngucee nyangmi ibyang baptisma na ym khyammei ma?" tila y hngi hnguva,

Yn ha na, "Jawhan na bei khyang baptisma kym khyammei," ym tinyak.

4 ✝Pawluh na, "Jawhan baptisma bei khyang ce jubaijei nyak kyng cyppei tih baptisma a si. Yn hnguva khyang ha eyng ynih pynnyng lu hai pahuat nym jummei lawh ey. Yn cee Jesuh y hyau hluː," y tinyak.

5 Yn ha ce Mawhpaw Jesuh ming ngyng baptisma ym khyammei. 6 Pawluh na yn ha huanna y kuːt tyang hnguva, yn ha kunga Muikhaw Cim ce komlu theila, yn ha ce a juːjuː be hyau theila ym hngawpaw giah. 7 Yn ha tomti ce putaw pyt khulaihngih ym myi.

8 Pawluh ce kkhaw thum zingling sinakok ka voang theila kyh kawva susaih theila Nuatpaw teengpee bawng susaih jei thong awla jummei lu haija hlawihliang ngei theila y myi. 9 Ynbawlakhy yciya ha ce jummei jy tawk dyn hluː joaw, khyang ha hngoaimaw va yn Jesuh tala ym hawdawh nyak. Yn khiannyng Pawluh ce hngulawnglyktih ha dy huattyng yn ha cengkuːh hlei bya theila Tyrannus caw cawk nyak ka hnguːp* kut ym sumsa. 10 Yn bawva kum hngih susaih pynnyng, Asia pe ja myitih Judah la Grik khyang juː ha tomti ce Mawhpaw khyaukhaw ym jyak lawh.

11 Nuatpaw na Pawluh summei theila a hlyija muːnnawseetih ha y duan. 12 Pawluh summei khyang hiahzaw sikawvyngcee khyy suishyak kuatih ha huanna y tyang hnguva, yn ha nehnyaang a kuːk. Yn ha duk kuːh muikhaw see ha khy ym lyt giah. 13 A duːn tomti jaa zetjok tih Judah hlungtin sala ciya na Mawhpaw Jesuh ming summei theila muikhaw see ha ym shyt ty ym cai. Yn bawva ym cai hnguva yn ha na, "Pawluh susaih khyang Jesuh ming ngyng nyang lytlu tijyng kei na yang ky bei," tila ym hyau. 14 Yn bawva puhcai tih ha ce Judah Jahhenpaw Lian Sceva zawpaw syh ha ym si.

15 Yn hnguva muikhaw see na, "Jesuh ky hnguat, Pawluh khy ky hnguat, ynbawlakhy nyangmi cee u ha ma?" tila ym syakkei bya.

16 Yn pynnyng muikhaw see bynnei khyammei lawh tih na yn ha huanna pyak theila y khoi nyak hnguva, yn ha ce nehngaw lawhei theila suishyak kawva imm kuːh ym zen lawh. 17 Yn sityang Ephesus luh a myitih ha Judah khyang juː la Grik kyang juː ha na ym jyak hnguva, yn ha na kyh awla Mawhpaw Jesuh ming ym kyhkhiat kakai. 18 Jummeitih ha khycee lu theila yn ha puhcai hnguːt khyang, khyang ha hngoaimaw va ym saih jei. 19 Mikphia summei tih ha panukung ce yn ha summei khyang cawuk ha huattyng luvei theila khyang ha hngoaimaw va mei jyng ym shi. Yn cawuk phu ce hiyanshaw* shawng pahngaw byang myi. 20 Yn bawva Mawhpaw khyaukhaw ce phungan nyng lian* theila y pungpau jok giah.

21 Yn byang ha thawn pynnyng Pawluh ce muikhaw khiannyng Macedonia pe la Achaia pee tomti ja zet theila Jerusalem luh lyamma y zet ty y hnguːn.* Yn pynnyng Pawluh na, "Yn luh a zet theila kei ce Roma luh lyamma khy ky hnguh lawh ey," y tii. 22 Yn ce y pumhngaw dy phuitih pahngih hyih, Timawte la Erastus ce Macedonia pe ja tuːh theila, Asia pee jaa byangveih zaw y myi hnguːt.

23 Yn hnguva tala lyam myng cyppei theila Ephesus luh a ym lingso. 24 Demetrius mingnawtih thisaptih pahuat ce Artemis nuatnu hiyanshaw imm com theila yn ce thisaptih ha na panukung y jyh lawh. 25 Yn na yn khuːtbi tih ha huattyng pannei theila, "Khuːtbi pui ha aw, myn khuːt khiannyng mymi my jyh lawh khyang nyangmi na nym hnguat. 26 Ynbawlakhy Ephesus luh la Asia pe tomti jyang myitih yn ha eyng myn Pawluh tinyak khyang na khyang kuːt tyng com khyang nuat ha cee nuat si jo tila hnguhyam naw theila lyammau haija cai khyang nyangmi na khy nym hnguh nym hnguat. 27 Yn bawva mymi khuːt cee ming pak nyn. Ynbaw ce khawm cyang la aliantih Artemis nuat biatimm thihli naw kawva Asia pee tomti la somdek kyng myitih ha na ym khuːhbia khyang yn nuat ming zong khyang khycee kuːk theila sawso nyak khy myi," tila y hyau.

28 Yn sityang ym jyak hnguva, yn ha ce lungtyn theila, "Epheseus luh a kuːh Artemis nuatnu cee lian duː," tila ym pang. 29 Yn hnguva luh tomti ce lingso theila khyang ha na Pawluh dy zet hah pui y bawng ha thawn tih Macedonia pe shaw Gaius la Aristarchus tih muan awla pyi khawmnyak imm nu dukka ym zawn lu giah. 30 Pawluh cee khyang puː ha cenga zet hluː lakhy hngulawnglyktih ha na kawkat. 31 Pawluh kyi tih ha thawn tih ha, Asia pee khyang lian zaw ciya ha na khy yn pyi khawmnyak imm nuu dukka voangngei haija ym khawhei. 32 Yn hnguva khyang dyn tih ha ce lingso awla a juːjuː a ym pang. Khyang ha na ikhiannyng kym dynnei tinyak khyang hnguat joaw. 33 Judah khyang ha na Alexander mingnawtih khyang pahuat lyt shyak theiawla, khyang puː dukkuːh ciya ha na khy ynih ym hluːei khiannyng, Alexander na y kuːt duan theila khyangpuː ha eyng jaadyam nyak ky tawk y hyau vy y lun. 34 Ynbawlakhy yn ce Judah khyang pahuat thawn khyang, khyangpuː ha na sathih ym tyakkei hnguva, "Ephesus luh kuːh Artemis nuatnu cee lian duː," tila acuːn pahngih byang thai pahuat pyt tyng ym pang.

35 Ynbawlakhy luh cawlyang pyn tih ce khyang puː ha jadyam shyak theila, "Ephesus luh shaw ha aw, Ephesus luh ce lian duː tih Artemis nuatnu biatimm la huankhu kuːh kom lu tih luːpzaw sunghlyam nyak duːn thawn khyang hnguat tih kaw pahuat pahuat nym myi jei. 36 Yn khiannyng myn bawng ha ce, cahnyn kaw khyang bawng nga thawn khiannyng nyangmi ce jaadikdamdek ka myi theila thahli naw kawva cai tuan jo. 37 Mynija nym lu khyang, khyang hyih cee biatimm dukka voang awla, hutphaijei tih si tih ha bawva keimi nuatnu ming lian khyang siatnaw tih hyih khy si joaw. 38 Yn khiannyng Demetrius la y bawngpui thisaptih ha ce pahuat huat talacijang ngy myi jyngcee yn ha talacijang ngy jung ha la luh zong tih ha khyanglian ce ajyangjyi ym myi. Yn ha junga jyang tala baw tyng nga cijang seh. 39 Ynbawlakhy nyangmi jyng aciya bawng ha ym hngi jy myi jyngcee tala voang tih dynnei nyak kyng, y cijang piat ty. 40 Tuːh hnguːp pa thawn hnguːt tih lingso tih ha ce mymi tawk kyhsee khyang sawso nyak ky myi. Cihngia tih saksi pahuat huat myi kaw khiannyng, mymi na myn bawva lingso nyak sumsa nyak bei nyn hai si jo," tila y hyau. 41 Yn bawva hyau pynnyng, yn na khyang puː ha y tuːh bya.