1 Pawluh ce Derbe luh la Lystra luh a y phawlu, ynija Timawte tinyak khyang hngulawnglyktih pahuat y myi. Y nu ce jummeitih Judah hngutawe a thawn theila y pawe cee Grik y si. 2 Lystra luh la Iconium luh a myitih jummeitih benau ha na tyihvei khyang y si. 3 Pawluh na Timawte ynih lawng lyklu vy y luː, yn khiannyng ynih eyng vuːnmonghleih nyak khyang y cai piat. Ibawthawnnyngma tijyngcee yn pee ja myitih Judah khyang ha na y paw ce Griik khyang juː thawn tinyak khyang ym hnguat. 4 Ynpynnyng yn hyih cee luh pahuat pynnyng pahuat ym zet hnguva, Jerusalem ma myitih khyangpuː lianzang la ceepaw ha na suioat khyang khyaukhaw ha jummeitih ha na lyklyam haija ym shin hnguːt. 5 Ynbaw khiannyng khyangpuː ha cee jummeitihpuːpaw ha ce jummei nyak kyng ciatmuan nei theila hnguːp hnguii khyang ym khonglu.

6 Pawluh la y bawngbuai ha Phrygia pee la Galatia pee ja ym zetjok hnguva Muikhaw Cim na yn ha Asia pee ja khyaukhaw susaih kaw haija y kawkat. 7 Yn ha cee Mysia pe ja ym phawlu hnguva, Bithynia pe voang ngy ym cai, ynbawlakhy Jesuh Muikhaw na voang shyak hluː jo. 8 Yn khiannyng Mysia pee zehtaw awla* Troas luh a ym zet. 9 Pawluh cee a muː ip hnguva y myaang pahuat y hnguh. Yn y myaang cee Macedonia pee kuːh khyang pahuat na tung theila, "Macedonia pee ja lu theila keimi phui piat mawh vyt," tila y khawhei. 10 Yn lunghnguːn hnguh pynnyng, yn pee ja kuːh sityang poai saih haija keimi Nuatpaw na y hngyah pyn, jummei theila Macedonia pee ja zet ty y cai hlyi.

11 Keimi ce Troas luh kuːh panglai jyang tuisyamphua eyng Samothrace khongpyyi lyamma tingting zet hnguva, atha hnguːp pyng Neapolis luh a kym phawlu. 12 Ynijaa kuːhthuh Philipi luh a kym phawlu. Yn luh cee Macedonia; pee kuːh luːei tih acuːk luh* pahuat ta thawn theila Roma luh dyang nga kuːh luh a khy athawn. Keimi cee yn luh a khuhnguːp div va kym myi. 13 Jah hnguːp pyng keimi luh kyt tua lyt theila, hngihminnei nyak ky a duːn myih nyak nyn lyangkhyam ma kym zet. Yn pynnyng keimi cee ngoa theila yn duːn nyng dynneitih hngutaw ha eyng khyau hyau vy kym phun. 14 Thyatira luh kuːh Lydia mingnawtih hngutaw pahuat ce oale suishyak jy tih y si. Yn ce Nuatpaw khuːhbia tih pahuat y si. Pawluh na susaih hnguva poaija ngei haija Mawhpaw na y lungbawng hngawn piat. 15 Yn la y immlawng ha tomti cee baptisma khyammei awla, Lydia na, "Kei cee Mawhpaw ahngoan na jummeitih tijyang nym taw hngucee kei imm ma lu theila ipawm lu vyt," tila keimi y hlawihlaing ngei lu.

16 Hnguːp ciya eyng keimi cee hngihminnei nyak duːn na kym zet hnguva, muikhaw see voang theila hlungtinnu maanu pahuat kym hnguh. Yn ce hlungtin theila y mawhpaw ha tawk tangkaw panu y suilei piat. 17 Yn na Pawluh la keimi hngulawng lyk theila, "Myn khyang ha cee y hluːngduː tih Nuatpaw khuːtbi tih a ym thawn, nyangmi jyang lilovei nyak lyam susaih haija ym phawlu pyn," tila y vuipang. 18 Khuhnguːp div va yn bawva vuipang la y myijei khiannyng Pawluh cee a hlyija y lung sanglai jei. Yn khiannyng hngulyaam myangei theila, "Yn duk kuːh lyt buah, Jesuh Khrit ming ngyng nyang ky shyt," tinyak hnguva muikhaw see cee yn duk kuːh y lyt bya. 19 Ynbawlakhy y mawhpaw ha na ym pumhngaw tangkaw lawh nyak khy hnga ym hnguh tii kawvyng, Pawluh la Silas cee muan theila uptih myih nyak tukjyh nawva ym zehpui nyak. 20 Yn ha yang mawh ha cenga yn khyang hyih ym zeh hnguva, yn ha naa, "Myn hyih cee Judah khyang juː ha a thawn theila, mymi luh ym lingso hluː shyak. 21 Roma luh shaw khyang ha na mymi dynnei tuan kaw khyang thumcian ha bawva cai jy ym cawkhyau," ym tinyak. 22 Khyangpuː ha khy Pawluh la Silas tyng ym bungiang.

Yn hnguva luh uptih ha na Pawluh la Silas suishyak shut awla shawhciau vy ym hyau. 23 Pawluh la Silas tyng tyangkyih tih a shawhciau awla yn ha phehimm dukka khaw theila poaija khawnhyan haija thawngpyng tih eyng yang ym bei. 24 Yn yang y lawh hnguva, yn hyih phehimm khyn dukka hnguan theila yn hyih khu ha tiangbyng ngyng y khawnhyan.

25 Khujuan duːduːm myng Pawluh la Silas cee Nuatpaw cengnga hngihminnei theila y hngih bawibiau vei. Aciya phehimm kyakpui ha na khy ym ngei. 26 Cacatnawva liv lu theila phehimm tomti hluːnnei theila, yn hnguva byangveizaw vyng phehimm shawt hngawngei lu, yn pynnyng phehimm kyak khyammei tih ha ym khawnhyan nyak thijooi ha sat giah. 27 Thawngmawh cee letlu theila thawng shawt ha hngawngei khyang y hnguh hnguva, thawngshaw ha zeen pyn tila y uːtnyak hnguva y pumhngaw tuvei jy y cimpai y jukkei. 28 Ynbawlakhy Pawluh na, "Ny pumhngaw seesawnaw kawh! Keimi tomti mynija kym myi giah," tila tha eyng y pang.

29 Phehimm mawh na meei imm pannei theila y jyanga y voangei Yn pynnyng Pawluh la Silas hngoaimaw va sawsolelet nuva y munnei voih. 30 Yn ha pumtua y hluːh pynnyng, "Cawkhyautih vo, lilovei nyak lawh ey tawkka, kei na i ky cai lawh ey ma?" y tinyak.

31 Pawluh la Silas na, "Mawhpaw Jesuh jyang jum byih, nyang la ny immlawng tomti lilovei nyak nym lawh ey," y hngih tinyak. 32 Ynpynnyng yn immlawng ha tomti jyng Mawhpaw khyaukhaw ym susaih. 33 Yn juan tyng ngyng phehimm mawh na yn ha pannei theila ym nehngaw ha y patpiat. Ynbawva cai piat pynnyng, yn la ynih immlawng ha tomti saisikung baptisma ym khyammei giah. 34 Phehimm mawh ce Pawluh la Silas y imm ma pannei theila eiawk ha puhcai theila y khiin nyak, yn dy huattyng immlawng tomti cee Nuatpaw ym jummei khiannyng a hlyija ym jyjo.

35 Khuthuai lu hnguva, luh uptih ha ce phehimm mawh cenga khyanglian ha tuːh theila, "Yn hngyih pahngih hluːh bua yt," tila y shin.

36 Yn hnguva thawng mawh na yn sityang Pawluh eyng hyau theila, "luh uptih ha na nyang la Silas hluːh piat bya ey y shin lu. Yn khiannyng tuh a jadyam zawva ny hngih zet bua nyn," tila y hyau.

37 Ynbawlakhy Pawluh na khyanglian ha eyng, "Yn ha ce Roma pee shaw ha thawn tih keimi ha hngica kawva khyang puː ha hngoaimaw va shawtciau khawnhyan theila ym tyak hnguːt. Tuh a yn ha na keimi jyang amuːjuppa ym hluːh ey ei? Yn bawva cai tuan joaw! Ym pumhngaw lu theila kei hngih phehimm duk kuːh hluːh lu seh," y tinyak.

38 Khyanglian ha na khy, yn khyaukhaw khyanglian ha cenga susaih theila Pawluh la Silas cee Roma pee shaw y hngih si khyang ym hnguat hnguva, yn ha na ym kyh. 39 Yn khiannyng yn ha cee ym pumhngaw phehimm dukka lu theila khawhei pynnyng, yn hyih pumtua lyt shyak awla luh kuːh zet bya ey ym khawhei. 40 Pawluh la Silas phehimm duk kuːh lyt lu pynnyng, Lydia imm ma y hngih zet. Ynija jummeitih ha khawmmei theila thabei nyak khyaukhaw hyau theila yn luh kuːh y hngih zet bya.